سارسەنبى, 27 ناۋرىز 2013 1:47
ءوزىن ءوزى پرەزيدەنت دەپ جاريالادى
ورتالىق افريكا رەسپۋبليكاسىندا مەملەكەتتىك توڭكەرىس بولىپ, ناتيجەسىندە «سەلەكا» كوتەرىلىسشىلەر توبىنىڭ جەتەكشىسى ميشەل دجوتوديا ءوزىن ەلدىڭ جاڭا پرەزيدەنتى دەپ جاريالادى. سونداي-اق ول ءوز وكىمىمەن ەل كونستيتۋتسياسىنىڭ قىزمەتىن توقتاتتى جانە پارلامەنت پەن ۇكىمەتتى تاراتتى.
سارسەنبى, 27 ناۋرىز 2013 1:47
ءوزىن ءوزى پرەزيدەنت دەپ جاريالادى
ورتالىق افريكا رەسپۋبليكاسىندا مەملەكەتتىك توڭكەرىس بولىپ, ناتيجەسىندە «سەلەكا» كوتەرىلىسشىلەر توبىنىڭ جەتەكشىسى ميشەل دجوتوديا ءوزىن ەلدىڭ جاڭا پرەزيدەنتى دەپ جاريالادى. سونداي-اق ول ءوز وكىمىمەن ەل كونستيتۋتسياسىنىڭ قىزمەتىن توقتاتتى جانە پارلامەنت پەن ۇكىمەتتى تاراتتى.
«فرانس-پرەسس» اگەنتتىگىنىڭ حابارلاۋىنشا, م.دجوتوديا ورتالىق افريكا رەسپۋبليكاسى جاقىن ۋاقىتتا وتپەلى كەزەڭ كۇتىپ تۇرعانىن مالىمدەگەن. ءوزىن ءوزى پرەزيدەنت دەپ جاريالاعان ول وسى وتپەلى كەزەڭدە ەلگە ءوزىنىڭ جارلىقتارى ارقىلى جەتەكشىلىك ەتپەك. جاڭا پرەزيدەنت قىزمەتىن توقتاتقان ەل كونستيتۋتسياسى 2004 جىلدىڭ قاراشاسىندا قابىلدانعان ەكەن. ال بۇرىنعى پرەزيدەنت فرانسۋا بوزيزە كونگو دەموكراتيالىق رەسپۋبليكاسىنا قاشىپ كەتىپتى. بۇل ەلدە بيلىكتى كۇشپەن باسىپ الۋ جانە ازاماتتىق سوعىس ءجيى بولىپ تۇرادى.
سولتۇستىك كورەيا اقش-قا «سوققى» بەرمەك
سولتۇستىك كورەيانىڭ بۇقارالىق اقپارات قۇرالدارى كورەيانىڭ اقش-قا «سوققى» بەرۋ مۇمكىندىگىنە دايىندالىپ جاتقاندىعى تۋرالى حابارلاعان.
«فرانس-پرەسس» اگەنتتىگىنىڭ مەملەكەتتىك باسىلىمدارعا سۇيەنە وتىرىپ تاراتقان اقپاراتتارى بويىنشا, «سوققى» قۇراما شتاتتاردىڭ قۇرلىقتىق اۋماقتارىنا, سونداي-اق گاۆايا جانە گۋام ارالدارىنا جاسالاتىن كورىنەدى. وسىعان بايلانىستى كەشە كحدر بيلىگى ەلدىڭ قارۋلى كۇشتەرىن تولىق اسكەري دايىندىققا كەلتىرۋگە قاتىستى جيناعان. ونىڭ ىشىندە ارتيللەريالىق اسكەري بولىمدەر, ستراتەگيالىق ماقساتتاعى اسكەري قۇرامالاردىڭ دايىندىعى بار. بۇدان ءبىراز ۋاقىت بۇرىن سولتۇستىك كورەيا بيلىگى ينتەرنەتكە وڭتۇستىك كورەيامەن سوعىس تۋرالى ناسيحاتتىق روليكتى جاريالاعان بولاتىن.
كاددافيدىڭ وتباسى ەندى وماندا تۇرادى
ومان ۇكىمەتى ليۆيانىڭ بۇرىنعى باسشىسى مۋاممار كاددافيدىڭ وتباسىنا ساياسي باسپانا بەردى. جەرگىلىكتى باسشىلاردىڭ جازۋىنشا, ولار – كاددافيدىڭ جەسىرى سافي, قىزى ايشە, ەكى ۇلى گاننيبال مەن مۇحامماد.
بۇلار ديپلوماتيالىق پاسپورتتار العان, سونداي-اق ولاردىڭ بارلىق قاجەتتىلىكتەرى مەملەكەت ەسەبىنەن قامتاماسىز ەتىلەدى. كاددافيدىڭ وتباسى 2012 جىلدىڭ قازانىندا الجيردەن ومانعا كەلگەن ەكەن. بيلىك مۇنى قۇپيا جاعدايدا ۇستاپ, جاريا ەتپەپتى. ەندى ولار ساياساتپەن اينالىسپايدى, جۋرناليستەرمەن كەزدەسپەيدى. باسپانا بەرۋدە وسى جاعى باسشىلىققا الىنعان.
