سەيسەنبى, 23 ءساۋىر 2013 1:57
قاقتىعىس قۇرباندارى – 185 ادام
نيگەريانىڭ سولتۇستىگىندە اسكەري قىزمەتشىلەر مەن ءدىني سودىرلار اراسىندا بولعان ۇرىس سالدارىنان 185 ادام قازا تاپتى. بۇل جونىندە «اسسوشيەيتەد پرەسس» اقپارات اگەنتتىگى جەرگىلىكتى بيلىكتىڭ رەسمي مالىمەتتەرىنە سىلتەمە جاساي وتىرىپ حابارلادى.
سەيسەنبى, 23 ءساۋىر 2013 1:57
قاقتىعىس قۇرباندارى – 185 ادام
نيگەريانىڭ سولتۇستىگىندە اسكەري قىزمەتشىلەر مەن ءدىني سودىرلار اراسىندا بولعان ۇرىس سالدارىنان 185 ادام قازا تاپتى. بۇل جونىندە «اسسوشيەيتەد پرەسس» اقپارات اگەنتتىگى جەرگىلىكتى بيلىكتىڭ رەسمي مالىمەتتەرىنە سىلتەمە جاساي وتىرىپ حابارلادى.
ۇرىس بالىق اۋلايتىن جانە ونى وڭدەۋدەن وتكىزەتىن ءىرى ورتالىقتاردىڭ ءبىرى – باگا قالاسىندا بولعان. ۇرىس بىرنەشە ساعاتقا سوزىلعان. دەرەك كوزدەرىنىڭ سوزدەرىنە قاراعاندا, جۇما كۇنى «بوكو حارام» توبىنىڭ مۇشەلەرى مەشىتكە كەلگەن كورىنەدى. مەشىتتى اسكەريلەر قورشاۋعا العان. قاقتىعىس كەزىندە سودىرلار گراناتومەتتى پايدالانعان, ال اسكەريلەر ولارعا قارسى اۆتوماتتان وق جاۋدىرعان. باگاداعى جاعداي كەشە عانا قالىپقا تۇسكەندەي بولدى. بۇل ەلدەگى سودىرلاردىڭ ءىس-قيمىلى 2009 جىلدان باستاپ بەلسەندى سيپات الىپ كەلەدى.
كۇدىكتى دەپ ۇستالعان ەسىن جيدى
اقش-تاعى بوستون مارافونى ءوتىپ جاتقان كەزدەگى تەررورلىق ارەكەتتەردى جۇزەگە اسىردى دەگەن كۇدىكپەن ۇستالعان اعايىندى ەكەۋدىڭ ءبىرى – دجوحار تسارناەۆ ەسىن جيعان جانە ول بىرنەشە سۇراققا جازباشا جاۋاپ بەرگەن.
قۇقىق قورعاۋ ورگاندارى وكىلىنىڭ ايتۋىنشا, تسارناەۆتان نەگىزىنەن ولاردىڭ سىبايلاستارى جونىندە, سونداي-اق جارىلعىش قوندىرعىلاردىڭ بار نە جوق ەكەندىگى تۋرالى سۇرالعان. اعايىندى دجوحار مەن تامەرلان تسارناەۆتارعا ساۋىردە بوستون مارافونى كەزىندە تەررورلىق ارەكەتتەر جاسادى دەگەن كۇدىك كەلتىرىلىپ وتىر. سول تەررورلىق ارەكەتتەردەن ءۇش ادام قازا تاۋىپ, 180-گە جۋىق ادام جارالانعان ەدى. پوليتسەيلەرمەن اتىس كەزىندە تسارناەۆتاردىڭ ۇلكەنى – تامەرلان وققا ۇشقان بولاتىن.
مينيستر ساپاردان نەگە باس تارتتى؟
وڭتۇستىك كورەيانىڭ سىرتقى ىستەر ءمينيسترى يۋن بەن سە جاپونيا پرەمەر-ءمينيسترى سيندزو ابەنىڭ ياسۋكۋني حرامىنا سيمۆوليكالىق قايىرىمدىلىق جاساعانى ءۇشىن جاپونياعا جوسپارلانعان ساپارىن وزگەرتتى. بۇل اقپاراتتى كەشە «رەنحاپ» اگەنتتىگى تاراتتى.
وڭتۇستىك كورەيا سىرتقى ساياسات ۆەدومستۆوسىنىڭ جوعارى لاۋازىمدى شەنەۋنىگىنىڭ ايتۋىنشا, كورەيا ءسىم باسشىسىنىڭ جاپونياعا ساپارى قارساڭىندا پرەمەر-مينيستر ابەنىڭ ياسۋكۋني حرامىنا قايىرىمدىلىق جاساۋى «تابىستى ۇنقاتىسۋ جۇرگىزۋگە كەرى اسەر ەتەدى, سول سەبەپتى مينيستر ساپاردان باس تارتىپ وتىر». كورەيا ءمينيسترىنىڭ جاپونياعا ساپارى 26-27 ساۋىرگە جوسپارلانعان بولاتىن. ياسۋكۋني حرامى قازا تاپقان جاۋىنگەرلەرگە ارنالعان, وندا 1948 جىلى توكيو تريبۋنالىنىڭ ۇكىمى بويىنشا ءولىم جازاسىنا كەسىلگەن 14 اسكەري جەرلەنگەن. وڭتۇستىك كورەيانىڭ كەزىندە جاپونيانىڭ وتارى بولعانى بەلگىلى.
