جۇما, 5 ءساۋىر 2013 2:09
كوكتەمگە سالىم قىرعىز اعايىنداردىڭ اراسىندا بەلسەندىلىك كۇشەيەدى. بۇعان دەيىن ەكى رەت رەۆوليۋتسيا بولىپ, پرەزيدەنتتەرىن شەتەلگە قۋىپ تاستاعان. بيىل دا رەۆوليۋتسيا بولۋى مۇمكىن دەپ جورامال ايتۋ قيىن, بىراق حالىقتىڭ بەلسەندىلىگى كۇشەيگەنى انىق.
جۇما, 5 ءساۋىر 2013 2:09
كوكتەمگە سالىم قىرعىز اعايىنداردىڭ اراسىندا بەلسەندىلىك كۇشەيەدى. بۇعان دەيىن ەكى رەت رەۆوليۋتسيا بولىپ, پرەزيدەنتتەرىن شەتەلگە قۋىپ تاستاعان. بيىل دا رەۆوليۋتسيا بولۋى مۇمكىن دەپ جورامال ايتۋ قيىن, بىراق حالىقتىڭ بەلسەندىلىگى كۇشەيگەنى انىق.
كوكتەم وڭتۇستىكتەن باستالادى, بەلسەندىلىك تە ەلدىڭ وڭتۇستىگىنەن اڭعارىلدى. جالالاباد جانە وش وبلىستارىندا ول ايقىن كورىندى. ميتينگ, شەرۋلەر ءوز الدىنا, جالالابادتىقتار 24 ناۋرىزدا قۇرىلتاي دا وتكىزىپ تاستادى. ونى باكيەۆتىڭ زامانىندا بيلىكتە بولعان ۇسەن سىزدىقوۆ ۇيىمداستىرىپ, 15 مىڭ ادامنىڭ باسىن قۇرادى. وندا «ەل ءۇنى» قوزعالىسى قۇرىلىپ, قازىرگى بيلىكتى ايىپتاعان شەشىم قابىلدادى. ايىپتىڭ ۇلكەنى – قازىرگى باسشىلار ناۋرىز جانە ءساۋىر رەۆوليۋتسيالارىنان قورىتىندى جاساماعان, پارلامەنتتىك بيلىك «قايتادان اۆتوريتارلىق پرەزيدەنتتىك بيلىككە ويىسىپ بارا جاتىر». ناقتى تالاپ: بىلتىرعى جىلعى 3 قاراشادا «مەملەكەتتىك توڭكەرىس جاساۋ ارەكەتىن» ۇيىمداستىرۋشىلار – «اتاجۇرت» پارتياسىنان دەپۋتاتتار قامشىبەك تاشيەۆ, تالانت مامىتوۆ جانە سادىر جاپاروۆتاردى قاماقتان بوساتىپ, «قۇمتور» التىن كەن ورنىن شەتەلدىكتەردەن مەملەكەت مەنشىگىنە الۋ بولدى.بۇل ءبىر بۇگىن ايتىلىپ جۇرگەن نارسە ەمەس, ءبىرازدان بەرى ءسوز بولىپ جۇرگەن جاي. ەندى وعان وپپوزيتسيا حالىقتىق سيپات بەرۋگە تىرىسىپ وتىر. بۇل جەردە ولار ءتۇرلى ايلا-شارعىدان دا تايىنار ەمەس. سوڭعى كەزدە ءتۇرلى ساياسي شارالارعا ايەل ازاماتتاردى كوپتەپ قاتىستىرىپ قانا قويماي, سولارعا ءسوز ايتقىزۋ ادەتكە اينالىپ بارا جاتقانداي. قىرعىز, قازاق – انانى قادىرلەگەن حالىق, ولاردىڭ ايتقان ءسوزى جەرگە تاستالمايدى. كەيدە ءبىر ەل اراسىندا قانتوگىسكە سوقتىرعانداي جاعداي قالىپتاسىپ, ەكى جاق شارپىسقالى تۇرعاندا, قولىنا اق جاۋلىعىن الىپ, انانىڭ جۇرتتى قىرقىسۋدان قۇتقارعان كەزى دە بولعان. ال مۇنداعىلار وزدەرىنىڭ لاستاۋ ىستەرىنە انانىڭ اق پەيىلىن پايدالانعىسى كەلەدى, وزدەرىنىڭ جوسىقسىز تالاپتارىن اق جاۋلىقتى انانىڭ, قارت كەيۋانانىڭ اۋزىنا سالادى.