بۇگىندە توتەنشەلىكتەر وقىس وقيعانىڭ الدىن الۋعا تىرىسادى. ول ءۇشىن جوعارى ءورت قاۋپى تۋعان ايماقتاردا كەڭ اۋقىمدى رەيدتىك ءىس-شارالار وتكىزىلە باستادى.
- رەيدتەر جاعاجايلاردا, ورماندا, ساياجاي قاۋىمداستىقتارىندا, دەمالىس ايماقتارىندا وتكىزىلەدى. بولعان ءورتتى ءسوندىرىپ, ۇلكەن شىعىنعا باتقانشا, ونىڭ الدىن العان وڭاي ءارى ارزانعا تۇسەدى. رەيد كەزىندە ءبىز زاڭسىز وت جاعۋ فاكتىلەرىنىڭ الدىن الامىز, ءورت قاۋىپسىزدىگى جونىندە كەڭ اۋقىمدى ۇگىت-ناسيحات جۇمىستارىن جۇرگىزەمىز, - دەيدى نۇرلان سەيداحان ۇلى.
وسىنداي رەيدتىڭ بىرىندە ورال قالالىق تجب قىزمەتكەرى, ازاماتتىق قۇتقارۋ سالاسىنىڭ اعا لەيتەنانتى باقتيار قاتشەكوۆ كارەر سۋ قويماسىندا ازاماتشا ا.گۋباەۆانىڭ بوبەگىن اجالدان قۇتقارىپ قالدى. سونداي-اق توتەنشە جاعدايلار دەپارتامەنتى «جەدەل قۇتقارۋ جاساعى» كۇشتەرى تەرەڭ سۋعا كەتىپ قالا جازداعان 2009 جىلى تۋعان ا.ايتكەشەۆانى امان الىپ شىققان. بۇدان باسقا ورال قالالىق مادەنيەت جانە دەمالىس ساياباعىندا شاعان وزەنىندە ءجۇزۋ قۇرالىن پايدالانۋ ەرەجەسىن بۇزىپ, بەلگىلەنگەن نورمادان كوپ ادام وتىرعىزعان جانە قۇتقارۋ قۇرالدارىنسىز ادام تاسىمالداعان ەكى شاعىن كولەمدى كەمە انىقتالىپ, كولىك قۇرالى يەسىنە ايىپپۇل سالىندى.
وبلىس بويىنشا تابيعي ورتتەر مەن جانۋدىڭ الدىن الۋ جانە ءسوندىرۋ ءۇشىن 2759 ادامنان تۇراتىن ەرىكتى ورتكە قارسى 150 توپ قۇرىلعان. ەلدى مەكەندەردى 126 سۋ تاسىعىش, 367 تراكتور, 366 بەيىمدەلگەن تەحنيكا, 1758 اسپالى ءورت سوندىرگىش, 119 موتوپومپا جانە 1648 باسقا دا باستاپقى قۇرالدارمەن قارۋلانعان جاساقتار قورعايدى.
قازىرگى زاڭ تالاپتارى بويىنشا قوقىستى ورتەۋ – اكىمشىلىك قۇقىق بۇزۋشىلىق بولىپ سانالادى. جەرگىلىكتى پوليتسيا باسقارماسى مەن توتەنشەلىكتەر زاڭسىز وت جاققان, قوقىس ورتەگەن 93 جەكە تۇلعاعا قر اقبتك 336-بابى بويىنشا حاتتاما تولتىرىپ, 4 جەكە تۇلعاعا قر اقبتك 367-بابى بويىنشا 47 975 تەڭگە سوماعا ايىپپۇل سالىپتى.
ءتىلسىز جاۋمەن بەتپە بەت كەلىپ, تىرشىلىك يەسىن قۇتقارعان توتەنشەلىكتەردىڭ ەرلىگى قوعام نازارىنان تىس قالماعان. باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ باقتيار قاتشەكوۆكە العىس حات تابىس ەتتى.
باتىس قازاقستان وبلىسىندا جاسىل جەلەك – ورمان تاپشى. «وبلىستاعى ورمان جانە جانۋارلار دۇنيەسىن قورعاۋ جونىندەگى 8 مەملەكەتتىك مەكەمەدە ورمان-ءورت ستانتسيالارى اشىلدى. ولار ءورت قاۋپى كەزەڭىنىڭ باسىنان سوڭىنا دەيىن قىزمەت ەتەدى» دەيدى باتىس قازاقستان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ماحامبەت يحسانعالي.
وڭىردەگى ورمان شارۋاشىلىعى مەكەمەلەرى مەملەكەتتىك ورمان قورىنىڭ سانيتارلىق جاعدايىن جاقسارتۋ ماقساتىندا جىل سايىن قۋراعان اعاشتاردى سانيتارلىق كەسۋ شارالارىن جۇرگىزەدى. 2018 جىلى 446 گا اۋماقتىڭ 6000 م3 قۋراعان اعاشى كەسىلسە, بيىل جىل باسىنان بەرى 170,4 گا اۋماق 1505 م3 قۋ اعاشتان تازارتىلعان.