قاۋىپتى ۆيرۋسى بار امپۋلا جوعالدى
تەحاس شتاتىنىڭ گالۆەستون قالاسىنداعى عىلىمي-زەرتتەۋ زەرتحاناسىنىڭ باسشىلارى اسا قاۋىپتى گۋاناريتو ۆيرۋسىنىڭ امپۋلاسى جوعالعاندىعىن
حابارلادى.
CBC NEWS-ءتىڭ تاراتقان اقپاراتتارىنا قاراعاندا, قولدى بولعان امپۋلا ق ۇلىپتالعان توڭازىتۋ كامەراسىندا ساقتاۋلى تۇرعان. ونىڭ ۇرلانعانى تۋرالى جوسپارلى تۇگەندەۋ بارىسىندا بەلگىلى بولعان كورىنەدى. جوعالعانى جونىندە بىردەن ءتيىستى مەكەمەلەرگە حابارلانعان. بولمەدەگى قاۋىپسىزدىك جۇيەلەرى قانداي دا ءبىر بۇزۋشىلىقتى تىركەمەگەن, بولمەگە بوتەن ادامدار دا كىرمەپتى. زەرتحانا باسشىلىعى امپۋلا بولمەنى تازالاۋ كەزىندە كەزدەيسوق جاعدايدا سىنىپ, ول قوقىستارمەن بىرگە تاستالىنۋى مۇمكىن دەگەن بولجام جاساپ وتىر. ماماندار امپۋلاداعى ۆيرۋس بيولوگيالىق قارۋ رەتىندە پايدالانىلۋى مۇمكىن دەگەندى ايتادى.
سيريادان الىپ كەتۋگە ءماجبۇر بولدى
بۇۇ ءوز قىزمەتكەرلەرىنىڭ ءبىر بولىگىن سيريادان اكەتۋ جونىندە شەشىم قابىلدادى. بۇل تۋرالى ۇيىم وكىلى مارتين نەسيركي حابارلادى.
ونىڭ ايتۋىنشا, ازاماتتىق سوعىس ءجۇرىپ جاتقان بۇل ەلدەن بۇۇ قىزمەتكەرلەرىنىڭ جارتىسى, ياعني ءجۇز شەتەلدىك قىزمەتكەردىڭ ەلۋى شىعارىلادى. ۇيىم مۇنداي شەشىمگە 24-25 ناۋرىزدا داماسكىدە ۇيىم قىزمەتكەرلەرى ورنالاسقان قوناق ۇيگە جاقىن ماڭدا بىرنەشە مينا جارىلعاننان كەيىن كەلىپ وتىر. سونىڭ سالدارىنان بۇۇ-عا قاراستى عيمارات پەن اۆتوماشينالار زاقىمدانعان. ونىڭ ۇستىنە داماسكىنى اتقىلاۋ ۇدەپ بارادى.
ميحالكوۆ توراعالىققا قايتا سايلاندى
رەسەي كينەماتوگرافيستەر وداعىنىڭ ءىح سەزىندە باسىم داۋىسپەن باسقارما توراعالىعىنا نيكيتا ميحالكوۆ قايتا سايلاندى. رەسەي كينەماتوگرافيستەر وداعىنىڭ ءىح سەزى 21 ناۋرىز كۇنى وتكەن بولاتىن. وعان 499 دەلەگات قاتىستى.
سەزد شەڭبەرىندە رەسەي كينەماتوگرافيستەر وداعى باسقارما توراعاسىن قايتا سايلاۋ تۋرالى ماسەلە دە قارالعان ەدى. ال توراعالىققا كينەماتوگرافيا سالاسىنىڭ بەلگىلى وكىلدەرى ۇمىتكەرلىك تانىتتى. ولاردىڭ اراسىندا كينورەجيسسەر, رف حالىق ءارتىسى ۆاديم ابدراشيتوۆ, تەاتر جانە كينو اكتەرى, رەجيسسەر جانە كينودراماتۋرگ ۆلاديمير گرامماتيكوۆ بولدى. بىراق, جوعارىدا ايتىلعانىنداي, باسىم داۋىسپەن 4 جىلعا نيكيتا ميحالكوۆ قايتا سايلاندى.
قىسقا قايىرىپ ايتقاندا:
ەگيپەتتىڭ باس پروكۋراتۋراسى بەس ساياسي وپپوزيتسيا بەلسەندىلەرىن تۇتقىنداۋعا وردەر بەردى. ولاردى الەۋمەتتىك جۇيەلەر ارقىلى الاۋىزدىق تۋدىردى دەپ ايىپتايدى.
نيۋ-دجەرسي شتاتىنىڭ 44 جاستاعى تۇرعىنى پەدرو كەداسا لوتەرەيادان 338 ميلليون دوللار ۇتىپ الدى.
FITCH اگەنتتىگى كيپردىڭ ەكى ءىرى بانكىنىڭ رەيتينگىن دەفولتتىق دەڭگەيگە دەيىن تومەندەتتى.
ينتەرنەت ماتەريالدارى نەگىزىندە ازىرلەندى.