بەيسەنبى, 28 ناۋرىز 2013 1:29
فرانتسۋزدار ەكى ءۇندىنى اتىپ ءولتىردى
فرانتسۋزدىق اسكەري قىزمەتشىلەر جاقىندا بيلىككە كوتەرىلىسشىلەر توبى كەلگەن ورتالىق افريكا رەسپۋبليكاسىندا ءۇندىستاننىڭ ەكى ازاماتىن اتىپ ءولتىردى. بۇلاردان باسقا التى ادام جارالانعان. ولاردىڭ اراسىندا چاد رەسپۋبليكاسىنىڭ, كامەرۋننىڭ ازاماتتارى دا بار دەلىنىپ وتىر.
بەيسەنبى, 28 ناۋرىز 2013 1:29
فرانتسۋزدار ەكى ءۇندىنى اتىپ ءولتىردى
فرانتسۋزدىق اسكەري قىزمەتشىلەر جاقىندا بيلىككە كوتەرىلىسشىلەر توبى كەلگەن ورتالىق افريكا رەسپۋبليكاسىندا ءۇندىستاننىڭ ەكى ازاماتىن اتىپ ءولتىردى. بۇلاردان باسقا التى ادام جارالانعان. ولاردىڭ اراسىندا چاد رەسپۋبليكاسىنىڭ, كامەرۋننىڭ ازاماتتارى دا بار دەلىنىپ وتىر.
فرانتسۋز جاعى قارۋ كەزدەيسوق قولدانىلعان دەگەندى كولدەنەڭ تارتادى. فرانتسيا پرەزيدەنتى فرانسۋا وللاند ءۇندىستان پرەمەر-ءمينيسترى مانموحان سينگحكە ورىن العان وكىنىشتى وقيعاعا وراي كەشىرىم سۇراعان حات جولدادى. حاتتا وقيعانىڭ جاي-جاپسارى ەگجەي-تەگجەيلى تەكسەرىلەتىنى دە اتاپ كورسەتىلەدى. ال وقيعا فرانتسۋزداردىڭ باقىلاۋ-كۇزەتىندەگى بانگي اۋەجايىندا بولعان.
قۇپيا قىزمەت باسشىسىن تاڭدادى
اقش پرەزيدەنتى باراك وباما مەملەكەت باسشىسىنىڭ كۇزەتىمەن اينالىساتىن قۇپيا قىزمەتتىڭ باسشىسى لاۋازىمىنا اگەنت دجۋليا پيرسوندى تاڭدادى. ول بۇعان دەيىن قۇپيا قىزمەتتە شتاب باستىعى بولىپ جۇمىس ىستەپتى. ەندى پيرسون وسى لاۋازىمعا تاعايىندالعان العاشقى ايەل بولىپ وتىر.
اتاپ كورسەتەتىن ءجايت – پيرسوندى بەكىتۋ ءۇشىن كونگرەستىڭ ماقۇلداۋى قاجەت ەتىلمەيدى. قۇپيا قىزمەتتىڭ بۇرىنعى باسشىسى مارك سالليۆان اقپان ايىنىڭ باسىندا وتستاۆكاعا كەتكەن بولاتىن. ونىڭ ءارتۇرلى سەبەپتەرى بار ەكەنى تۋرالى دا بولجامدار كوپ. جالپى, اقش-تىڭ قۇپيا قىزمەتى پرەزيدەنتتى جانە ونىڭ وتباسىن, سونداي-اق ەلدىڭ بۇرىنعى باسشىلارىن كۇزەتەدى. اقش ۆاليۋتاسى مەن مەملەكەتتىك وبليگاتسيالاردى قولدان جاساۋ ۇدەرىستەرىمەن كۇرەسۋ دە وسى قىزمەتتىڭ مىندەتىنە جاتادى.