بيلىك پارتياسىن ارتتا قالدىردى
جەكسەنبى كۇنى پاراگۆايدا پرەزيدەنتتىك سايلاۋ ءوتىپ, باسىم داۋىسپەن 56 جاستاعى كاسىپكەر وراسيو كارتەس جەڭىسكە جەتتى. «رەيتەر» اقپارات اگەنتتىگىنىڭ حابارلاۋىنشا, ول بيلىك پارتياسىنان كانديدات ەفراين الەگرەنى ارتتا قالدىرعان.
وراسيو كارتەس ەلدەگى قالتاسى قالىڭ, باي ادامداردىڭ ءبىرى سانالادى. ول پرەزيدەنتتىككە پاراگۆايداعى وپپوزيتسيالىق بەدەلدى «كولورادو» پارتياسىنان تۇسكەن بولاتىن. كەيبىر مالىمەتتەرگە قاراعاندا, و. كارتەسكە سايلاۋشىلاردىڭ 53,8 پايىزى, ە. الەگرەگە 37 پايىزى داۋىس بەرگەن. بۇل ەلدە پرەزيدەنت بەس جىل مەرزىمگە ءبىر رەت قانا سايلانادى.
اقش بايانداماسىمەن كەلىسپەيدى
قىتاي حالىق رەسپۋبليكاسى مەملەكەتتىك كەڭەسىنىڭ ءباسپاسوز كەڭسەسى 2012 جىلى اقش-تىڭ ادام قۇقىعى سالاسىنداعى جاعداي تۋرالى ماتەريالداردى جاريا ەتتى. «سينحۋا» اگەنتتىگىنىڭ حابارلاۋىنشا, بۇل قۇجات اقش مەملەكەتتىك دەپارتامەنتى جارىققا شىعارعان 2012 جىلى الەمدە ادام قۇقىعى جونىندەگى بايانداماسىنا جاۋاپ بولماق.
اتالعان قۇجاتتا اقش ۇكىمەتى وزدەرىن «ادام قۇقىعىن قورعاۋشى» دەپ ەسەپتەيتىندىگى, الەمدەگى 190-نان استام ەلدى نەگىزسىز سىناعانى ايتىلعان. ولاردىڭ ىشىندە قىتاي دا بار. «سينحۋا» اگەنتتىگىنىڭ جازۋىنشا, اقش ءوز ىشىندەگى ادام قۇقىعىنىڭ قورعالۋىنا كوز جۇما قارايدى. «2012 جىلى قۇراما شتاتتارىندا اتىس قارۋىن قولدانۋ ەل حالقىنا ۇلكەن قاۋىپ ءتوندىردى. اقش-تا بايلار مەن كەدەيلەر اراسىنداعى ايىرماشىلىقتا الاڭداۋشىلىق تۋعىزادى», – دەلىنگەن قۇجاتتا.
14 جىلدان سوڭ بوستاندىققا شىقتى
وزبەكستاندا 14 جىل تۇرمەدە وتىرعان جازۋشى ءارى وپپوزيتسيونەر مامادالي ماحمۇدوۆ بوستاندىققا شىقتى. قۇقىق قورعاۋشى نادەجدا اتاەۆانىڭ ايتۋىنشا, م.ماحمۇدوۆ 1999 جىلدىڭ اقپانىندا تاشكەنتتە بولعان تەررورلىق ارەكەتتەر كەزىندە قاماۋعا الىنعان.
وسى تەررورلىق ارەكەتتەر سالدارىنان 16 ادام قازا تاۋىپ, جۇزدەن استام بەيبىت تۇرعىن جارالانعان ەدى. تاعى ءبىر جارىلىس ەل پرەزيدەنتى يسلام كاريموۆتىڭ قاتىسۋىمەن وتەتىن مينيسترلەر كابينەتىنىڭ وتىرىسىندا جاسالعان بولاتىن. ابىروي بولعاندا, پرەزيدەنت جيىنعا كەشىگىپ كەلگەن. كەيبىر دەرەكتەر سول جىلى بولعان تەررورلىق ارەكەتتەرگە بايلانىستى 18 مىڭ ادام تۇرمەگە جابىلعاندىعىن العا تارتادى. ال م.ماحمۇدوۆ كەزىندە وزبەكستان پرەزيدەنتتىگىنە كانديداتتىققا تۇسۋگە دە ارەكەتتەنگەن ەدى.
قىسقا قايىرىپ ايتقاندا:
چيتادا كوكونىس ساتاتىن دۇڭگىرشەكتەن ەسىرتكى ساتىلىپ كەلگەنى انىقتالدى. تەرگەۋ امالدارى بارىسىندا انىقتالعانىنداي, ءتورت اي ىشىندە قىلمىسكەرلەر وسى دۇڭگىرشەكتەردەن 12 كيلو ەسىرتكى ساتقان.
اۋعانستان تاليبتەرى تۇركيالىق جولاۋشىلار مىنگەن تىكۇشاقتى باسىپ الدى. ونىڭ بورتىندا ونشاقتى ادام بولۋى مۇمكىن.
سولتۇستىك كورەيا ەلدىڭ شىعىس جاعالاۋىنا تاعى ەكى بالليستيكالىق زىمىرانى بار قوندىرعىنى ورناتتى. مۇنى وڭتۇستىك كورەيانىڭ قورعانىس مينيسترلىگى حابارلادى.
مەكسيكانىڭ ميچواكان شتاتى اۋماعىندا قۋاتى 5,9 باللدىق جەر سىلكىنىسى بولدى. زارداپ شەككەندەر جونىندە اقپارات تۇسكەن جوق.
ينتەرنەت ماتەريالدارى نەگىزىندە ازىرلەندى.