سەنبى, 23 ماۋسىم 2012 7:25
ماۋسىمنىڭ 21-ءى كۇنى ەۋروپا چەمپيوناتىندا 1/4 فينالدىڭ العاشقى ماتچى وينالدى. بۇل كۇنى چەحيا جانە پورتۋگاليا قۇرامالارى كەزدەستى. وندا 1:0 ەسەبىمەن جەڭىسكە جەتكەن پورتۋگالدار 1/2 فينال تورتتىگىنىڭ ءبىرىنشى ۇجىمى بولىپ تىركەلدى.
سەنبى, 23 ماۋسىم 2012 7:25
ماۋسىمنىڭ 21-ءى كۇنى ەۋروپا چەمپيوناتىندا 1/4 فينالدىڭ العاشقى ماتچى وينالدى. بۇل كۇنى چەحيا جانە پورتۋگاليا قۇرامالارى كەزدەستى. وندا 1:0 ەسەبىمەن جەڭىسكە جەتكەن پورتۋگالدار 1/2 فينال تورتتىگىنىڭ ءبىرىنشى ۇجىمى بولىپ تىركەلدى.
ماتچقا دەيىن. شيرەك فينالدىق شايقاس الدىندا چەحيا قۇراماسىنىڭ باس جاتتىقتىرۋشىسى ميحال بيلەك قارسىلاستار قۇرامىندا كريشتيانۋ رونالدۋدان باسقا دا كۇشتى ويىنشىلار كوپ ەكەنىن اتاپ ءوتتى. «ءبىز پورتۋگالداردى ءبولىپ-جارماي, بارىنە قارسى تۇرا ءبىلۋىمىز كەرەك, – دەدى ول. – ءبىرىنشى ماتچتا تىم اشىق ويناپ ەدىك, ونىڭ جازاسىن تەز تارتتىق. بۇل بىزگە ساباق بولدى. ەندىگى ويىن باسقاشا بولادى». ال پورتۋگاليا قۇراماسىنىڭ باس جاتتىقتىرۋشىسى پاولۋ بەنتۋ كوماندانىڭ ءوز ستيلىنە بەرىك, ياعني بۇرىنعىسىنشا شابۋىلدىڭ شاشباۋىن كوتەرە بەرەتىنىن مالىمدەدى. «تەك تىم الىپ-ۇشپاي, سالقىنقاندى جانە مۇقيات ويناۋىمىز كەرەك», – دەگەندى دە سول ايتتى.
دەرەك. بۇل كوماندالار ءبىرىنشى رەت بۇدان تۋرا 16 جىل بۇرىن, 1996 جىلعى 23 ماۋسىمدا ەۋروپا بىرىنشىلىگىندە كەزدەسىپ ەدى. سوندا تۇماندى البيون جەرىندەگى جان الىپ, جان بەرگەن شايقاستا كارەل پوبورسكي باستاعان چەح ويىنشىلارى 1:0 ەسەبىمەن باسىم تۇسكەن. مۇنىڭ قارىمتاسىن «سەلەساۋ» تەك 2008 جىلى 11 ماۋسىمدا عانا 3:1 ەتىپ قايتارا الدى. قۇرامالار مۇندا ەۋروپا بىرىنشىلىگىنىڭ توپتىق سايىسىنىڭ ەكىنشى تۋرىندا ۇشىراسقان.