تەڭىز بايلىعىنا كوز تىگۋشىلەر كوپ
ۆەتنام قىتاي تاراپىن بالىق اۋلايتىن قايىعىن اتقىلادى دەپ ايىپتادى. وقيعا وڭتۇستىك-قىتاي تەڭىزىندەگى ەكى ەلدىڭ دە تالابى بار پاراسەل ارالدارىنا جاقىن جەردە تىركەلگەن. كيكىلجىڭ 20 ناۋرىزدا ورىن العانىمەن, ۆەتنام باسشىلىعى بۇل تۋرالى تەك ەندى عانا مالىمدەپ وتىر.
وق اتۋدان زارداپ شەككەندەر بار ما, جوق پا ول جاعى بەلگىسىز. ۆەتنام جاعى وقيعا تۋرالى ناقتى اقپار تاراتۋدان باس تارتۋدا. بىراق رەسمي حانوي وقيعاعا ۇلكەن ءمان بەرگەندىكتەن, قىتاي ەلشىسىنە شاعىم تۇسىرگەن. قىتاي تاراپىنىڭ دا جاۋابى دايىن: ۆەتنامدىقتار قىتايدىڭ اۋماقتىق سۋلارىندا زاڭسىز بالىق اۋلاعان, دەيدى. ال وڭتۇستىك-قىتاي تەڭىزىندە تابيعي گازدىڭ مول قورى بار. ودان قىتاي مەن ۆەتنام عانا ەمەس, سونداي-اق فيليپپين, مالايزيا, تايۆان جانە برۋنەي ءۇمىتتى.
يتاليالىق مينيستر وتستاۆكاعا كەتتى
يتاليا سىرتقى ىستەر ءمينيسترى دجۋليو تەرتسي كەشە ءوزىنىڭ وتستاۆكاعا كەتەتىنىن مالىمدەدى. ول ءوز ۇستانىمىن ۇندىستاندىق بالىقشىلاردى ءولتىردى دەپ ايىپتالىپ وتىرعان ەكى يتاليالىق تەڭىزشىنى ءۇندىستان بيلىگىنە بەرۋ تۋرالى شەشىممەن كەلىسپەيتىندىگىمەن ءتۇسىندىردى.
مەن ءارى قاراي بۇل ۇكىمەتتىڭ ءبىر بولشەگى بولا المايمىن. مەنىڭ اسكەري تەڭىزشىلەردى بەرۋ مۇلدەم قيسىنسىز دەگەن ءۋاجىمدى ەشكىمنىڭ تىڭداعىسى دا كەلمەدى, دەيدى تەرتسي. مينيستر ماريو مونتي ۇكىمەتىنىڭ شەشىمىنە نارازىلىعىن وسىلايشا ءبىلدىردى. ال وقيعا بىلتىر ءۇندى مۇحيتىندا ورىن العان ەدى. يتاليانىڭ تانكەرىن كۇزەتكەن تەڭىزشىلەر وزدەرىنە جاقىنداعان شحۋنانى پيراتتاردىكى دەپ قالىپ وق اتسا كەرەك.
اقش-تىڭ ەڭ قىمبات ەكس-پرەزيدەنتى
امەريكالىق قازىنا بىلتىر كىشى دجوردج بۋش ءۇشىن 1,3 ميلليون دوللار شىعىنداپتى. ءسويتىپ, ول قازىرگى كوزى ءتىرى ەڭ قىمبات بۇرىنعى پرەزيدەنت اتانىپ وتىر. بۇل سوما ونىڭ جىل سايىنعى 200 مىڭ دوللارلىق زەينەتاقىسىنان, ونىڭ اپپاراتىن ۇستاۋ ءۇشىن بولىنەتىن 100 مىڭ دوللاردان, سونداي-اق ونىڭ ءجۇرىپ-تۇرۋى (ۇشۋلارى دا بار), وفيس, پوشتا جانە باسقا دا قىزمەتتەرىنە جۇمسالاتىن قارجىدان جيناقتالادى.