قىرعىزستان پرەزيدەنتى المازبەك اتامباەۆ ەلدىڭ وڭتۇستىگىن ارالاعان كەزدە وسىنداي جاعدايعا كەزدەسىپتى. كىم بىلەدى, ءوزىنىڭ بەدەلىنە سەندى مە ەكەن, جۇرتتى تىنشىتۋدى ويلاعانى انىق قوي, پرەزيدەنت حالىقپەن تىكەلەي كەزدەسۋدى جوسپارلاعان. بىراق بۇل جوسپارى جۇزەگە اسپاپتى. ءتۇرلى بەلسەندىلەردىڭ ىقپالىندا جۇرگەن حالىق ءوز پرەزيدەنتىن تىڭداي قويماعان. باستى تالاپ: «اتاجۇرت» پارتياسىنىڭ قاماۋدا جاتقان دەپۋتاتتارىن بوسات دەيدى. پرەزيدەنتتىڭ ولاردىڭ اق-قارالىعىن زاڭعا سۇيەنىپ, سوت شەشەدى دەگەن ءسوزىن قابىلدامايدى. جالالاباد ورتالىق الاڭىنا جينالعاندار اتىنان سويلەگەندەر: «سەن ءوزىڭنىڭ جارلىعىڭمەن ولارعا كەشىرىم جاساي الاسىڭ, جارلىعىڭدى وسى جەردە شىعار», دەپ ايقايلاعان. پرەزيدەنتتىڭ «زاڭدى سىيلايىق, سوتتى تىڭدايىق. زاڭ الدىندا جۇرتتىڭ ءبارى تەڭ – دەپۋتات تا, مينيستر دە, قاراپايىم ادامدار دا, پرەزيدەنت تە», – دەگەن ءسوزىن ەشكىم ەستىگىسى كەلمەگەن.زاڭ دەمەكشى, وتكەن جۇما كۇنى «اتاجۇرت» پارتياسىنىڭ دەپۋتاتتارىنا جانە ولاردىڭ جوعارعى كەڭەستىڭ عيماراتىنا كۇشپەن كىرمەك بولعان ارەكەتتەرىن قولداعاندارعا سوت بولدى. سوت ءۇيىنىڭ ماڭىندا «بۇرىنعى دەپۋتاتتاردى» جاقتاۋشىلاردىڭ 200 ادام قاتىسقان ميتينگىسى ءوتىپتى. سوعان قاراماي, سوت ۇكىم شىعارعان. ءسىرا, وپپوزيتسيا ارەكەتتەرىنىڭ ىقپالى دا بولعان-اۋ شاماسى, جازا جەڭىلدەۋ كورىنەدى. مەملەكەتتىك ايىپتاۋشىلار تاشيەۆتى – 10 جىلعا, ماماتوۆتى 9 جىلعا سوتتاۋدى سۇراسا, سوت ولاردى تيىسىنشە 1,5 جانە 1 جىل ەركىنەن ايىرۋعا كەسىپتى. بىراق جازانىڭ اتى – جازا.بۇل ەلدەگى ساياسي بەلسەندىلىكتىڭ سيپاتىنا قاراعاندا, سوتتىڭ بۇل شەشىمى دە الدا تالاي ايقايعا نەگىز بولار دەيسىڭ. اعايىن ەلدە ايقاي كوپ بولىپ جاتادى. جۇرتتىڭ بەلسەندى بولعانى دا, ءوز ويلارىن بىلدىرگەنى دە جاقسى. تەك ونىڭ ساياسي ويىنعا اينالعانى جاقسى ەمەس-اۋ. ال جۇرتتىڭ الدە ءبىر بيلىكقۇمارلاردىڭ ويىنشىعىنا اينالعانى مۇلدە جاقسى ەمەس.
ماماديار جاقىپ, «ەگەمەن قازاقستان».