سەنبى, 13 ءساۋىر 2013 1:13
مۋرسي بەدەلىن جوعالتا باستادى
ەگيپەت پرەزيدەنتى موحاممەد ءمۋرسيدىڭ بەدەلى ناۋرىز ايىندا بارىنشا تومەندەگەن. ونى Baseera ەگيپەتتىك قوعامدىق پىكىردى زەرتتەۋ ورتالىعى جۇرگىزگەن جاڭا ساۋالناما دالەلدەپ وتىر.
سەنبى, 13 ءساۋىر 2013 1:13
مۋرسي بەدەلىن جوعالتا باستادى
ەگيپەت پرەزيدەنتى موحاممەد ءمۋرسيدىڭ بەدەلى ناۋرىز ايىندا بارىنشا تومەندەگەن. ونى Baseera ەگيپەتتىك قوعامدىق پىكىردى زەرتتەۋ ورتالىعى جۇرگىزگەن جاڭا ساۋالناما دالەلدەپ وتىر.
27-28 ناۋرىزدا تەلەفون ارقىلى جۇرگىزىلگەن ساۋالناما ەگيپەتتىكتەردىڭ 47 پايىزىنىڭ ءمۋرسيدىڭ ءىس-ارەكەتتەرىن تەرىس باعالايتىنىن كورسەتكەن. ول بيلىكتە بولعان العاشقى ءجۇز كۇندە بۇل كورسەتكىش 78 پايىز دەڭگەيىندە بولاتىن. سول سياقتى زەرتتەۋ ناتيجەلەرى جوعارى ءبىلىمدى ادامداردىڭ ورتادان جوعارى ەمەس ءبىلىمى بار ادامدارعا قاراعاندا پرەزيدەنت جۇمىسىن ايتارلىقتاي تومەن باعالايتىنىن كورسەتكەن. سونىمەن بىرگە, ساۋالناما ناتيجەلەرى بۇگىندە ءىس باسىنداعى پرەزيدەنتكە بالاما جوق ەكەنىن, ءالى دە ونىڭ كوپشىلىكتىڭ قولداۋىنا يە بولاتىنىن دا كورسەتىپ بەرگەن.
ەرەۋىلشى ستۋدەنتتەر قاماۋعا الىندى
چيليدە ەلدەگى ءبىلىم بەرۋ جۇيەسىنە قارسى نارازىلىق اكتسياسىنا قاتىسقان جۇزدەن استام ادام قاماۋعا الىندى. بۇقارالىق اقپارات قۇرالدارىنىڭ حابارلاۋىنشا, ەرەۋىلگە شامامەن 150 مىڭداي ادام قاتىسقان.
اكتسيا العاشىندا بەيبىت سيپاتتا بولعانىمەن, كەيىن كەلە بەتتەرىن بايلاپ العان جاستار پوليتسەيلەرگە تاس جانە باسقا دا زاتتار لاقتىرعان. وسىدان كەيىن قۇقىق قورعاۋ قىزمەتكەرلەرى گاز جانە سۋ اتقىش قولدانعان. ءسوز ورايىندا چيليدە وقۋشىلار مەن ستۋدەنتتەر نارازىلىقتارىنىڭ 2011 جىلدىڭ كوكتەمىنەن بەرى جالعاسىپ كەلە جاتقانىن ايتا كەتۋ قاجەت. ەرەۋىلشىلەر ەلدە پينوچەت رەجىمىنەن كەيىن ساقتالىپ قالعان جوعارى ءبىلىم بەرۋ جۇيەسىن رەفورمالاۋدى تالاپ ەتۋدە.
پرەزيدەنت جەمقورلىققا قارسى كۇرەس اشتى
فرانتسيا پرەزيدەنتى فرانسۋا وللاند بۇكىل الەمدەگى جەڭىلدىكتى سالىق سالۋ ايماقتارىن جويۋعا شاقىردى. ول مۇنداي مالىمدەمەنى ەلدە مورالدىق ستاندارتتاردى بەكىتۋ تۋرالى ۇكىمەتتىك زاڭ جوباسىن ۇلتتىق جينالىسقا ەنگىزگەننەن كەيىن جاسادى.
