سارسەنبى, 13 ناۋرىز 2013 6:57
ۆاتيكاندا كونكلاۆ باستالدى
كەشە استانا ۋاقىتى بويىنشا 21.30-دا ۆاتيكاندا ريم پاپاسىن سايلاۋ ۇدەرىسىنىڭ ءى تۋرى باستالدى. وعان وتستاۆكاعا كەتكەن بەنەديكت ءحVى ۇسىنعان 67 كاردينال قاتىساتىن بولادى. ولاردىڭ جاسى 80-نەن اسپاعان بولۋى ءتيىس. جالپى, ۆاتيكاندا 115 كاردينال تىركەلگەن.
سارسەنبى, 13 ناۋرىز 2013 6:57
ۆاتيكاندا كونكلاۆ باستالدى
كەشە استانا ۋاقىتى بويىنشا 21.30-دا ۆاتيكاندا ريم پاپاسىن سايلاۋ ۇدەرىسىنىڭ ءى تۋرى باستالدى. وعان وتستاۆكاعا كەتكەن بەنەديكت ءحVى ۇسىنعان 67 كاردينال قاتىساتىن بولادى. ولاردىڭ جاسى 80-نەن اسپاعان بولۋى ءتيىس. جالپى, ۆاتيكاندا 115 كاردينال تىركەلگەن.
ساراپشىلار جەڭىسكە جەتەدى دەگەن ادامنىڭ اتىن ناقتى ايتا الماي وتىر. سوندىقتان كونكلاۆ ءبىرشاما ۋاقىتقا سوزىلۋى مۇمكىن. دەگەنمەن, جاڭا ريم پاپاسى وسى جۇمادان قالماي سايلانادى دەگەن دە پىكىرلەر بار. جانە ول العاش رەت ەۋروپالىق بولماۋى دا ىقتيمال دەلىنىپ وتىر. بۇگىندە يتاليا استاناسىندا ادام ءنوپىرى كوپ. قوناق ۇيلەردە ورىن تاپشى. بارلىعى جاڭا پاپانىڭ سايلانىپ, ۆاتيكان تەرەزەسىنەن كورىنۋىنە كۋا بولماق.
تاڭداۋ ۇلىبريتانياعا ءتۇستى
فولكلەند ارالدارىنىڭ تۇرعىندارى ءوز اۋماقتارىنىڭ ۇلىبريتانيادا قالۋى مارتەبەسىن ساقتاۋعا داۋىس بەردى. ارالداردىڭ ساياسي مارتەبەسىن ايقىنداۋعا بايلانىستى وتكىزىلگەن ەكى كۇندىك رەفەرەندۋم ناتيجەسى وسىنى كورسەتتى. داۋىس بەرگەندەردىڭ 98,8 پايىزى ۇلىبريتانيانىڭ قاراۋىندا قالعاندى ءجون كورەتىندىكتەرىن ءبىلدىردى.
قارسى داۋىس بەرگەندەر 3-اق ادام بولدى. داۋىس بەرۋگە قاتىسۋ 92 پايىزدى قۇرادى. ارالدا تۇراتىن داۋىس بەرۋگە قۇقىلى 1672 سايلاۋشىنىڭ رەفەرەندۋمعا 1517-ءسى قاتىستى. ناتيجە جاريا ەتىلگەننەن كەيىن ارالدىقتار وزدەرىنىڭ جەڭىستەرىن تويلاۋعا كىرىسىپ كەتتى. فولكلەند ارالدارىنا تالاسۋشى ەكىنشى جاق – ارگەنتينا تاراپى ارال تۇرعىندارى اراسىندا جۇرگىزىلگەن رەفەرەندۋمنىڭ زاڭدى كۇشى جوق دەپ سانايدى.
كيم چەن ىن سوققى ورنىن اتادى
وڭتۇستىك كورەيامەن ارادا جانجال تۋىنداعان جاعدايدا سولتۇستىك كورەيا ءبىرىنشى كەزەكتە سوققىنى سارى تەڭىزدەگى شاعىن عانا وڭتۇستىككورەيالىق پەننەندو ارالىنا بەرەدى. بۇل تۋرالى كەشە سولتۇستىك كورەيانىڭ باسشىسى كيم چەن ىن مالىمدەدى. ول كحدر ارتيللەريا اسكەرلەرىنىڭ شەكارا شەپتەرىنە بارعان بولاتىن.
بۇيرىق بەرىلگەننەن سوڭ ارتيللەرياشىلار پەننەندونى وتقا وراۋى ءتيىس. ال وتقا ورانعان جاۋ شەپتەرى سۋرەتكە ءتۇسىرىلىپ, ولار وڭتۇستىك كورەيانىڭ باسشىلىعىنا جىبەرىلۋى كەرەك, دەدى كيم چەن ىن. سونداي-اق, ول ارالداعى باسىم نىسانالار رەتىندە راديولوكاتسيالىق بەكەتتەردى, تەڭىز كەمەلەرىنە قارسى كەشەندەردى, رەاكتيۆتى مينومەتتەر مەن وزدىگىنەن جۇرەتىن گاۋبيتسالاردى اتادى. ءسويتىپ, كورەي تۇبەگىندەگى جاعداي ۋشىعا ءتۇستى.
قىسقا قايىرىپ ايتقاندا:
باكۋدە سولداتتاردىڭ ءولىمى كوبەيە تۇسۋىنە بايلانىستى نارازىلىق شەرۋى ۇيىمداستىرىلعان ەدى. وعان اسكەردە قىزمەت ەتىپ كەلگەندەر مەن بولاشاق سولداتتار كوپتەپ قاتىستى. بالالارى اسكەردە كوز جۇمعان اتا-انالار دا قولداۋ كورسەتتى. شەرۋ پوليتسيانىڭ كۇشىمەن توقتاتىلدى.
