جۇما, 13 شىلدە 2012 7:15
ورالدا لوندونعا باراتىن سپورتشىلار قۇرمەتىنە ارنالىپ, وليمپيادا الاۋى تۇتاندى
قالامىزداعى اسەم بەزەندىرىلگەن پ.اتويان اتىنداعى «اقجايىق» ستاديونىندا مەملەكەتتىك رامىزدەردىڭ 20 جىلدىعىنا وراي جانە لوندون وليمپياداسىنا قاتىسۋشى باتىسقازاقستاندىق سپورتشىلارعا اق جول تىلەۋ ماقساتىندا پاتريوتتىق اكتسيا ءوتتى.
جۇما, 13 شىلدە 2012 7:15
ورالدا لوندونعا باراتىن سپورتشىلار قۇرمەتىنە ارنالىپ, وليمپيادا الاۋى تۇتاندى
قالامىزداعى اسەم بەزەندىرىلگەن پ.اتويان اتىنداعى «اقجايىق» ستاديونىندا مەملەكەتتىك رامىزدەردىڭ 20 جىلدىعىنا وراي جانە لوندون وليمپياداسىنا قاتىسۋشى باتىسقازاقستاندىق سپورتشىلارعا اق جول تىلەۋ ماقساتىندا پاتريوتتىق اكتسيا ءوتتى.
اكتسيانىڭ قۇرمەتتى قوناقتارى بولىپ, وبلىس اكىمى نۇرلان نوعاەۆ, 2000 جىلعى سيدنەي وليمپياداسىنىڭ چەمپيوندارى جەلاياق ولگا شيشيگينا مەن بوكسشى ەرماحان ىبىرايىموۆ تورگە وزدى.
– تورتكۇل دۇنيە تەلمىرىپ كوز تىگەتىن بۇل جولعى مەرەيتويلى وليمپياداعا قاتىسۋشىلار, ءارينە, مىقتى سپورتشىلار. وسى شاراعا قاتىسۋ بارىسىندا ولار وتتان دا, سۋدان دا وتكەندىكتەن, ءبىز ولاردىڭ تولاعاي تابىستارعا قول جەتكىزەتىندەرىنە سەنەمىز, – دەگەن وبلىس اكىمى نۇرلان اسقار ۇلى ولارعا اق جول تىلەدى.
– قۇرمەتتى حالايىق, كوپ كەشىكپەي ءبىز ورالعا قايتىپ كەلەمىز. بىراق, ول جولى باتىسقازاقستاندىق وليمپيادا چەمپيوندارىن قۇتتىقتاۋعا كەلەمىز, – دەدى, تاۋەلسىز قازاقستان تۇسىندا ايەلدەر اراسىنان شىققان تۇڭعىش وليمپيادا چەمپيونى ولگا شيشيگينا.
– باتىس قازاقستان وبلىسىندا سپورتتىڭ بارلىق ءتۇرىنىڭ ويداعىداي دامۋىنا مول مۇمكىندىكتەر جاسالعان. ورالدان لوندون وليمپياداسىنا قاتىساتىن سپورتشىلاردىڭ شىعۋى – سونىڭ ناتيجەسى. ءبىز ولارعا جاسىنداي جارقىراعان جەڭىستەر تىلەيمىز, – دەدى ءوز سوزىندە اتاقتى بوكسشى ەرماحان ىبىرايىموۆ.
بۇدان سوڭ ساحنا تورىنە سپورت ارداگەرى باتىرحايىر ايەشوۆ شىعىپ, قولىن جايىپ, وليمپياداعا قاتىسۋشى باتىسقازاقستاندىق سپورتشىلارعا باتا بەردى. سول-اق ەكەن, ورتاعا قۇيرىق-جالى جەل ەسكەن اقبوزات مىنگەن ات سپورتىنىڭ وكىلى راۋان تۇردىاليەۆ قولىنا وليمپيادا الاۋىن ۇستاي شىعىپ, ونى الەم چەمپيوناتىنىڭ كۇمىس جۇلدەگەرى, ازيا چەمپيونى, سامبوشى مەدەت وڭداعانوۆقا تابىستادى. مەدەت ءوز كەزەگىندە الاۋدى دزيۋدو كۇرەسىنەن قازاقستان چەمپيونى, ازيا چەمپيوناتىنىڭ كۇمىس جۇلدەگەرى اسەل قازيەۆاعا بەردى. ءجۇزى بال-بۇل جانعان ول جۇگىرگەننەن جۇگىرىپ وتىرىپ, الاۋدى ەربولات بايباتىروۆقا ۇسىندى.
سامبو كۇرەسىنەن ءۇش دۇركىن ازيا چەمپيونى, ەكى دۇركىن الەم كۋبوگىنىڭ يەگەرى, ءتورت دۇركىن الەم چەمپيونى ەربولات بايباتىروۆ وليمپيادا الاۋىن تۇتاتتى.
ورال قالاسىنان لوندون وليمپياداسىنا قاتىسۋ باقىتىنا يە بولعان سپورتشىلار: تايمۇراز تيگيەۆ, ابدۋلحاكيم شاپيەۆ (ەكەۋى دە ەركىن كۇرەستەن), الەكسەي دەرگۋنوۆ (بايداركا جانە كانوە ەسۋ), دانيال گادجيەۆ (گرەك-ريم كۇرەسى), گريگوري شەيكو (سپورتتىق جاياۋ ءجۇرىس), اناستاسيا باننوۆا (ساداق اتۋ).
تالعات بايسارين.
ورال.