قاراعاندى وبلىستىق قازاقستان حالقى اسسامبلەياسىنىڭ باستاماسىمەن دۇنيەگە كەلگەن كلۋبتىڭ از عانا ۋاقىت ىشىندە تۇرعىندار اراسىندا تانىمالدىعى ارتىپ, مەملەكەتتىك ءتىلدى مەڭگەرۋگە نيەت بىلدىرگەن ءتۇرلى ەتنوس وكىلدەرىنىڭ زور قىزىعۋشىلىعىن تۋدىرىپ وتىر دەپ سەنىممەن ايتۋعا بولادى.
بۇل جەرگە كەلىپ, ءتىلدى مەڭگەرگۋگە دەن قويعان جانداردىڭ دەڭگەيى ءارتۇرلى: ولاردىڭ اراسىندا ستۋدەنتتەر دە, زەينەتكەرلەر دە, بيزنەسمەندەر دە, كەڭسە قىزمەتكەرلەرى دە بار.
ءتىل ۇيرەتۋ بارىسىندا بەلگىلى عالىم قانات تاسىبەكوۆتىڭ «سيتۋاتيۆنىي كازاحسكي» اتتى ادىستەمەلىك قۇرالى باسشىلىققا الىندى. اۆتور ءاۋ باستا ءوزىنىڭ انا ءتىلىن بىلمەگەن. ۋاقىت وتە كەلە سانا-سەزىمى ويانىپ, قازاق ءتىلىن ءوز بەتىنشە ۇيرەنەدى دە, وسى كىتاپتى جازىپ شىعادى. كەيىننەن ءوزىنىڭ اۆتورلىق ادىستەمەسىن ويلاپ تاۋىپ, ونى كلۋبتاعى دارىستەرىندە پايدالانا باستاعان. اتالعان ادىستەمە ۇلتتىق مەنتاليتەتتىڭ ەرەكشەلىكتەرى, تاريحي فاكتىلەر, فولكلورلىق ۇعىمدار, قازاق حالقىنىڭ قۇندىلىقتار جۇيەسى ارقىلى ءتىلدى مەيلىنشە جەڭىل ءارى جەتىك وقۋعا مۇمكىندىك بەرەدى.
سونىمەن قاتار, كلۋبتىڭ ءاربىر وتىرىسىنا ەسىمدەرى ەلگە تانىس قوعام قايراتكەرلەرىن, زيالى قاۋىم وكىلدەرىن شاقىرۋ ادەمى داستۇرگە اينالىپ كەلەدى. العاشقى كەزدەسۋدىڭ سپيكەرى رەتىندە پوليگلوت, نۇر-سۇلتان قالاسىنداعى «مامىلە-تەن» كلۋبىنىڭ ۇيىمداستىرۋشىسى ۆلاديسلاۆ تەن شاقىرىلعان بولاتىن. سونداي-اق, «ناتيجە» كومپانياسىنىڭ باسشىسى ەرلان ءاشىم, SBTC تىلدەر مەكتەبىنىڭ نەگىزىن قالاۋشى سەرگەي زورين, قوعام قايراتكەرى باقىتقالي مۇسابەكوۆ سىندى ءتىل جاناشىرلارى دا كەلىپ قاتىسىپ, ءوز ويلارىن ورتاعا سالدى.
مۇندا كەلۋشىلەرگە سۇحبات كلۋبى نەسىمەن ۇنايدى دەگەنگە كەلسەك, ەڭ الدىمەن بۇل جەردەگى ءدارىس دوستىق جانە بەيرەسمي جاعدايدا ءوربيدى. سونان سوڭ, كلۋبتا ويىن فورماتتارى ءجيى قولدانىلادى. ەكىنشىدەن, تالقىلاۋعا ارنالعان قىزىقتى جانە وزەكتى تاقىرىپتار, سايكەسىنشە پايدالى ءسوز تىركەستەرى مەن سويلەۋ اينالىمدارىن قولدانۋ ءتىل ۇيرەنۋشىلەردى بىردەن وزىنە ء ۇيىرىپ اكەتەدى. ۇشىنشىدەن, بۇل – تاجىربيە. ساباق بارىسىندا ءارتۇرلى ينتوناتسيالاردى, قارىم-قاتىناس مانەرىن قابىلداۋعا ۇيرەنىپ, اۋىزەكى سويلەسۋگە مۇمكىندىك بار. وزگە ەتنوستاردىڭ قازاق داستۇرلەرىن ۇيرەنۋ ارقىلى ۇلتىمىزدىڭ مول مۇراسىمەن تانىسۋعا تولىققاندى جاعداي جاسالعان.
سونىمەن قاتار, اتالعان كلۋب قارىم-قاتىناس نەگىزىندە, ويىن تۇرلەرىن قولدانا وتىرىپ, قازاق اندەرىن جاتتاۋعا جانە كۇندەلىكتى تۇرمىستا قولداناتىن ديالوگتارعا باسا نازار اۋدارادى.
كەنشىلەر استاناسىنداعى «دوستىق ۇيىندە» ورنالاسقان «مامىلە» سۇحبات كلۋبىنداعى كەزدەسۋلەردىڭ ءار اپتا سايىن وتەتىنىن جانە ونىڭ تەگىن ەكەنىن دە ايتا كەتكەن ءجون.