بەيسەنبى, 11 ءساۋىر 2013 1:55
قىتايدى سىن تەزىنە الدى
اقش سەناتورى دجون ماككەين قىتايدى سولتۇستىك كورەياعا قاتىستى پروبلەماعا ارالاسپاي وتىر دەپ سىنادى. ونىڭ پىكىرىنشە, پەكين كحدر-گە ىقپال ەتۋدىڭ ءتۇرلى تەتىكتەرىنە يە. بۇعان دەيىن اق ءۇي رەسەي مەن قىتايدى كحدر-ءدى تەجەۋدە بەلسەندىرەك قيمىلداۋعا شاقىرعان بولاتىن.
بەيسەنبى, 11 ءساۋىر 2013 1:55
قىتايدى سىن تەزىنە الدى
اقش سەناتورى دجون ماككەين قىتايدى سولتۇستىك كورەياعا قاتىستى پروبلەماعا ارالاسپاي وتىر دەپ سىنادى. ونىڭ پىكىرىنشە, پەكين كحدر-گە ىقپال ەتۋدىڭ ءتۇرلى تەتىكتەرىنە يە. بۇعان دەيىن اق ءۇي رەسەي مەن قىتايدى كحدر-ءدى تەجەۋدە بەلسەندىرەك قيمىلداۋعا شاقىرعان بولاتىن.
سەناتور سولتۇستىك كورەيا باسشىسى كيم چەن ىنعا قاتىستى بىلاي دەپ مالىمدەدى: «مەن بۇل جاس جىگىتتىڭ قانداي ويىن ويناپ وتىرعانىن تۇسىنبەدىم. بىراق ونىڭ سوعىس شەگىنە جاقىن تۇرعانى انىق». قازىرگى كەزدە قىتايدىڭ ءوزى دە سولتۇستىك كورەيامەن اراداعى شەكاراسىن جاپتى. وسى ارالىقتا وڭتۇستىك كورەيا دا رەسەي مەن قىتايدان سولتۇستىكتەگى كورشىسىن اقىلعا كەلۋگە شاقىرۋدى ءوتىندى.
اساد تۇركياعا ايىپ تاقتى
سيريا پرەزيدەنتى باشار اساد تۇركيا ۇكىمەتىن لاڭكەستەر دەپ اتاپ وتىرعان سيريالىق كوتەرىلىسشىلەرگە كومەك كورسەتۋدە دەپ ايىپتادى. سيريا پرەزيدەنتى تۇركيانىڭ وپپوزيتسيالىق تەلەارناسىنداعى ەفيردەن كورىنگەن بولاتىن.
ب.اساد تۇركيا پرەمەر-ءمينيسترى رەدجەپ ەردوعانعا سيرياداعى جانجال باستالعالى بەرى ءبىر اۋىز شىن ءسوز ايتقان جوق دەگەن كىنا ارتتى. سيريا پرەزيدەنتىنىڭ پىكىرىنشە, تۇركيا لاڭكەستەر ەكەنىن بىلە تۇرا كوتەرىلىسشىلەرگە قولداۋ كورسەتىپ كەلەدى. سونداي-اق, ب.اساد سيريا رەجىمى قۇلاعان جاعدايدا مۇنىڭ كەرى بۇكىل وڭىرگە كەلەتىنىن اتاپ ءوتتى. بۇۇ-نىڭ باعالاۋى بويىنشا, قارۋلى قاقتىعىس باستالعان ساتتەن بەرى ەلدە 70 مىڭداي ادام كوز جۇمسا, بوسقىندار سانى 1 ميلليوننان استام ادامدى قۇرايدى.
يران ازا تۇتىپ جاتىر
كەشە تاڭەرتەڭ يراندا سوڭعى ەكى كۇندە ەكىنشى مارتە جەر سىلكىنىسى تىركەلدى. قازىرگى كەزدە بەلگىلىسى – 37 ادام وپات بولسا, 850-ءى جارالانعان. سەيسمولوگتاردىڭ حابارلاعانىنداي, جەر سىلكىنىسىنىڭ ەپيتسەنترى يراننىڭ بۋشەر پروۆينتسياسىنىڭ اكىمشىلىك ورتالىعىنان 94 شاقىرىم جەردە بولعان.
