سونىمەن قاتار اۋدانعا ينۆەستيتسيا تارتۋ, بيزنەستىڭ الەۋمەتتىك جاۋاپكەرشىلىگىن ارتتىرۋ سياقتى ماسەلەلەر دە ۇدايى نازاردا. اسىرەسە ميرنىي, مىڭارال اۋىلدارىنداعى ءتىرشىلىك اۋداننىڭ اگرارلىق-ءوندىرىستىك وڭىرگە اينالىپ وتىرعانىن كورسەتەدى.
مول بايلىقتى ءتيىمدى پايدالانۋ دا قازىناعا كەنەلتەدى. بۇل ورايدا ءناسىبىن كاسىپتەن ىزدەگەن مويىنقۇمدىقتار ءوندىرىس ءورىسىن كەڭىتۋگە كۇش سالۋدا. مويىنقۇم اۋدانىنىڭ اكىمى مادەن مۇساەۆتىڭ ايتۋىنشا, جەرگىلىكتى مول شيكىزات قورى ۇقساتىلىپ, وڭدەلىپ, دايىن ءونىم تۇرىندە كوپتەپ شىعارىلۋدا ەكەن. ماسەلەن, «ورگستروي» جاۋاپكەرشىلىگى شەكتەۋلى سەرىكتەستىگىنىڭ جارىلىس بلوكتارى ءوندىرىسىنىڭ جاڭا تەحنولوگياسىن قولدانۋ ارقىلى گرانيت ءوندىرۋ مەن وڭدەۋ ءىسىن جولعا قويىپ وتىرعانىن ايتساق بولادى. اتالعان زاۋىتتا بورديۋر, گرانيت تاقتاتاس, توسەمدەر شىعارىلىپ, ءونىمنىڭ نەگىزگى بولىگى نۇر-سۇلتان جانە الماتى قالالارىنا جونەلتىلەدى. اتالعان زاۋىتتىڭ ەڭبەكتى قورعاۋ جانە ەڭبەك قاۋىپسىزدىگى جونىندەگى ينجەنەرى دۋلات جايناقباەۆ كاسىپورىن بۇگىندە 86 ادامدى تۇراقتى جۇمىسپەن قامتىپ وتىرعانىن, زاۋىتتا وتكەن جىلى 707 ميلليون تەڭگەنىڭ 66 مىڭ شارشى مەتر گرانيت ءونىمى وندىرىلگەنىن ايتتى. «ەكى جىل بۇرىن زاۋىتتىڭ ەكىنشى بلوگىن ىسكە قوسقانبىز. وسىعان بايلانىستى وتكەن جىلعى تابىس كولەمى ەداۋىر كوبەيدى. الداعى ۋاقىتتا دا كاسىپورىننىڭ قۋاتىن ەسەلەي تۇسۋگە جۇمىس ىستەيمىز», دەيدى ول.
بۇگىندە اۋداننىڭ ەكونوميكالىق دامۋىنا ۇلەس قوسىپ وتىرعان مىڭارال اۋىلىندا ورنالاسقان بالىق زاۋىتى. كاسىپورىن جىل سايىن 1,5 مىڭ توننا بالىق ونىمدەرىن وندىرە الادى. بىراق زاۋىت ءالى كۇنگە دەيىن تولىق قۋاتىندا جۇمىس ىستەپ تۇرعان جوق. دەسە دە, بالىق زاۋىتى جەرگىلىكتى حالىقتىڭ ءال-اۋقاتىن ارتتىرۋعا سەپتەسۋدە. شيكىزات تاپشىلىعى مىڭارال زاۋىتىندا دا بار. ماسەلەن, 2017 جىلى 853 توننا بالىق ءونىمى وندىرىلسە, وتكەن جىلى ءونىم 597 توننا كولەمىندە عانا ورىندالىپتى. بۇل رەتتە مەكەمە باسشىلىعى جەرگىلىكتى جەردەگى بالىق اۋلايتىن ايدىنداردىڭ كولەمى ۇلعايتىلىپ, جەڭىلدىك قاراستىرىلۋى كەرەگىن ايتادى. مۇندا بۇگىندە 50-گە تارتا ادام تۇراقتى جۇمىسپەن قامتىلعان بولسا, ونىڭ ىشىندە 41 ازامات جەرگىلىكتى تۇرعىندار.
اۋليەاتا وڭىرىندەگى الىپ ءوندىرىس وشاقتارىنىڭ بىرىنەن سانالاتىن جامبىل تسەمەنت ءوندىرىستىك كومپانياسى دا مويىنقۇم اۋدانىنىڭ اۋماعىندا ورنالاسقان. اتالعان كاسىپورىن جىلىنا 1500 توننا ءونىم شىعارادى. «اتالعان ءوندىرىس وشاعى ءوتكەن جىلى بۇرىن-سوڭدى بولماعان رەكوردتىق كورسەتكىشكە قول جەتكىزىپ, وندىرگەن ءونىم كولەمى زاۋىت قۋاتىنان الدەقايدا اسىپ تۇسكەن. جۋىردا عانا اۋىل تۇرعىندارىمەن جانە زاۋىت ۇجىمىمەن كەزدەسىپ, ءوندىرىستى ودان ءارى ارتتىرۋدىڭ جايىن تالقىلادىق», دەيدى اۋدان اكىمى مادەن مۇساەۆ.
وتكەن جىلى مۇندا M400 جانە M400D ماركالى 1542 توننا تسەمەنت ءوندىرىلىپتى. سونىمەن قاتار اتالعان كاسىپورىن بۇگىندە تولىق اۆتوماتتاندىرىلعان ديسپەتچەرلىك باسقارۋ جۇيەسىنە كوشىرىلىپ, قازىر بۇل جەردە 255 ادام تۇراقتى جۇمىسپەن قامتىلىپ وتىر. ەندىگى جەردە اۋدان اكىمدىگى مەن زاۋىت باسشىلىعى تاراپىنان ءوندىرىس جۇمىسشىلارىنا قولايلى جاعدايلار جاسالىپ, ءتۇرلى الەۋمەتتىك كومەكتەر كورسەتىلەتىن بولادى.