سەنبى, 27 ءساۋىر 2013 2:27
«…سەسسيالاردىڭ بىرىندە مەن پاراحات حادجيمەتوۆاعا «بىرلىك» مەدالىن تاپسىردىم. ول 67 جاستا, 10 گەكتار جەرگە باۋ-باقشا سالىپ, وسىنىڭ ەسەبىنەن بالالار ۇيىنە 156 بالانى وسىرۋگە كومەكتەسىپ ءجۇر! بۇل ناعىز پاتريوت! ءبىز وسىندايلارعا كومەكتەسۋگە ءتيىسپىز! بۇل بارشا ءۇشىن ۇلگى!»
سەنبى, 27 ءساۋىر 2013 2:27
«…سەسسيالاردىڭ بىرىندە مەن پاراحات حادجيمەتوۆاعا «بىرلىك» مەدالىن تاپسىردىم. ول 67 جاستا, 10 گەكتار جەرگە باۋ-باقشا سالىپ, وسىنىڭ ەسەبىنەن بالالار ۇيىنە 156 بالانى وسىرۋگە كومەكتەسىپ ءجۇر! بۇل ناعىز پاتريوت! ءبىز وسىندايلارعا كومەكتەسۋگە ءتيىسپىز! بۇل بارشا ءۇشىن ۇلگى!»
ەلباسىمىز, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ «قازاقستان-2050» ستراتەگياسى: ءبىر حالىق – ءبىر ەل – ءبىر تاعدىر» تاقىرىبىندا وتكەن قازاقستان حالقى اسسامبلەياسىنىڭ مەرەيتويلىق حح سەسسياسىندا وڭتۇستىكتەن شىققان وسىناۋ ەڭبەكقور ايەلدى, كوپبالالى انانى وسىلايشا ايرىقشا اتاپ ءوتتى. شىنىندا وڭتۇستىك جۇرتى پاراحات اپايدى وتە جاقسى تانيدى. ول كىسى ەلگە ىسكەرلىك قاسيەتىمەن, ادال ەڭبەگىمەن, باۋىرمال جۇرەگىمەن, قايىرىمدىلىق ىستەرىمەن كەڭىنەن تانىمال.
– كەي كەزدەرى بالالارىم «اپا, قارتايدىڭىز, ەڭبەك ەتۋدى قويىڭىز, تىپ-تىنىش, جايباراقات ءومىر سۇرسەڭىزشى» دەگەندى ايتادى, – دەيدى بىزبەن اڭگىمەسىندە پاراحات حادجيمەتوۆا. – مەن وسى ەڭبەكپەن كوركەيدىم, وسى ەڭبەكتىڭ ارقاسىندا ابىروي جينادىم. ەندەشە, كۇش-قۋاتىم باردا قالايشا ەڭبەكتەن قول ۇزەمىن؟! ارينە, بالالارىم ماعان جانى اشىعاندىقتان ايتادى. بىراق, مەن ەڭبەكپەن ەگىز ءوستىم. ەڭبەك ەتۋدەن ءلاززات الامىن. بۇگىندە سايرام اۋدانىنداعى قارامۇرت اۋىلىندا 13 گەكتار جەرىم بار. باۋ-باقشا ەككەنبىز. 3 جىل بولدى, الما باعىم جاقسى ءونىم بەرىپ جاتىر. اللا قالاسا, بيىل دا ءونىم مول بولاتىن ءتۇرى بار. ەڭ باستىسى – ادامنىڭ پەيىلىندە. مەن ەككەن الما باعى بارىنە جەتەدى, ساتۋعا دا, داستارقانعا قويۋعا دا, جەتىم-جەسىرلەرگە تاراتىپ بەرۋگە دە. ودان بولەك, قارامۇرتتا 40-50 جىلقى مالىن باعىپ وتىرمىز.
وسى سايرام اۋدانىنداعى جەتىم بالالار ۇيىنە كوپ جىلدان بەرى دەمەۋشى بولىپ كەلەمىن. قولىمنان كەلگەنىنشە وسى ۇيدە تاربيەلەنىپ جاتقان بالالاردىڭ جوق-جىتىگىن تۇگەندەپ جۇرەمىن. كومپيۋتەر, باسقا دا كەرەك-جاراقتارىن اپەردىم. قازىر مەن دەمەۋشىلىك كورسەتكەن, ياعني وسى بالالار ۇيىندە مەكتەپتى ۇزدىك بىتىرگەن ەكى بالامنىڭ بىرەۋى امەريكادا, بىرەۋى استانادا جوعارى ءبىلىم الىپ ءجۇر. استاناداعىسى وتكەن جازدا امەريكادا ءىس-تاجىريبەدەن ءوتىپ كەلدى. ولاردى ۇنەمى دەمەپ, جاردەم كورسەتىپ وتىرامىن. بۇدان باسقا تۇرمىسى ناشار وتباسىلارعا, مەشىتتەرگە قارايلاستىم.
15 مارتە قاجىلىققا باردىم. ءار بارعان سايىن شىن نيەتىممەن اللادان ەلىمىزدىڭ, پرەزيدەنتىمىزدىڭ اماندىعىن تىلەيمىن. ەلباسىمىز شىن مانىندە اللانىڭ نۇرى جاۋعان ادام. سول كىسىنىڭ ساليقالى ساياساتىنىڭ ارقاسىندا بۇگىندە قازاقستاندى الەم تانىدى. ەلباسى نەبىر قيىندىقتار مەن سىناقتاردى ەڭسەرىپ, ەلدى ىلگەرىلەۋ مەن وركەندەۋ جولىنا ابىرويمەن الىپ شىقتى. قۋاتتى ەكونوميكاسى, سەرپىندى ساياسي جۇيەسى بار ەلمىز. ەڭ باستىسى – بۇگىنى مەن ەرتەڭى جارقىن. قازاقستاننىڭ ەلى دە, جەرى دە باي. كوڭىلى دارقان. بىزگە قازىر ءبىر-اق نارسە كەرەك. ول – اۋىزبىرلىك. ەگەر تاتۋلىق, ىنتىماق, بىرلىك بولسا, بەرەكە دە, مەرەكە دە كوپ. بىرىگىپ ەڭبەك ەتكەندە عانا ناتيجەلى ىستەرگە قول جەتكىزەمىز.
جازىپ العان
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.