ەسكە سالا كەتسەك, العاشقى جەر استى دۇمپۋلەرى 9 ساۋىردە يرانداعى بۋشەر اەس-ىنە تاياۋ جەردە ورىن العان ەدى. جەر سىلكىنىسىنىڭ ماگنيتۋداسى 6,3 بالل بولسا, ول ءتىپتى پارسى شىعاناعىنىڭ كەلەسى جاعالاۋىندا ورنالاسقان بىرىككەن اراب امىرلىكتەرىندە دە سەزىلگەن. قازىرگى كەزدە رەسەي دەلەگاتسياسى بۋشەردەگى اەس-ءتىڭ جاعدايىن باقىلاۋلارىنا العان. تەكسەرۋ ءۇشىن ارنايى كوميسسيا قۇرىلعان. بۇۇ باس حاتشىسى پان گي مۋن كەز كەلگەن قاجەتتى حالىقارالىق قولداۋعا دايىن ەكەنىن ءبىلدىردى.
گۋانتانامونى جابۋعا شاقىردى
بۇۇ-نىڭ ادام قۇقىقتارى جونىندەگى جوعارعى كوميسسارى ناۆي پيللاي امەريكا پارلامەنتىنىڭ بارلىق تارماقتارىن گۋانتاناموداعى تۇرمەنى جابۋ ءۇشىن كۇش بىرىكتىرۋگە شاقىردى. ول تۇرمەدە حالىقارالىق قۇقىق نورمالارى بۇزىلىپ كەلە جاتقانىن اتاپ كورسەتتى.
وسىدان ءتورت جىل بۇرىن پيللاي اقش پرەزيدەنتى باراك وبامانىڭ امەريكانىڭ كۋباداعى اسكەري بازاسى اۋماعىندا ورنالاسقان تۇرمەنى جابامىن دەگەن ۋادەسىن قۇپتاپ قۋاتتاعان بولاتىن. بىراق, قازىرگى كەزدە ول بۇل باعىتتا ەشتەڭە وزگەرمەگەنىنە قاپالى كورىنەدى. پيللاي اتاپ وتكەندەي, جاقىندا ورىن العان اشتىق جاريالاۋ تۇتقىنداردىڭ ءتوزىمى تاۋسىلعانىن بىلدىرەدى. لاڭكەستىككە قاتىسى بار دەپ ايىپ تاعىلعان 160 كۇدىكتىنىڭ كەيبىرى گۋانتانامودا 10 جىلدان استام ۋاقىتتان بەرى وتىر.
ماسكەۋ بيۋدجەتىنە اۋىر سالماق
بيىلعى قارلى قىس ماسكەۋ بيۋدجەتىنە قوسىمشا 1,2 ملرد. رۋبل سالماق سالدى. بۇل جونىندە ماسكەۋ قالالىق دۋماسى بيۋدجەت-قارجى كوميسسياسىنىڭ توراعاسى يگور انتونوۆ مالىمدەدى. ال قوسىمشا قارجى نەگىزىنەن قار شىعارۋ, كوشەلەردى قاردان تازالاۋ ماقساتىندا جۇمسالعان.
ەندى ماسكەۋدىڭ 2013 جىلعى بيۋدجەتىن قايتا قاراۋ قاجەتتىگى تۋىنداپ وتىر. بيۋدجەتكە تۇزەتۋلەر, تۇتاستاي العاندا, ماسكەۋ شىعىنىن ۇستىمىزدەگى جىلى تاعى 87 ملرد. رۋبلگە ۇلعايتىپ, ونىڭ جالپى سوماسىن 1,805 تريلليون رۋبلگە جەتكىزۋدى كوزدەيدى. وسى جەردە ايتا كەتەتىن ءبىر ءجايت – ماسكەۋ مەن ماسكەۋ وبلىسىنىڭ گيدرومەتەوبيۋروسى 2012-2013 جىلدارعى قىستا جاۋعان قار كولەمى جونىنەن مەتەوباقىلاۋ جۇرگىزىلە باستاعان 1879 جىلدان بەرى العاش رەت رەكوردتى بولعانىن, ياعني 329 سم قار تۇسكەنىن جاريالاعان ەدى. ال قالىپتى نورما – 152 سم.