تىزىمدە ەكىنشى ورىندا بيلل كلينتون تۇر. امەريكالىقتار وعان بىلتىر شامامەن 1 ميلليون دوللار شىعىنداپتى. بۇل بۇرىنعى پرەزيدەنتتىڭ نەگىزگى قارجىسىنىڭ جارتىسىنا جۋىعىن نيۋ-يوركتەگى ءوفيسىن جالعا العانى ءۇشىن تولەگەن 442 مىڭ دوللارى جالماعان. ال ۇلكەن بۋش سالىق تولەۋشىلەردىڭ قالتاسىنا 850 مىڭ دوللار كولەمىندە قول سالسا, دجيممي كارتەردىكى 500 مىڭ دوللار ەكەن.
ۇرلىقشىلىعى ءۇشىن – 6 جىل تۇرمە
قىتاي ازاماتى سيسين ليۋ وتانداستارىنا امەريكالىق اسكەري تەحنولوگيالاردى زاڭسىز بەرگەنى ءۇشىن 6 جىلعا باس بوستاندىعىنان ايىرىلدى. پەنتاگوندا جۇمىس ىستەيتىن 49 جاستاعى قىتايلىق ۇشقىشسىز ۇشاتىن ۇشاقتارعا نىسانالاردى سپۋتنيكتەرمەن بايلانىسسىز جويۋعا ءمۇمكىندىك بەرەتىن قۇرىلعى تۋرالى مالىمەتتەردى بەرسە كەرەك.
وسىلايشا ليۋ وتانىنا ورالعان سوڭ جاقسى جۇمىسقا ورنالاسۋدان دامەلەنىپتى. ال تەحنولوگيالاردى ۇرلاۋدان كەلگەن شىعىن اقش-تىڭ قورعانىس ۆەدومستۆوسى ءۇشىن جۇزدەگەن ميلليون دوللاردى قۇراۋى مۇمكىن دەلىنىپ وتىر. جالپى, سوڭعى 4 جىلدا اقش-تا قىتايدىڭ پايداسىنا شپيوندىقپەن اينالىسقان 100 شاقتى ادام تۇتقىندالىپتى. كوپتەگەن ۇرلىق, تەحنولوگيالار اسا قۇپيا بولعاندىقتان, ايتىلمايدى دا ەكەن.
قىسقا قايىرىپ ايتقاندا:
نيگەر دەلتاسىن ازات ەتۋ ءۇشىن قوزعالىسىنىڭ سەركەسى گەنري وكا 24 جىلعا سوتتالدى. مۇنداي شەشىمدى وڭتۇستىك افريكا رەسپۋبليكاسىنىڭ سوتى قابىلدادى. وكاعا لاڭكەستىكپەن اينالىستى دەگەن ايىپ تاعىلعان بولاتىن. بۇل ونىڭ العاشقى سوتتالۋى ەمەس.
اۆستريادا قالىڭ قار جاۋدى. وسىنىڭ سالدارىنان ەل استاناسى ۆەنانىڭ باتىسىنداعى كۇرە جولدا 100 ماشينە سوقتىعىسقان جول-كولىك وقيعاسى تىركەلدى. كەم دەگەندە ءبىر ادام كوز جۇمعان. قار سونداي-اق سەربيا, ۆەنگريا, حورۆاتيا جانە رۋمىنيا اۋماقتارىنا دا قالىڭ تۇسكەن. كەي وڭىرلەردە اۆتوموبيل بايلانىسى توقتاعان.
تايۆاندا ماگنيتۋداسى 6,3 باللدىق جەر سىلكىنىسى تىركەلدى. نەگىزگى ءدۇمپۋ ەل استاناسىنان 250 شاقىرىم جەردەگى نانتوۋ ۋەزىندە بولعان. زارداپ شەككەندەر تۋرالى اقپارات جوق. جالپى, تايۆان – تەكتونيكالىق قاۋىپتى ايماقتا ورنالاسقان ەل.
ينتەرنەت ماتەريالدارى نەگىزىندە ازىرلەندى.