سارسەنبى, 17 ءساۋىر 2013 2:15
بوستونداعى تاعىلىق ارەكەت
اقش-تىڭ بوستون قالاسىنداعى مارافون كەزىندە قوسارلانعان جارىلىس جاسالدى. لاڭكەستىكتىڭ وسىنداي تاعىلىق تۇرىنەن 3 ادام قازا تاپسا, 100-دەن استام ادام جارالانعان. بۇل تۋرالى ارنايى وتكىزىلگەن ءباسپاسوز ءماسليحاتىندا بوستون پوليتسياسىنىڭ وكىلى حابارلادى.
سارسەنبى, 17 ءساۋىر 2013 2:15
بوستونداعى تاعىلىق ارەكەت
اقش-تىڭ بوستون قالاسىنداعى مارافون كەزىندە قوسارلانعان جارىلىس جاسالدى. لاڭكەستىكتىڭ وسىنداي تاعىلىق تۇرىنەن 3 ادام قازا تاپسا, 100-دەن استام ادام جارالانعان. بۇل تۋرالى ارنايى وتكىزىلگەن ءباسپاسوز ءماسليحاتىندا بوستون پوليتسياسىنىڭ وكىلى حابارلادى.
وسى ارالىقتا CNN جەرگىلىكتى اۋرۋحانالاردان تۇسكەن مالىمەتتەرگە سىلتەمە جاساي وتىرىپ, لاڭكەستىك سالدارىنان كەم دەگەندە 140 ادامنىڭ زارداپ شەككەنىن جاريا ەتتى. ولاردىڭ 17-ءسى ءال ۇستىندە جاتسا كەرەك. ال جارىلىستار جىل سايىن وتەتىن, بيىل شامامەن جارتى ميلليونعا جۋىق ادام قاتىسقان بوستون مارافونىنىڭ قورىتىندى كەزەڭىندە اراسىنا 20 سەكۋند ءۇزىلىس سالىپ جاسالعان. اقش پرەزيدەنتى باراك وباما كىنالىلەردى تاۋىپ, جازالاۋعا ۋادە بەردى.
وپپوزيتسياشىلاردىڭ نارازىلىعى
ۇلتتىق سايلاۋ كوميسسياسى پرەزيدەنتتىك سايلاۋدا بيلەۋشى پارتيادان كانديدات نيكولاس مادۋرونىڭ جەڭىسىن جاريالاعاننان كەيىن, وپپوزيتسيادان پرەزيدەنتتىك سايلاۋعا تۇسكەن ەنريكە كاپريلەستىڭ مىڭداعان جاقتاستارى ۆەنەسۋەلا استاناسىنىڭ كوشەلەرىنە نارازىلىق اكتسياسىنا شىقتى.رەسمي مالىمەتكە سۇيەنسەك, مادۋرونى سايلاۋشىلاردىڭ 50,75 پايىزى قولداسا, كاپريلەسكە 48,97 پايىزى ءوز داۋىستارىن بەرگەن. كاپريلەستىڭ داۋىس بەرۋدىڭ قورىتىندىلارىن مويىنداماعانى بەلگىلى. ونى اقش پەن اراب مەملەكەتتەرىنىڭ ليگاسى قولدادى. ال دەمونسترانتتار بيلىكتى سايلاۋ قورىتىندىلارىن بۇرمالادى دەپ ايىپتادى جانە داۋىستاردى قايتا ساناۋدى تالاپ ەتتى. توبىردى تاراتۋ ءۇشىن پوليتسيا كوزدەن جاس اعىزاتىن گاز قولدانعان.
