ورال قالاسىنداعى «باتىس» وڭىرلىك قولباسشىلىعى جانە 5517 اسكەري ءبولىمىنىڭ ۇلتتىق ۇلان جاۋىنگەرلەرى 9 مامىر كۇنى ۇلى جەڭىستىڭ 74 جىلدىق مەرەكەسىن قارسى الىپ وتىرعان ەڭ قارت جاۋىنگەر سەمەن اكيموۆيچ دانيلينگە توسىنسىي جاسادى. قاريا تۇراتىن كوپقاباتتى ءۇيدىڭ الدىنا ۇلتتىق ۇلان وفيتسەرلەرىنىڭ بالالارى جانە اسكەري ءبولىمنىڭ ۇرمەلى اسپاپتار وركەسترى كەلىپ, «پرودەدۋشكا» ءانىن شىرقاي جونەلدى. بۇدان كەيىن سوعىس جىلدارىنىڭ ايگىلى «كاتيۋشا», «مارش, سلاۆيانكي!» جانە «دەن پوبەدى!» اندەرىن جينالعان كوپشىلىك قوسىلا ايتتى. قارت جاۋىنگەردىڭ ءوزى دە بۇل كەزدە وڭىرىنە وردەن-مەدال تولى سارباز فورماسىن كيىپ, اۋلاعا شىققان ەدى. حالىق تا جينالىپ, بالالار اۋلاعا تولىپ كەتكەن. ساپ تۇزەپ, جورىق جىرىن شىرقاعان جاۋىنگەرلەرگە كىشكەنتاي بالالار شاتتانا قوسىلىپ, اياقتارىن تاق-تۇق باسادى. اينالاسى ءاپ-ساتتە ءتۇرلى سىيلىققا, قۇشاعى گۇلگە تولعان سەمەن دانيلين مۇنداي توسىنسىيدى كۇتپەگەنىن ايتىپ, كوزىنە جاس الدى.
«باتىس» وڭىرلىك قولباسشىسىنىڭ ورىنباسارى پودپولكوۆنيك باقىت الازوۆ قارت جاۋىنگەردى ۇلى مەرەكەمەن شىن جۇرەكتەن قۇتتىقتاپ, ارقاشان ساپتان شىقپاي, ساۋ-سالامات بولۋىن تىلەدى.
- ءبىزدىڭ ەلىمىزدىڭ ءاربىر ازاماتى جارتى الەمدى شارپىعان سوعىس جىلدارىنىڭ قايعى-قاسىرەتىن جاقسى بىلەدى. سول ءبىر ۇلى وتان سوعىسىندا وشپەس ەرلىك كورسەتىپ, مايدان مەن تىلدا قانى مەن تەرىن توككەن اعا ۇرپاقتىڭ تاباندىلىعى مەن جانقيارلىعىن ءبىز ەشقاشان ۇمىتپايمىز. سىزدەر تاعدىردىڭ اۋىر سىنىنان سۇرىنبەي ءوتىپ, كەلەشەك ۇرپاقتىڭ بوستاندىعى ءۇشىن كۇرەستىڭىزدەر! الەمدى فاشيزمنەن قورعاپ قالدىڭىزدار! – دەپ اتاپ ءوتتى ءوز سوزىندە باقىت ماعاۋ ۇلى.
«باتىس» وڭىرلىك قولباسشىلىعى ارداگەرلەر كەڭەسىنىڭ اتىنان ءسوز العان زاپاستاعى پودپولكوۆنيك باقىتجان بەرديەۆ تە ارداگەرگە سىي-سياپات ۇسىندى.
بۇگىندە ەلىمىزدەگى كوزى ءتىرى ەڭ قارت مايدانگەردىڭ ءبىرى سەمەن دانيلين كۋرس وبلىسىندا دۇنيەگە كەلگەن ەكەن. بريانسك اسكەري-ساياسي ۋچيليششەسىندە وقىعان ول 1942 جىلى ۇرىسقا كىرىپ, ستالينگراد, كۋرس دوعاسى, دنەپر شايقاستارىنا قاتىسقان. ۋكراينا مەن پولشانى ازات ەتكەن جاۋىنگەر جەڭىستى كەنيگسبەرگتە قارسى الىپتى. سوعىستان كەيىن ىشكى اسكەر قاتارىندا الماتى, قاراعاندى قالالارىندا قىزمەت ەتىپ, پولكوۆنيك شەنىندە قۇرمەتتى دەمالىسقا شىققان. «قىزىل جۇلدىز», ءىى دارەجەلى «وتان سوعىسى» وردەندەرىمەن, «ۇرىستاعى ەرلىگى ءۇشىن», «ستالينگراد قورشاۋى ءۇشىن», «گەرمانيانى جەڭگەنى ءۇشىن» مەدالدارىمەن ماراپاتتالعان ارداگەر بەيبىت كۇندە دە ءتۇرلى ماراپاتقا يە بولعان.
باتىس قازاقستان