ۆەنەسۋەلا پرەزيدەنتىنىڭ مىندەتىن اتقارۋشى نيكولاس مادۋرو ءوزىنىڭ كانديداتۋراسىن رەسمي تۇردە ەل پرەزيدەنتتىگىنە ۇسىندى. ول قايتىس بولعان پرەزيدەنت ۋگو چاۆەستىڭ ءىزباسارى بولىپ تابىلادى.
رەسەي ليبەرال-دەموكراتتارىنىڭ سەركەسى ۆلاديمير جيرينوۆسكي «ادىلەتتى رەسەي» پارتياسىنان دەپۋتات دميتري گۋدكوۆتى «وتانىن ساتقان» دەپ ايىپتادى. د.گۋدكوۆ اقش-قا ساپار جاساپ, وندا رەسەيدى سىناعان تۇرعىدا ءسوز سويلەسە كەرەك.
كرەملدەگىلەردىڭ ەڭبەكاقىسى قانشا؟
رەسەي پرەزيدەنتى اكىمشىلىگى مەن ۇكىمەت اپپاراتى قىزمەتكەرلەرىنىڭ ەڭبەكاقىسى سوڭعى بىرنەشە ايدا ەكى ەسەدەن استامعا وسكەن. بۇل تۋرالى كەشە, ياعني 12 ناۋرىزدا «فوربس» جۋرنالىندا جاريالانعان ماقالادا ايتىلادى.
ەگەر دەپارتامەنت ديرەكتورى بۇعان دەيىن 125 مىڭ رۋبل (توقساندىق سىياقىنى قوسپاعاندا) الىپ كەلسە, 1 قاڭتاردان باستاپ 300-330 مىڭ رۋبل الاتىن بولعان. ۆيتسە-پرەمەردىڭ كومەكشىسى بۇرىنعى 70-90 مىڭنىڭ ورنىنا 190 مىڭ رۋبل الاتىن بولىپ وتىر. ءوزىنىڭ اكىمشىلىگى قىزمەتكەرلەرىنىڭ ەڭبەكاقىسىن كوتەرۋ تۋرالى جارلىققا رەسەي پرەزيدەنتى ۆلاديمير پۋتين ءۇشىنشى مەرزىمگە سايلانىسىمەن قول قويعان كورىنەدى.
رەمبراندتىڭ كارتيناسى تابىلدى
وسىدان جەتى جىل بۇرىن ۇرلانعان رەمبراندتىڭ «اكە پورترەتى» كارتيناسى سەربيادان تابىلعان. كارتينانى 2006 جىلى نوۆي-سادە مۋزەيىنەن ەكى بەلگىسىز ۇرلاپ كەتكەن بولاتىن. ەندى اتاقتى كارتينا بەلگرادتىڭ تۇبىندەگى سرەمسك-ميتروۆيتسا قاۋىمداستىعىنان تابىلىپ وتىر.
ۇرلىققا قاتىسى بار دەگەن 4 ادام قاماۋعا الىنعان. بىراق ولاردىڭ كىمدەر ەكەنى جانە ولارعا ايىپ تاعىلعانى نە تاعىلماعانى ازىرشە بەلگىسىز. كەزىندە مۋزەيدەن «اكە پورترەتىمەن» قاتار, رۋبەنستىڭ «سەنەكانىڭ ءولىمى», سونداي-اق, پەر فرانچەسكو مول مەن ءحVى عاسىرداعى بەلگىسىز سۋرەتشىنىڭ كارتينالارى دا ۇرلانعان ەدى. قالعان كارتينالار ازىرشە تابىلماي وتىر. بۇل جۇمىستاردىڭ جالپى باعاسى بىرنەشە ميلليون ەۋروعا باعالانادى. رەمبراندت اتالعان كارتيناسىن 1630 جىلى جازعان بولاتىن.
ساقتىق شارالارى قولعا الىنۋدا
بىشكەكتە بۇگىن ميتينگ ۇيىمداستىرىلادى. ونىڭ باستاۋشىلارى وپپوزيتسيا بولىپ وتىر. شارا تارتىپسىزدىكتەر مەن زورلىق-زومبىلىققا جانە ۇرلىق-قارلىققا ۇلاسپاس ءۇشىن الدىن الا ساقتىق شارالارى قاراستىرىلىپ جاتىر.
«ءبىز جۇمىلدىرۋ شارالارىن جۇزەگە اسىرىپ جاتىرمىز. ميتينگ كەزىندە بىشكەك كوشەلەرىن كۇزەتۋگە 1,5-2 مىڭ درۋجيننيك شىعاتىن بولادى», دەپ مالىمدەگەن بىشكەك قالالىق ىشكى ىستەر باسقارماسىنىڭ باسشىلىعىمەن كەزدەسۋى كەزىندە درۋجينالار كوشباسشىلارى. ميليتسيا تاراپىنان ءتارتىپ ساقتاۋعا شامامەن 100 ادام شىعارىلماق كورىنەدى. ال قالاداعى جالپى ءتارتىپتى 1,3 مىڭ ميليتسيونەر ساقتايتىن بولادى. شەرۋ ماقساتى – بيلىكتىڭ كەتۋىن تالاپ ەتۋ.
ينتەرنەت ماتەريالدارى
نەگىزىندە ازىرلەندى.