جۇما, 1 اقپان 2013 6:55
ەرلان – وتباسىنداعى ەكى ۇلدىڭ ۇلكەنى بولاتىن. قارشادايىنان ومىرگە قۇشتار ول شاعىن اۋىلدىڭ بەتكە ۇستار ۇلانى بولىپ ءوستى. جاڭالىققا جانى جاقىن تۇراتىن بالا اۋدان ورتالىعىندا اشىلعان كاراتە ۇيىرمەسىنە ءوزى بارىپ جازىلىپ, از عانا ۋاقىتتا بىرنەشە باسەكەلەردەن ماراپات الىپ ورالدى.
جۇما, 1 اقپان 2013 6:55
ەرلان – وتباسىنداعى ەكى ۇلدىڭ ۇلكەنى بولاتىن. قارشادايىنان ومىرگە قۇشتار ول شاعىن اۋىلدىڭ بەتكە ۇستار ۇلانى بولىپ ءوستى. جاڭالىققا جانى جاقىن تۇراتىن بالا اۋدان ورتالىعىندا اشىلعان كاراتە ۇيىرمەسىنە ءوزى بارىپ جازىلىپ, از عانا ۋاقىتتا بىرنەشە باسەكەلەردەن ماراپات الىپ ورالدى.
وسى تىنىمسىز ىزدەنىس, الىس كۇندەرگە اسىعۋشىلىق, بولاشاقتان قول بۇلعاعان ارمان ونى مەكتەپ بىتىرىسىمەن ۇلكەن قالا جاققا الا جونەلدى. سونداعى جوعارى وقۋ ورنىنا ءتۇسىپ, العاشقى كۋرستىڭ وزىندە-اق تالانتىمەن وقۋ ورنىنىڭ ماقتانىشىنا اينالدى. ءجۇرىس-تۇرىسى جىلدام, قاعىلەز, سوزگە جەتىك, ويى ۇشقىر دا تاپقىر, ەلگەزەك جىگىتتى وسى قالاداعى جايدارمانشىلار اتتاي قالاپ قاتارىنا قوستى. ءوزى وقيتىن ءبىلىم ورداسى قابىرعاسىندا جايدارمانشىلار توبىن قۇرىپ, رەپەرتۋارىن دوستارىمەن بىرلەسە تاقىرىپتىق جانە تارتىمدىلىق جاعىنان جاڭارتا بايىتقان ەرلان ءوز ەلىمىز اۋماعىنان شىعىپ, شەت مەملەكەتتەر ساحناسىنىڭ ءسانىن كىرگىزدى. قالاعا بارىسىمەن ورىس ءتىلىن مەڭگەرىپ العان جىگىتكە ول تىلدە ونەر كورسەتۋ قيىن بولعان جوق, ناتيجەسىندە رەسەيدىڭ ايتۋلى قالاسىنداعى سالماقتى سايىستا جەڭىمپاز اتانىپ, التىن مەدالدى يەلەنىپ قايتتى. وقۋ ورنىنا ورالعان سوڭ, ءوزى جالداپ جاتاتىن ءۇيدىڭ بالالارىمەن تۋىسقانداي بولىپ ارالاسىپ كەتكەن ەرلان سول ۇيدەگى قوس ىنىسىنە دومبىرا ۇيرەتتى. قوس ءىنىسى ارقىلى دومبىراعا قىزىعۋشىلىعى ويانعان ونىڭ سىنىپتاستارى شۇبىرىپ كەلە باستادى. قازاقتىڭ قارا دومبىراسىن ۇيرەنەمىن دەگەن جەتكىنشەك بولسا, نەگە ۇيرەتپەسكە؟ ەرلان مەكتەپتەردى ارالاپ ءجۇرىپ, دومبىرا تارتىپ ۇيرەنگىسى كەلەتىن بالالاردى جيىپ ۇيىرمە اشتى, ءوزى بىلەتىن كۇيلەردى, اندەردى جانە قازاق داستۇرىنە ساي كەلىننىڭ بەتىن اشۋدى ۇيرەتتى.
