سەيسەنبى, 21 مامىر 2013 0:44
بۇرىنعى ءتارتىپ ساقشىلارىن وسىنداي جاعدايعا ۋشىقتىرعان وقيعا قاراعاندىدان الىس ەمەس توپار كەنتىندە ورىن العان بولاتىن. ءتۇن ورتاسىنا تامان دۇكەندەردىڭ بىرىنە كىرگەن ەكى پوليتسەي ساتۋشىنىڭ جاسوسپىرىمگە ءسپيرتتى ىشىمدىككە جاتاتىن دجين-تونيكتى ساتىپ تۇرعانىن بايقاپ قالادى. ارتىنان ولار 500 دوللار پارا بەرىلسە, بۇل ارەكەتتىڭ اشكەرەلەنبەي جىلى جابىلاتىندىعىن سەزدىرەدى. دۇكەنشى ەكەۋىنىڭ تەرىس قىلىققا ەرىكسىز بوپسالاۋىن ءتيىستى ورىندارعا ءمالىم ەتەدى.
سەيسەنبى, 21 مامىر 2013 0:44
بۇرىنعى ءتارتىپ ساقشىلارىن وسىنداي جاعدايعا ۋشىقتىرعان وقيعا قاراعاندىدان الىس ەمەس توپار كەنتىندە ورىن العان بولاتىن. ءتۇن ورتاسىنا تامان دۇكەندەردىڭ بىرىنە كىرگەن ەكى پوليتسەي ساتۋشىنىڭ جاسوسپىرىمگە ءسپيرتتى ىشىمدىككە جاتاتىن دجين-تونيكتى ساتىپ تۇرعانىن بايقاپ قالادى. ارتىنان ولار 500 دوللار پارا بەرىلسە, بۇل ارەكەتتىڭ اشكەرەلەنبەي جىلى جابىلاتىندىعىن سەزدىرەدى. دۇكەنشى ەكەۋىنىڭ تەرىس قىلىققا ەرىكسىز بوپسالاۋىن ءتيىستى ورىندارعا ءمالىم ەتەدى.
تالاپ ەتىلگەن اقشانى الىپ جاتقان ۇستىندە ۇستالعان پوليتسەيلەردىڭ جەمقورلىق ءىسى جاقىندا سوتتا قارالدى. ءبىرى جەرگىلىكتى پوليتسيا بولىمشەسى قوعامدىق قاۋىپسىزدىك ءبولىمىنىڭ باستىعى, ەكىنشىسى ۋچاسكەلىك ينسپەكتور ارقايسىسىنا 4 جىل تەمىر توردىڭ ارعى جاعىندا وتىرۋ كەسىلدى.
ايقىن نەسىپباي,
«ەگەمەن قازاقستان».
قاراعاندى وبلىسى,
اباي اۋدانى.
_________________
پارا بەرىپ, سىتىلىپ كەتتى
ۇلتتىق قاۋىپسىزدىك كوميتەتىنىڭ وبلىستىق باسقارماسى وبلىستىق ىشكى ىستەر دەپارتامەنتىنىڭ اعا جەدەل ۋاكىلى مۇرات مۇحامەدجانوۆ پەن مامليۋت اۋداندىق ىشكى ىستەر ءبولىمى باستىعىنىڭ ورىنباسارى قۋانىش بەكەنوۆكە قاتىستى قىلمىستىق ءىس قوزعالدى. قوعامدىق ءتارتىپ ساقشىلارى بۇرىن يەلىكتەن الىنعان «تويوتا الفارد» جانە «سيتروەن س-كروسسەر» شەتەلدىك كولىكتەرىن كەرى الۋ ماقساتىمەن باسقارما قىزمەتكەرىنە 10 مىڭ دوللار پارا ۇسىنعان. الايدا, تۇتقىنداۋ توبى جەتكەنشە تاباندارىن جالتىراتىپ ۇلگىرگەن. ولار قىلمىستىق كودەكستىڭ 307 جانە 312 باپتارى بويىنشا ايىپتالىپ, وندىرىستىك ءىس قارجى پوليتسياسىنىڭ قاراۋىنا بەرىلدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
___________________________
كولدەنەڭ تابىس تورعا تىقتى
كولدەنەڭ تابىسقا كەنەلۋدىڭ جولى كوپ ەكەن. اسىرەسە, شەتەلدىكتەر شوعىرى مول مۇنايلى اتىراۋدا ءتۇرلى ايلا-شارعى جاساۋدىڭ امالىن تاپقاندار تابىلىپ جاتىر. ماسەلەن, وبلىستىق ءىىد كوشى-قون پوليتسياسى باسقارماسىنىڭ كوشى-قوندى باقىلاۋ بولىمشەسىنىڭ باستىعى ا.يمانباەۆ دەگەن شەتەلدىكتەردى تىركەۋدەن قالتاسىن تولتىرماق بولىپتى. ول شەتەل ازاماتتارىنىڭ قر اۋماعىندا بولۋىن تىركەۋ بويىنشا قۇجاتتاردى كەدەرگىسىز راسىمدەۋ جانە ولارعا قامقورشى تانىتقانى ءۇشىن اتىراۋ قالاسىنداعى ءبىر جشس اكىمشىلىگىنەن 150 مىڭ تەڭگە پارا الدى دەپ ايىپتالعان. بۇل ءىستى وڭىردەگى ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتى ەگجەي-تەگجەي تەرگەپ, سوتقا جولداعان ەكەن.
تاياۋدا اتىراۋ قالالىق №2 سوتىنىڭ ۇكىمىمەن ا.يمانباەۆ قر قك 311-بابى 2-بولىگى (پارا الۋ) بويىنشا كىنالى دەپ تانىلىپ, جەكە وزىنە تيەسىلى مۇلكىن تاركىلەۋمەن 5 جىلعا باس بوستاندىعىنان ايىرۋعا سوتتالدى. پوليتسيا مايورى شەنىنەن دە ايىرىلدى, دەپ حابارلادى اتىراۋ وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ ءباسپاسوز قىزمەتى. ەندى بۇل وزگە پوليتسەيلەرگە ساباق بولسا, قانە!
جولداسبەك شوپەعۇل,
«ەگەمەن قازاقستان».
اتىراۋ وبلىسى.