وڭتۇستىك كورەياعا ۋلتيماتۋم قويدى
كحدر-ءدىڭ جوعارعى كوماندوۆانيەسى وڭتۇستىك كورەياعا پحەنيانعا قارسى باعىتتالعان جاۋلىق قىزمەتتى توقتاتۋدى تالاپ ەتىپ, ۋلتيماتۋم جاريالادى. سولتۇستىك كورەيا ارمياسى كوماندوۆانيەسىنىڭ رەسمي مالىمدەمەسىندە كحدر-ءدىڭ بۇكىل ارمياسى مەن حالقىنىڭ وسى ادام ايتقىسىز قىلمىسقا بايلانىستى وكپەلەرى قارا قازانداي ەكەنى مالىمدەلەدى.تەكست ماتىنىنەن بەلگىلى بولعانىنداي, بۇل جەردە كحدر قىلمىس دەپ وڭتۇستىككورەيالىق بەلسەندىلەردىڭ كحدر-ءدىڭ نەگىزىن قالاۋشى كيم ير سەننىڭ 101-ءشى تۋعان كۇنى سەۋلدە سونداي-اق ونىڭ ۇلى كيم چەن ءيردىڭ جانە قازىرگى ەل باسشىسى كيم چەن ىننىڭ پورترەتتەرىنىڭ ورتەلگەنىن ەسەپتەپ وتىر ەكەن. ۋلتيماتۋم ماتىنىنە سايكەس, جاڭا وسىنداي ارەكەتتەر كورىنىس بەرگەن جاعدايدا كحدر ءوزىنىڭ جاۋلارىن ەشقانداي ەسكەرتۋسىز شابۋىلدايتىنى اتاپ كورسەتىلەدى.
قىسقا قايىرىپ ايتقاندا:* كحدر مەن وڭتۇستىك كورەيا شەكاراسىنداعى چحۆورۆون ۋەزىندە امەريكالىق تىكۇشاق اپاتقا ۇشىرادى. ول سولتۇستىك كورەيا تاراپىنان اتىپ ءتۇسىرىلدى دەگەن دە قاۋەسەت بار.* باكۋدەن 30 شاقىرىم جەردەگى سابۋنچي اۋدانىنداعى زابرات كەنتىنىڭ تۇرعىندارى ونى ازەربايجاننىڭ ەكس-پرەزيدەنتى گەيدار اليەۆتىڭ قۇرمەتىنە گەيداراباد دەپ وزگەرتۋدى ۇسىنىپ وتىر. وسى باستامانى قولداۋ ءۇشىن ەندى قول جينالماق.* بىشكەكتەگى جەڭىس ساياباعىنان بەلگىسىز بىرەۋلەر قىرعىزستان پرەزيدەنتى المازبەك اتامباەۆ وسى ءساۋىر ايىنىڭ باسىندا وتىرعىزعان ساكۋرا اعاشىنىڭ وسكىندەرىن ۇرلاپ كەتكەن. بۇل جەردە اڭگىمە 14 وسكىن تۋرالى بولىپ وتىر.* رەسەي مەمدۋماسىنىڭ دەپۋتاتتارى قىلمىستىق كودەكسكە دىنگە سەنەتىندەردىڭ سەزىمىن قورلاعانى ءۇشىن جازالاۋدى قاراستىراتىن جاڭا باپ ەنگىزۋدەن باس تارتۋعا شەشىم قابىلدادى.
قايتا قۇرىلىمداۋ سالدارى اۋىر
كيپردەگى اسا ءىرى بانكتەردىڭ سالىمشىلارى بيلىك قولعا العان قايتا قۇرىلىمداۋ سالدارىنان 8,3 ميلليارد ەۋروعا دەيىن جوعالتۋى مۇمكىن. مۇنى ەۋروكوميسسيانىڭ سوڭعى باعامداۋلارىنا سىلتەمە جاساي وتىرىپ, «رەيتەر» اگەنتتىگى حابارلادى.