پرەزيدەنت اتاپ كورسەتكەندەي, فرانتسيادا سىبايلاس جەمقورلىقپەن جانە قارجىلىق الاياقتىقتارمەن كۇرەسەتىن جاڭا ورتالىق اگەنتتىك قۇرىلاتىن بولادى. 15 ساۋىرگە دەيىن ۇكىمەتتىڭ بارلىق مينيسترلەرى جاڭا قارجى ءتارتىبىن ەنگىزۋ ناۋقانى شەڭبەرىندە وزدەرىنىڭ جەكە جاعدايلارى تۋرالى مالىمەتتەردى دەكلاراتسيالاۋعا مىندەتتى. سول سياقتى فرانتسۋز بانكتەرى جىل سايىن وزدەرىنىڭ بۇكىل الەمدەگى فيليالدارىنىڭ تولىق ءتىزىمىن جانە ولاردىڭ قىزمەتى تۋرالى مالىمەتتەردى جاريالاپ تۇرۋى ءتيىس.
بولاشاقتى بولجايتىن ماشينا ويلاپ تاپتى
يران يسلام رەسپۋبليكاسى عىلىم مەن تەحنيكاداعى جەتىستىكتەرىمەن پلانەتانى تاڭعالدىرۋىن جالعاستىرۋدا. تەگەراننىڭ اتوم ەنەرگەتيكاسىن دامىتۋدا ەرەكشە تابىستارعا جەتكەنى بەلگىلى. تاياۋدا عانا يراندىق مايمىلدىڭ عارىشقا ۇشقانى تۋرالى ايتىلعان بولاتىن. ەندى كەزەكتى سەنساتسيا پايدا بولدى.
يراندىق عالىم ءوزىنىڭ بولاشاقتى بولجاۋعا قابىلەتتى قۇرال ويلاپ تاپقانىن مالىمدەپ وتىر. ونىڭ ءوز جاڭالىعىنا قاتىستى العان پاتەنتىندە ءدال سولاي دەپ اتاپ كورسەتىلگەن. ونەرتاپقىش ءالي رازەگي يراننىڭ مەملەكەتتىك پاتەنت بيۋروسى – ستراتەگيالىق زەرتتەۋلەر ورتالىعىنان «ۋاقىت ماشيناسىن» ويلاپ تاپقانى ءۇشىن پاتەنت العان. ءاليدىڭ ايتۋىنشا, ونىڭ ماشيناسى كەز كەلگەن ادامنىڭ بولاشاعىن 98 پايىز دالدىككە دەيىن اينا-قاتەسىز ايتىپ بەرە الادى.
كومپيۋتەر ساۋداسى 14 پايىزعا قۇلدىرادى
InternationalDataCorporation ساراپتامالىق كومپانياسىنىڭ حابارلاۋىنشا, دەربەس كومپيۋتەرلەر ساۋداسى ۇستىمىزدەگى جىلدىڭ ءبىرىنشى توقسانىندا 14 پايىزعا قۇلاعان. بۇل 1994 جىلدان بەرگى كومپيۋتەرگە دەگەن سۇرانىستىڭ ەڭ العاشقى تومەندەۋى بولىپ وتىر.
اتالعان ساراپتامالىق كومپانيا ماماندارى ونى ءتۇرلى ەلدەردەگى ساتىپ الۋشىلاردىڭ وزدەرىنىڭ ەسكىرگەن دەربەس كومپيۋتەرلەرىن جاڭارتۋدىڭ ورنىنا پلانشەتتەر مەن سمارتفونداردى بەلسەندى ساتىپ الا باستاۋىمەن تۇسىندىرەدى. سونىمەن بىرگە ساراپشىلاردىڭ بولجامىنشا, دەربەس كومپيۋتەرلەر باعاسىنىڭ وسە ءتۇسۋى دە ولاردىڭ ساتۋ كولەمىنىڭ قىسقارۋىنا تىكەلەي اسەر ەتكەن بولۋى مۇمكىن.
