اتالعان اۋداننىڭ قازاق حالقى شوعىرلانعان گاگارين اۋىلىنداعى وزبەك-قازاق مادەنيەت ورتالىعىندا سالتاناتتى قارسى الۋ شاراسى ءوتىپ, جيزاق وبلىستىق مادەنيەت باسقارماسىنىڭ باسشىسى كامول فاحرادوۆ كەلگەن قوناقتارعا ىستىق لەبىزىن ءبىلدىردى. جامبىل وڭىرىنەن دوستىق دەلەگاتسياسىن باستاپ بارعان جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ ءىس-شارانىڭ ماڭىزدىلىعىنا توقتالىپ, ەكى ەل اراسىنداعى جۇزەگە اسىپ جاتقان يگى باستامالاردىڭ ارى قاراي جالعاسىن تاباتىنىنا سەنىم ءبىلدىردى.
اۋليەاتالىق ونەرپازدار كەزدەسۋ بارىسىندا الا شاپاندى اعا يىندارعا قازاق ونەرىن ناسيحاتتادى. كەنەن ازىرباەۆ اتىنداعى جامبىل وبلىستىق فيلارمونياسىنىڭ «الاتاۋ» فولكلورلىق ءانسامبلى امان مالدىباەۆتىڭ «كونە تاراز», ءابدىمومىن جەلدىباەۆتىڭ «ەركە سىلقىم» كۇيلەرىن ورىنداسا, مادەنيەت سالاسىنىڭ ۇزدىكتەرى وڭال ازاماتوۆا, جاندوس وماروۆ جانە دينارا ديحانباەۆا حالىق اندەرى مەن جەرگىلىكتى كومپوزيتورلاردىڭ اندەرىن شىرقادى. سونىمەن قاتار, سارىسۋ اۋداندىق «ايجان قىز» حالىقتىق بي ءانسامبلى بيدەن شاشۋ شاشتى. ال, جۋالى اۋداندىق حالىق تەاترى باقىت بەدەلحاننىڭ «تاعدىر تاقتاسى» اتتى ءاسانالى ءاشىموۆتىڭ ءومىر تاريحىنا قۇرىلعان پوەتيكالىق دراماسىن ۇسىندى. ساپار بارىسىندا جامبىلدىق ونەر شەبەرلەرى جيزاقتىقتارعا شەبەرلىك ساعاتتارىن وتكىزىپ, تاجىريبە الماستى. شارا سوڭىندا ءمىرزاچول اۋدانىنا ساياحات ۇيىمداستىرىلدى. سونىمەن قاتار, جامبىلدىق دەلەگاتسيا جەرگىلىكتى قازاقتارمەن دە كەزدەسىپ, قاريالاردىڭ باتاسىن الدى. جيزاق وبلىسى بويىنشا قازاق مادەني ورتالىعىنىڭ توراعاسى وتەپ سەدامانوۆقا اۋليەاتا جەرىنەن ەستەلىك رەتىندە شىعارماشىلىق ارىپتەستەرى سىي-سياپات كورسەتتى. سونداي-اق, جامبىلدىقتار وزبەكستان رەسپۋبليكاسىنىڭ تاشكەنت قالاسىندا دا بولىپ, جامبىل وبلىستىق كينو ورتالىعى «جاۋجۇرەك مىڭ بالا», «ءبىزدىڭ قالانىڭ حانزاداسى» اتتى كوركەم جانە «مۇزبالاق» انيماتسيالىق فيلمدەرىنىڭ كورسەتىلىمىن ۇيىمداستىردى.
ەكى ەلدىڭ مادەنيەت وكىلدەرىنىڭ كەزدەسۋى بارىسىندا جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ پەن جيزاق وبلىسى اكىمىنىڭ ورىنباسارى ازيزبەك ەگامبەرديەۆ, وبلىستىق مادەنيەت باسقارماسىنىڭ باسشىسى كامول فاحرودوۆ باۋىرلاس ەكى ەل اراسىنداعى جۇزەگە اسىپ جاتقان يگى ءىس-شارالار عاسىرلار بويى ۇزىلمەي كەلە جاتقان مادەني بايلانىستى ودان ءارى نىعايتا تۇسەتىنىنە سەنىم بىلدىرە وتىرىپ, جامبىلدىق دەلەگاتسياعا قاسيەتتى مەككە قالاسى مەن وزبەكستاننىڭ عاجايىپ تابيعاتى سۋرەتتەلگەن ساعاتتارىن سىيعا تارتتى. ءوز كەزەگىندە اۋليەاتالىقتار دا جامبىل وبلىسى اكىمدىگىنىڭ اتىنان ءوڭىر شەبەرلەرىنىڭ قولىنان شىققان جامبىل جاباەۆتىڭ بەينەسى ورنەكتەلگەن كىلەمشە جانە «كونە تاراز» كارتيناسىن تابىس ەتتى.
سونىمەن قاتار, اۋليەاتالىق دەلەگاتسيا جيزاق وبلىسىنىڭ تاريحي-مادەني ورىندارىن دا تاماشالادى. سامارقاند قالاسىندا ورنالاسقان «رەگيستان» الاڭى, ءامىر تەمىر مەن بيبي حانۋم كەسەنەلەرى, مىرزا ۇلىقبەك وبسەرۆاتورياسى, «شاحين-زيندا» جانە «حازىرەت قىزىر» مەموريالدى كەشەنى جانە تاعى باسقا دا ەسكەرتكىشتەرگە ەكسكۋرسيا جاسادى. سوڭىندا فارىش اۋدانىندا وزبەك ونەرپازدارىنىڭ كونتسەرتى ۇيىمداستىرىلدى.