ءبىر جىنىستى نەكە زاڭداستىرىلدى
فرانتسيا سەناتى ءبىر جىنىستى نەكەنى زاڭداستىرۋ تۋرالى زاڭ جوباسىنىڭ ءبىرىنشى بابىن ماقۇلدادى. اتاپ وتىلگەنىندەي, جاڭا نورمانى جاقتاپ 179 سەناتور ءوز داۋىستارىن بەرسە, 157-ءسى قارسىلىق تانىتقان. اتالعان باپ پارلامەنتتىڭ تومەنگى پالاتاسى – ۇلتتىق اسسامبلەيادان تۇسكەن تۇرىندە ەشقانداي تۇزەتۋسىز قابىلدانعان.
ماقۇلدانعان ءبىرىنشى باپ ءبىر جىنىستىلاردىڭ نەكەگە تۇرۋلارىن قۇقىقتىق تۇرعىدان بەكىتەدى. جاقىن كۇندەرى سەناتتا قۇجاتتىڭ باسقا باپتارى بويىنشا تالقىلاۋلار وتەتىن بولادى. ول باپتار, اتاپ ايتقاندا, ءبىر جىنىستى جۇپتاردىڭ بالالار اسىراپ الۋ ءتارتىبىن بەلگىلەيدى. ءسوز رەتىندە ايتا كەتسەك, فرانتسيانىڭ ۇلتتىق اسسامبلەياسى ءبىر جىنىستى نەكەنى زاڭداستىرۋعا جانە بالا اسىراپ الۋلارىنا قاتىستى زاڭ جوباسىن ۇستىمىزدەگى جىلعى اقپاننىڭ باسىندا ماقۇلداعان ەدى.
قىسقا قايىرىپ ايتقاندا:
اقش پرەزيدەنتى باراك وباما يسلام سودىرلارىنا قارسى سوعىسىپ جاتقان سومالي ۇكىمەتىنە اسكەري كومەك كورسەتۋگە دايىن ەكەنىن مالىمدەدى. وبامانىڭ سوزىنە قاراعاندا, اسكەري كومەك وڭىردە بەيبىتشىلىك ورناتۋعا جانە امەريكانىڭ قاۋىپسىزدىگىن نىعايتۋعا كومەكتەسەدى.
رەسەي قورعانىس مينيسترلىگى جاڭا راديوەلەكتروندى جەر سەرىگى باقىلاۋ جۇيەسىن قۇرۋ ءۇشىن شامامەن 70 ملرد. رۋبل شىعىندايتىن بولدى. بەس عارىش اپپاراتىنان تۇراتىن جۇيەنى جاساۋعا جاريالانعان كونكۋرستى لاۆوچكين اتىنداعى عىلىمي-وندىرىستىك بىرلەستىگى جەڭىپ الدى.
مالايزيا پارلامەنتىنە كەزەكتەن تىس سايلاۋ 5 مامىرعا بەلگىلەندى. ۇمىتكەرلەردىڭ تىركەلەتىن سوڭعى كۇنى 20 ءساۋىر دەلىنىپ وتىر. بۇدان كەيىن سايلاۋالدى باسەكەلەرى باستالادى. ەل پرەمەر-ءمينيسترى نادجيب رازاك پارلامەنتتى تاراتاتىنىن 3 ساۋىردە جاريالاعان-تىن.
گەرمانيا مەن اۆستريا شەكاراسىندا 27 جاستاعى نەمىس ازاماتىنان رەسەي پرەزيدەنتى ۆلاديمير ءپۋتيننىڭ اتىنداعى جۇرگىزۋشى كۋالىگى كامپەسكەلەندى. اتى-ءجونى ايتىلمايتىن نەمىس ازاماتى جۇرگىزۋشى كۋالىگىن رەسەيدەگى بازارلاردىڭ بىرىنەن ساتىپ العان كورىنەدى. قىلمىستىق نيەتى جوقتىقتان, ول قىلمىستىق جاۋاپكەرشىلىككە تارتىلمايتىن بولدى.
ينتەرنەت ماتەريالدارى نەگىزىندە ازىرلەندى.