«رۋحاني جاڭعىرۋ» باعدارلاماسى اياسىندا «قوعامدىق كەلىسىم» رمم, ت.جۇرگەنوۆ اتىنداعى قازاق ۇلتتىق ونەر اكادەمياسى قازاقستان تاريحى جانە الەۋمەتتىك عىلىمدار كافەدراسىنىڭ, نازارباەۆ ۋنيۆەرسيتەتى الماتى قالاسىنداعى وكىلدىگىنىڭ ۇيىمداستىرۋىمەن وتكەن شاراعا رەسپۋبليكالىق جانە الماتى قالالىق ەتنومادەني بىرلەستىكتەردىڭ شىعارماشىلىق ۇجىمدارى قاتىسىپ, ءوز ونەرلەرىن ورتاعا سالدى.
فەستيۆالدى وتكىزۋدىڭ باعىت-باعدارىنان حاباردار ەتكەن «قوعامدىق كەلىسىم» رمم ساراپشىسى, «دوستىق ءۇيى» مەدياتسيا كابينەتىنىڭ جەتەكشىسى نۇرساۋلە التەكوۆا وسىنداي مازمۇنداعى شارالار وسكەلەڭ ۇرپاقتىڭ بويىندا رۋحاني قۇندىلىقتاردى قالىپتاستىرۋعا, ۇلتتىق ادەت-عۇرىپتاردى ناسيحاتتاۋعا, سونداي-اق ەتنومادەني كەڭىستىكتى دامىتۋعا ىقپال ەتەتىندىگىن اتاپ ءوتتى.
قازاقستاندا تۇرىپ جاتقان ۇلتتار مەن ۇلىس وكىلدەرىنىڭ مادەنيەتى مەن سالت-داستۇرلەرىن ناسيحاتتاۋعا باعىتتالعان شارانىڭ اشىلۋ سالتاناتىندا د.قوناەۆ اتىنداعى ەۋرازيالىق زاڭ اكادەمياسىنىڭ رەكتورى ءومىرالى قوپاباەۆ, «ورىس, سلاۆيان جانە كازاك ۇيىمدارى قاۋىمداستىعى» زتب الماتى فيليالىنىڭ باسشىسى ۆلاديمير شيحيتوۆ, ت.جۇرگەنوۆ اتىنداعى ونەر اكادەمياسىنىڭ پروفەسسورى مەڭدىعانىم شايمەردەنوۆا, قحا اداگەرى كلارا حان, بوۋلينگتان ءۇش دۇركىن قازاقستان چەمپيونى, ابۋ دابيدە گولفتان وتكەن الەم چەمپيوناتىنىڭ جۇلدەگەرى, ازيا جانە ەۋروپا ويىندارىنىڭ كۇمىس جۇلدەگەرى ەلينا اليەۆا, ت.ب. ءسوز سويلەپ, بەيبىت ەلدىڭ بەرەكەسى – تاتۋلىق مەن ىنتىماقتى تىرلىكتە جاتقاندىعىنا توقتالدى. بۇگىندە حالىقتار دوستىعى مەن تاتۋلىعىن ارتتىرۋدا ەلباسىنىڭ ەڭبەگى زور ەكەندىگىن اتاپ وتكەن اسسامبلەيا مۇشەلەرى قالىڭ كوپشىلىكتى الداعى ساياسي ناۋقان - سايلاۋعا ءبىر كىسىدەي اتسالىسۋعا شاقىردى.
ۇلتتىق سالت-ءداستۇر تاقىرىبىن ارقاۋ ەتكەن فەستيۆال بارىسىندا ەلىمىزدە تۇرىپ جاتقان ۇلت وكىلدەرىنىڭ تەاترلاندىرىلعان قويىلىمدارى, ۇلتتىق كيىمدەگى سازدى باعدارلامالارى سالتاناتتى كەشتىڭ مازمۇنىن بايىتا ءتۇسىپ, بەسىك جىرى شىرقالدى. ءار ۇلتتىڭ حالىق اندەرىمەن قاتار اۋەلەگەن تانىمال كومپوزيتورلاردىڭ اندەرى كەشتىڭ ءسانىن كىرگىزدى.