استانا قالاسى ءبىلىم باسقارماسى مەن №2 ونەر مەكتەبى ۇيىمداستىرۋىمەن وتكەن مادەني ءىس-شارا سونىمەن قاتار جاستار جىلى مەن حالىقارالىق بالالاردى قورعاۋ كۇنىنە ورايلاستىرىلدى. بۇل جوبانىڭ ەڭ باستى ەرەكشەلىگى – كوپ بالالى جانە از قامتىلعان وتباسىلارعا بالالار ونەرىن تەگىن تاماشالاۋعا مۇمكىندىك تۋعىزدى.
بۇگىندە ەلوردا برەندى سانالاتىن «اينالايىن» بالالار حورى يليا اۆەربۋحتىڭ «مۇز ايدىنداعى شوۋ», VII قىسقى ازيادا ويىندارىنىڭ اشىلۋ سالتاناتى سياقتى مەملەكەتتىك اۋقىمدى مادەني ءىس-شارالاردىڭ وتۋىنە اتسالىسقان بەدەلدى دە بىرەگەي ونەر توبى بولىپ تابىلادى.
تاريحى قوستاناي قالاسىنان باستاۋ الاتىن «اينالايىن» بالالار حورىنىڭ ماقساتىنا كەلسەك, ولار نەگىزىنەن قازاق تىلىندەگى بالالارعا ارنالعان اۆتورلىق اندەردى ورىندايدى. وعان «ۇزدىك مۇعالىم-2006» بايقاۋىنىڭ باس جۇلدەگەرى, ى.التىنسارين اتىنداعى, «مادەنيەت سالاسىنىڭ ۇزدىگى» جانە «ادال تۇلعا» مەدالدەرىنىڭ يەگەرى, №2 ونەر مەكتەبىنىڭ ديرەكتورى گۇلميرا جانگەلدىقىزى جەتەكشىلىك ەتەدى.
كەش پرەزيدەنتتىڭ ەسترادالىق-سيمفونيالىق وركەسترى سۇيەمەلدەۋىمەن ءوتتى. اينالايىندىقتار جاندى داۋىستا ءان سالدى. كورەرمەندەرگە ۇجىم تۋرالى 10 مينۋتتىق دەرەكتى فيلم كورسەتىلىپ, 20 جىل بۇرىنعى كەزەڭگە شولۋ جاسالدى. رەسەيلىك «گولوس. دەتي» تەلەجوباسىنىڭ جەڭىمپازى ەرجان ماكسيم قوناق رەتىندە قاتىستى. سونىمەن قاتار مەرەيتويمەن ارنايى قۇتتىقتاپ كەلگەن حوردىڭ 2001 جانە 2015 جىلعى تۇلەكتەرى ءان سالدى. كونتسەرتتە جاڭا اۆتورلىق اندەر ورىندالدى, تانىمال انشىلەر ونەر كورسەتتى.
بىلتىر يسپانيانىڭ لورەت-دە-مار قالاسىندا ۇيىمداستىرىلعان حالىقارالىق «Fiestalonia – Mediterranean Legends» بايقاۋىندا جەتى مەملەكەتتەن كەلگەن جەتكىنشەكتەر اراسىندا وزىق ونەر كورسەتىپ, ءبىرىنشى ورىندى يەلەندى. ال بيىل ەلباسى قاتىسۋىمەن وتكەن جاستار جىلىن جاريالاۋ سالتاناتىندا ولار ەسترادا جۇلدىزدارىمەن بىرگە «ەلىم مەنىڭ» (ن.نازارباەۆ, ب.تىلەۋحانوۆ) ءانىن شىرقادى. بۇگىندە «اينالايىن» بالالار حورىنا ارنايى جازىلعان اندەر قازاق راديوسىنىڭ «التىن قورىنا» ەنىپ, ورىندالىپ ءجۇر.
قارشىعا كۇلەن