ويىن. ميحال بيلەكتىڭ ءجىگىتتەرى وزدەرىنىڭ بۇرىنعى تاكتيكالارىن وزگەرتە قويمادى. ىسقىرىق ءۇنى ەستىلىسىمەن العا ۇمتىلعان ولار العاشقى ساتتەگى ابىر-دابىردى پايدالانىپ قالۋعا تىرىستى. چەحتاردىڭ وڭ قاپتالدان ايىپ الاڭىنا بىرنەشە رەت جەتكىزگەن دوپتارى شىنىندا ءبىراز قاۋىپ ءۇيىردى. پورتۋگالدىڭ قورعانىس شەبىندەگى فابيۋ كوەنتراۋ باستاعان ساربازدار شىرعالاڭى كوپ بۇل شابۋىلدارعا بارلىق ۋاقىتتا بىردەي لايىقتى توسقاۋىل قويا المادى. جاعدايدى چەحتاردىڭ ءوز قاتەلىكتەرى تۇزەپ كەتىپ جاتتى. ءوز كەزەگىندە بەنتۋ قىراندارى قايتارعان قاۋىرت جاۋاپتار بۇدان دا قاۋىپتى بولا ءتۇستى. مۇندا جانكۇيەر جۇرت كريشتيانۋ رونالدۋدىڭ كوپ بەلسەندىلىگىنە كۋا بولدى. توپتاعى العاشقى ەكى كەزدەسۋدى ونشاما ورالىمدى ەتە قويماعان كوماندا كاپيتانىنىڭ گوللانديا قۇراماسىمەن ماتچتا قانشالىقتى وراسان زور ەڭبەك سىڭىرگەنىن دە ماماندار قاپىسىز بايقادى. الدىن الا ايتا كەتەيىك, كريشتيانۋدىڭ بۇل جولى انىق ءتورت گول سوعۋىنا بولاتىن ەدى. سونىڭ ەكەۋى تاعى دا قاقپا باعانىنان قايتسا, بىرەۋىن فورۆاردتىڭ ءوزى ءمۇلت جىبەردى.
ويىننىڭ ەكىنشى بولىگىندە چەحتار قارسىلاستارىن قارسى شابۋىل كەزىندە قاپىدا قالدىرۋ نيەتىمەن الاڭسىز ارتقا كەتىپ تىندى. بىراق پورتۋگالدار ولاردىڭ بۇلايشا تۇتقيىلدان جامىراپ شىعا كەلۋلەرىنە ەندى جول بەرمەدى. مۇنىڭ ورنىنا ولار پەتەر چەح قورعاعان قاقپانى قۇرساۋلانعان قورشاۋعا الىپ الدى. وسى تۇستا گولكيپەرگە بىرنەشە رەت شەبەرلىگىن كورسەتۋگە تۋرا كەلدى. الايدا, 79 مينۋتتا كريشتيانۋ رونالدۋ ۇرعان دوپقا ونىڭ دا قارسى قويار امالى قالمادى. شابۋىلشىنىڭ سول قاپتالدان جىلدام جەتكەن دوپتى باسىمەن ۇرۋ ارقىلى قالاي تاماشا ەتىپ تۇسىرگەنىن كورەرمەن كوپشىلىك ءوز كوزدەرىمەن كوردى عوي دەپ ويلايمىز. ال بيلەكتىڭ شاكىرتتەرى بۇدان كەيىن قانشاما رەت قارسى جورىق ۇيىمداستىرۋعا ۇمتىلعاندارىمەن, ول ويلارىن جۇزەگە اسىرا المادى. جالپى, ولار ءبۇكىل ويىن بويىنا ءبىر رەت تە قاقپاعا تۋرالاپ سوققى جاساي العان جوق.
ماتچتان سوڭ. پورتۋگاليا قۇراماسىنىڭ باس باپكەرى پاولۋ بەنتۋ ەڭ الدىمەن: «ءبىزدىڭ ماقساتىمىز يسپانيانى نە فرانتسيانى ۇتۋ», دەگەندى ايتتى. «بۇل ويىن گوللانديامەن ايقاستان ءبىراز وزگەشەلەۋ بولدى, – دەدى بۇدان ارى. – ءبىزدى چەحتاردىڭ العاشقى 20-25 مينۋت تەڭ ءدارەجەدە شايقاسقاننان كەيىن ءبىرجولا قورعانىسقا كەتكەنى تاڭ قالدىرعان جوق. ولاردى ءبىز سوعان ءماجبۇر ەتتىك. ال ۇزىلىستەن كەيىن تاماشا فۋتبول كورسەتتىك. سول جەڭىس اكەلدى». چەحيا قۇراماسىنىڭ باس جاتتىقتىرۋشىسى ميحال بيلەك وتە كۇشتى قارسىلاستىڭ تاپ كەلگەنىن بىردەن مويىندادى. «بۇل كوماندامەن كۇرەسۋدىڭ قيىنعا سوعاتىنىن بىلدىك», – دەدى ول. سودان سوڭ بۇرىننان قالىپتاسقان ادەپ ەرەجەسى بويىنشا بۇگىنگى قارسىلاستارىنا بۇدان ءارى دە تابىسقا جەتە بەرۋدى تىلەدى.