كيپردىڭ بانك جۇيەسى كوپ جاعدايدا شەتەلدىك سالىمشىلارعا تاۋەلدى. سونىمەن ءبىر مەزگىلدە, قايتا قۇرىلىمداۋ ۇساق سالىمشىلار مەن اكتسيونەرلەرگە دە وڭايعا سوقپايىن دەپ وتىرعان سىڭايلى. ءسويتىپ, ءىرى جانە ۇساق سالىمشىلاردىڭ جيىنتىق جوعالتاتىن قارجىسى 10,6 ميلليارد ەۋرونى قۇراۋى ىقتيمال. ال, بانكتەردە 100 مىڭ ەۋرودان از اقشاسى بارلار ەشقانداي زارداپ شەكپەيدى.
شاۋ تارتقانداردان قايتارىم از با؟
ۋكراينانىڭ راديكالدى پارتياسىنىڭ سەركەسى ولەگ لياشكو جوعارعى رادا دەپۋتاتتارى ءۇشىن ەڭ شەكتەۋلى جاس – 65 جاستى ەنگىزۋدى ۇسىندى. ونىڭ پىكىرىنشە, اتالعان جاستان اسقاندار مەملەكەتتىك قىزمەتتەن بوساتىلۋلارى ءتيىس. وسىعان قاتىستى زاڭ جوباسىن لياشكو ەل پارلامەنتىندە تىركەتكەن.ۋكراينالىق راديكال ءوزىنىڭ باستاماسىن جاستار ءۇشىن جاڭا جۇمىس ورىندارىن قۇرۋ قاجەتتىگىمەن ءتۇسىندىرىپ وتىر. لياشكو اتاپ كورسەتكەندەي, جوعارعى رادانىڭ كوپتەگەن دەپۋتاتتارى اسارىن اساپ, جاسارىن جاساعاندار جانە بويىنداعى بارلارىن بەرىپ بولعاندار. سوندىقتان ورىندارىن بەلسەندى جانە پەرسپەكتيۆالى جاستارعا بوساتىپ بەرگەندەرى ءجون. ويتكەنى, قازىرگى كەزدە پارلامەنت جاڭاشا ويلايتىن جاستارعا ءزارۋ. ال بۇگىندە جوعارعى رادادا 80 جاستاعى ەفيم زۆياگيلسكي دە قىڭق ەتپەستەن وتىرعان كورىنەدى.
27 جىل وقشاۋ كۇن كەشكەن
امەريكانىڭ مەن شتاتىنداعى ريم قالاسىندا پوليتسيا 27 جىل بويى وركەنيەت ورتاسىنان ساياق ءومىر كەشكەن, ءىس جۇزىندە جان بالاسىمەن بايلانىسقا تۇسپەگەن كريستوفەر نايتتى ۇستادى. ول ەلدى مەكەندەرگە تەك كۇنكورىس ءۇشىن, ياعني تۇرمىسقا قاجەتتى زاتتار مەن ازىق-ت ۇلىك ۇرلاۋ ءۇشىن جاسىرىن تۇردە عانا بارىپ تۇرعان.پوليتسيا 47 جاستاعى نايتتىڭ 1000-نان استام وسىنداي قىلمىستارعا قاتىسى بولۋى ىقتيمال دەپ كۇدىك كەلتىرىپ وتىر. ول ساياق ءومىر كەشۋ ءۇشىن ورمانعا 1986 جىلى ءبىرجولاتا كەتكەن. بىراق مۇنى نە ءۇشىن جاساعانىن ءتۇسىندىرىپ بەرە المايدى. ونىڭ مالىمدەۋىنشە, جەكە-دارا بولعىسى كەلىپتى. نايت, ءبىر قاراعاندا, ورماندا جالعىز ءومىر سۇرەتىن جابايىعا ەش ۇقسامايدى ەكەن. ۇستالعان كەزدە اجەپتاۋىر كيىمى, ەسكى ۇلگىدەگى كوزىلدىرىگى بولىپتى.اقپارات اگەنتتىكتەرى ماتەريالدارىنىڭنەگىزىندە ازىرلەندى.