وسىلايشا, ومىرگە دە, ونەرگە دە قۇشتار ەرلاننىڭ بەلسەندىلىگى, سوناۋ الىستاعى اۋىلدان كەلىپ الىپ شاھار اسپانىندا جارىق جۇلدىزداي جارق ەتە قالۋى ءىشى تار, نيەتى بۇزىق جانداردىڭ قىزعانىشىن تۋدىرىپ تا ۇلگەرىپ ەدى. ەرلاننىڭ ءجۇرىس-تۇرىسى, جاستاردىڭ وعان دەگەن قوشەمەتى, ەڭ باستىسى – ول جازىپ شىعارعان دۇنيەلەردىڭ جارىستاردا قارسىلاستاردىڭ مارەگە بارار جولىن قيىپ, ءجيى شاڭ قاپتىرىپ كەتۋى باسەكەلەستەردى ۇيقىدان شوشىپ وياناتىن حالگە جەتكىزدى. ەرلان جارقىراعان سايىن, كوزگە كورىنبەيتىن بەتتە قاپ-قارا قاستاندىقتىڭ دا سۇلباسى زورايىپ بىرگە ءوسىپ كەلە جاتتى. ەرلان ونى اڭعارعان جوق, تەك كوكتەمنىڭ ادەمى ءبىر كەشىندە قارا قانجار بولىپ اڭداۋسىزدا جاندى جەردەن قادالعاندا, نە بولعانىن ءتۇسىنىپ ۇلگەردى مە, جوق پا – باس-اياعى ون مينۋتتا و دۇنيەگە اتتانىپ كەتە باردى, قىرشىن جاس…
ارادا بەس جىل ءوتتى. اكە-شەشە, تۋما-تۋىستارىنىڭ قايعىسىن ۋاقىت ەمشى ەمدەي الماي ەزىلگەن كۇندەردىڭ ءبىرى بولاتىن. بۇل كەزدە تۇڭعىش نەمەرەسى ەرلانعا ۇلكەن ۇمىتپەن قارايتىن, ونىمەن بىرگە كارى كوڭىلىنىڭ تۇكپىرىن شۋاقتاي جىلىتىپ تۇراتىن ءتاتتى ءۇمىت, جاقسى كۇندەرگە دەگەن سەنىمى ءبىرجولاتا قىرقىلعان قارت اتاسى قايعىنى كوتەرە الماي باقيلىق بولعان. قۇداي تاعالانىڭ بەرەيىن دەسە, شاپاعاتى شاش-ەتەكتەن ەكەن. ءدال ەرلان قايتقان كۇنى كوز جاسىن كول قىلىپ وتىرعان اتا-اناسىنا الماتىدان ەرلاننىڭ دوستارى قوڭىراۋ شالدى. ەرلاننىڭ انە-مىنە ۇيلەنەمىن دەپ جۇرگەن سۇيىكتى قىزى – ول قايتىس بولىسىمەن قۇرساعىندا قالعان شارانانى ومىرگە اكەلۋگە بەكىنىپتى. اتا-اناسىنان بۇل ءۇشىن تالاي ۇرىس ەستىپ, اراسىندا تاياق تا جەگەن, ءتىپتى, جەتى ايلىعىندا ءۇش اۋدارىلىپ تۇرعان كولىك اپاتىنان دا امان قالعان قىز نارەستەنى ومىرگە اكەلدى. ءسويتىپ, سۇيىكتىسى ەرلاننىڭ ءومىرىن وسىلاي جالعادى.
وسىمەن: «اپا, كوپ جىلاي بەرمە. تەك قىزداردان حابار الشى», دەپ تۇسىنە مازاسىزدانا ءجيى كىرەتىن ەرلان دا تىنشىدى. التى اي بويى قۇلاعىنان كەتپەگەن شىرىلداعان ءسابي داۋسىنىڭ سىرىن ەرلاننىڭ اناسى ەندى ۇعىندى. بەس جاسار نەمەرەسىمەن اڭساي جولىققان ولار قازىر ونى الاقاندارىنا سالىپ وتىر. الماتى مەن اقتاۋ اراسى, ياعني نەكەسىن پەرىشتە قيعان ەكى جاس – ەرلان مەن اسىلدىڭ اتا-انالارى جانە كىشكەنتاي ۇلى ءجيى قاتىنايتىن تۋىستىق جولىنا اينالدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.