سەرىك ءپىرنازار,
«ەگەمەن قازاقستان».
ويلار, پىكىرلەر, كوزقاراستار
ديك ادۆوكات,
رەسەي قۇراماسىنىڭ بۇرىنعى باس جاتتىقتىرۋشىسى:
– جۇرت بارلىق كىنانى ماعان اۋدارا سالعىسى كەلەدى. بىراق شىندىقتىڭ بەتىنە تۋرا قارايىق. ءبىز چەحيامەن تاماشا ماتچ وتكىزدىك, پولشانى ءبىرىنشى تايمدا تىرپ ەتكىزبەدىك. گرەكتەردى دە تالقانداۋعا ءتيىس ەدىك. بىراق بۇعان قول جەتپەي, ءۇش ويىننان كەيىن تۋرنيردەن شىعىپ قالدىق. ءبىز جۇلدىزدارسىز كوماندا ەدىك. ەۋروپاعا بارعان ورىس جىگىتتەرى ىلعي زاپاستا وتىرادى. وسىعان قاراماستان, ءبىز كەرەمەت كوماندا جاساي بىلدىك. شاماسى, قورعانىپ جاتىپ العان گرەكتەردىڭ شەبىن بۇزىپ شىعۋعا ولاردىڭ شەبەرلىكتەرى جەتپەسە كەرەك…
ۋەين رۋني,
انگليا قۇراماسىنىڭ شابۋىلشىسى:
– ءبىزدى يتالياندارمەن وتەتىن كۇردەلى ماتچ كۇتىپ تۇر. وعان قاراماي, اقىرىنا دەيىن شايقاسامىز. ماعان ءبىزدىڭ قازىرگى قۇراما وسىعان دەيىن ءوزىم ويناعانداردىڭ ىشىندەگى ەڭ ۇيىمشىلى سياقتى كورىنەدى. ءبىز ءوز كۇشىمىزگە سەنىمدىمىز, ەڭ ماڭىزدىسىنىڭ ءوزى دە سول.
الەن بوگوسسيان,
فرانتسيا قۇراماسى باس جاتتىقتىرۋشىسىنىڭ كومەكشىسى:
– ءبىز شۆەدتەردى جەڭىپ, توپتان ءبىرىنشى بولىپ شىعۋعا ءتيىس ەدىك. وكىنىشكە قاراي, وعان قول جەتپەدى. ەندى ول تۋرالى ويلاپ جاتۋعا ۋاقىت جوق. يسپاندارمەن ويىنعا دايىندالۋىمىز كەرەك. ءبىز ولاردىڭ ويىندارىن ءتۇن جارىمى اۋعانشا تالداپ شىقتىق. بۇل كوماندانى توقتاتۋ وڭاي ەمەس. ال ءبىز سونى جاسايمىز.
يگناتسيو اباتە,
يتاليا قۇراماسىنىڭ قورعاۋشىسى:
– قازىر انگليا ويىنشىلارىنىڭ كوڭىل-كۇيلەرى جاقسى. ولارعا رۋني قوسىلدى. الايدا, ءبىز دە سورلى ەمەسپىز. سوندىقتان ەرتەڭگى كەزدەسۋدە اعىلشىندارعا ءوز ويىنىمىزدى تاڭۋىمىز كەرەك. ولاردىڭ قاپتالداردان جىلدام ءوربيتىن وتە قاۋىپتى قارسى شابۋىلىنا توسقاۋىل قويماي بولمايدى. بۇل ءبىزدىڭ قولىمىزدان كەلەدى.