زىمىران ۇشىرۋ كەيىنگە قالدىرىلدى
سولتۇستىك كورەيا Windows 8 باسقارۋىنداعى باعدارلامالىق قامتاماسىزەتۋدەن تۋىنداعان پروبلەماعا بايلانىستى ورتا قاشىقتىققا ارنالعان«مۋسۋدان» بالليستيكالىق زىمىرانىن ۇشىرۋدى كەيىنگە قالدىردى. بۇلتۋرالى كحدر اقپارات اگەنتتىگىنە سىلتەمە جاساي وتىرىپ New Yorkerجۋرنالى حابارلاعان.
باسىلىم جۋرناليستەرىنىڭ ايتۋلارىنشا, سولتۇستىككورەيالىق زىمىراندار تاياۋ ۋاقىتتارعا دەيىن Windows-95 ارقىلى ۇشىرىلىپ كەلگەن. بىراق ەل باسشىلىعى وپەراتسيالىق جۇيە نۇسقاسىن جاڭارتپاق بولعان سىڭايلى. «مۋسۋداننىڭ» ەندى قاي ۋاقىتتا ۇشىرىلاتىنى تۋرالى ازىرگە حابارلانعان جوق.
ادامدى كەپىلدىككە الامىن دەپ وققا ۇشتى
امەريكانىڭ دجوردجيا شتاتىنداعى ساۆاني قالاسىندا ءورت ءسوندىرۋشىنى كەپىلدىككە ۇستاپ تۇرعان ەر ادامدى ارناۋلى ءبولىم قىزمەتكەرلەرى اتىپ ولتىرگەن. بۇل تۋرالى قۇقىق قورعاۋ ورگاندارىنا سىلتەمە جاساي وتىرىپ اسسوشەيتەت پرەسس اگەنتتىگى حابارلاعان.
قىلمىسكەردىڭ نازارىن باسقا جاققا اۋدارۋ ءۇشىن ارنايى جاساعان جارىلىس سالدارىنان كەپىلدەگى ادامدار جەڭىل عانا جاراقاتتار العان كورىنەدى. ەر ادامنىڭ ءورت ءسوندىرۋشىنى نەلىكتەن كەپىلدىككە العانى بەلگىسىز كۇيىندە قالىپ وتىر. ءبىر بەلگىلىسى, وعان بۇعان دەيىن ماجبۇرلەپ قونىس اۋدارۋ جانە ەلەكتر قۋاتىن اجىراتۋ تۋرالى ۇسىنىس حات بەرىلگەن ەكەن.
فيليپپيندە كۇشتى جەر سىلكىنىسى بولدى
ءفيليپپيننىڭ لۋسون ارالىنىڭ سولتۇستىگىندە بەيسەنبى كۇنى ماگنيتۋداسى 6,1 باللدىق جەر سىلكىنىسى بولدى. وسى اۋداندا تاعى دا جەر سىلكىنىسىنىڭ ورىن الۋى مۇمكىن دەگەن قاۋىپ بار.
ءفيليپپيننىڭ ۆۋلكانتانۋ جانە سەيسمولوگيا ينستيتۋتىنىڭ حابارلاۋىنا قاراعاندا, جەر سىلكىنىسىنىڭ ەپيتسەنترى باسكو قالاسىنىڭ سولتۇستىك شىعىسىندا 40 شاقىرىم قاشىقتىقتا بولعان. ءزىلزالا وشاعى فيليپپين تەڭىزىنىڭ 25 شاقىرىمدىق تەرەڭدىگىندە جاتقانى دا انىقتالىپ وتىر. ازىرگە قۇربان بولعاندار مەن قيراعان عيماراتتار تۋرالى مالىمەتتەر جوق.
ينتەرنەت ماتەريالدارى نەگىزىندە ازىرلەندى.