سەنبى, 16 ماۋسىم 2012 6:47
14 ماۋسىم كۇنى س توبىندا دا ەكىنشى تۋردىڭ ويىندارى وينالدى. ول يرلانديا قۇراماسىنىڭ كەلەسى كەزەڭگە ءوتۋ ءۇمىتى ءبىرجولا ۇزىلگەنىن بايان ەتكەنىمەن, قالعان ەكى ورىندى ءۇش كوماندانىڭ قايسىسى الاتىنى ماسەلەسىن اشىق قالپىندا قالدىردى.
تاپ قازىر شيرەك فينالعا شىعۋ مۇمكىندىگىن 4 ۇپايى بار يسپانيا مەن حورۆاتيا دا, ولاردان 2 ۇپاي كەم جيناعان يتاليا دا جوعالتا قويعان جوق. تۋرنير كەستەسىندەگى وسىنداي الماعايىپ احۋالدى بەيسەنبى كۇنى يتاليا-حورۆاتيا, يسپانيا-يرلانديا قۇرامالارى اراسىندا بولىپ وتكەن كەزدەسۋلەر تۋىنداتتى.
سەنبى, 16 ماۋسىم 2012 6:47
14 ماۋسىم كۇنى س توبىندا دا ەكىنشى تۋردىڭ ويىندارى وينالدى. ول يرلانديا قۇراماسىنىڭ كەلەسى كەزەڭگە ءوتۋ ءۇمىتى ءبىرجولا ۇزىلگەنىن بايان ەتكەنىمەن, قالعان ەكى ورىندى ءۇش كوماندانىڭ قايسىسى الاتىنى ماسەلەسىن اشىق قالپىندا قالدىردى.
تاپ قازىر شيرەك فينالعا شىعۋ مۇمكىندىگىن 4 ۇپايى بار يسپانيا مەن حورۆاتيا دا, ولاردان 2 ۇپاي كەم جيناعان يتاليا دا جوعالتا قويعان جوق. تۋرنير كەستەسىندەگى وسىنداي الماعايىپ احۋالدى بەيسەنبى كۇنى يتاليا-حورۆاتيا, يسپانيا-يرلانديا قۇرامالارى اراسىندا بولىپ وتكەن كەزدەسۋلەر تۋىنداتتى.
الدىمەن پوزناندا بۇلاردىڭ الدىڭعى جۇپتارى ۇشىراستى. ويىن بارىنشا قىزىقتى دا, تارتىستى ءوتتى. مۇندا نەگىزىنەن يتالياندار باسىمىراق ويناعانىمەن, ساتتىلىك سەرىك قۇرا قالعان جاعدايدا حورۆاتتاردىڭ دا جەڭىپ كەتەتىندەي رەتتەرى بولدى. ولار جەڭىسكە جەتكەندە, شيرەك فينالدىڭ جولداماسى قالتالارىندا تۇرعان بولار ەدى. ال يتالياندار تابىسقا جەتسە, وسى ۋاقىت شەڭبەرىندە عانا توپ باستايتىن. ءبىراق دومالاق دوپ بۇلاردىڭ ەكى جاعىنا دا تارازى باسىنىڭ اۋىنا جول بەرمەدى. ەسەپ – 1:1. ويىننىڭ شاماسى دا وسىنداي.
الەم مەن ەۋروپانىڭ چەمپيونى – يسپانيا قۇراماسىنىڭ ويىنىنا كوڭىلى تولماي جۇرگەن اعايىن كوپ قازىر. سودان بولار, وسى بىرىنشىلىك باستالار الدىندا ولاردى ءبىراز جۇرت فاۆوريتتەر قاتارىنا قوسپادى. يسپاندار ءتىپتى ءبىرىنشى ماتچتا يتالياندارمەن تەڭ ويناعاننان كەيىن دە سول سالقىندىق سەيىلە قويماعان. وسى كۇدىك كوماندانىڭ يرلاندتىقتاردى 4:0 ەتىپ قيراتا جەڭگەنىنەن كەيىن دە ادا-كۇدە كەتتى دەپ ايتا المايمىز. سەبەبى, الدا شيرەك فينالدىڭ تاعدىرىن شەشەتىن سوڭعى سىناق تۇر. ول ەندىگى ۇشتىكتىڭ (يسپانيا, حورۆاتيا, يتاليا) قاتارىنان ەكى قۇراماعا عانا ەن تاعاتىن بولادى.
كەشە تۇندە توپتاردا ەكىنشى تۋردىڭ ويىندارى تولىق وينالىپ ءبىتتى. بۇل كۇنى ۋكراينا فرانتسيادان 0:2 ەسەبىمەن ۇتىلىپ قالدى.
_______________________
ويلار, پىكىرلەر, كوزقاراستار
ۆيسەنتە دەل بوسكە, يسپانيا قۇراماسىنىڭ باس جاتتىقتىرۋشىسى: – يرلانديانى 4:0 ەسەبىمەن جەڭگەنىمىزگە قۋانىشتىمىن. بىراق بۇل كەلەسى ويىنعا قالاي بولسا سولاي قارايتىنىمىزدى بىلدىرمەيدى. ءبىز الاڭعا قالايدا حورۆاتيانى جەڭۋ ءۇشىن شىعامىز.
دجوۆانني تراپاتتوني, يرلانديا قۇراماسىنىڭ باس جاتتىقتىرۋشىسى: – مەن ءوز جانكۇيەرلەرىمىزدى ايايمىن. ءبىز وسى ماتچتىڭ الدىندا ءوزىمىزدى قانداي سىن كۇتىپ تۇرعانىن جاقسى بىلدىك. يسپانيانىڭ ورتاڭعى شەبى مىقتى ەكەنى دە ايان ەدى. ءبارىن تەز جىبەرىپ العان گول ءبۇلدىرىپ كەتتى. ەندى يتالياعا قارسى ويىندا بارىمىزدى سالامىز.
دجانلۋيدجي بۋففون, يتاليا قۇراماسىنىڭ قاقپاشىسى: – ءبىز بۇگىن جەڭىس ءۇشىن ويناپ ەدىك. بىراق قانشا جاقسى ويناعانىمىزبەن, ءوزىمىز يگەرە المايتىن جاعدايعا تاپ بولدىق. كەم دەگەندە, ءۇش رەت گول سوعاتىن مۇمكىندىكتى جىبەرىپ الدىق. كەلەسى اپتادا يسپاندار مەن حورۆاتتار ءوزارا كەلىسىپ الىپ وينامايتىن شىعار دەپ ويلايمىن. سوندا ءبىزدىڭ باعىمىز جانادى.
___________________________
ماتچ مينياتيۋرالارى
* بەيسەنبى كۇنى س توبىندا يتاليا-حورۆاتيا, يسپانيا-يرلانديا كەزدەسىپ, ەكىنشى تۋردىڭ ويىندارىن وينادى. ولاردا 6 گول سوعىلدى. بۇلاردىڭ 2-ءۋى ءبىرىنشى, 4-ءۋى ەكىنشى تايمداردا سالىندى.
* بۇل ماتچتاردى ستاديونداردا 76 246 كورەرمەن تاماشالادى. ال چەمپيونات باستالعالى ستاديوندارعا 599 115 ادام جينالدى.
* چەمپيونات باسىنان بەرى وينالعان 14 ويىندا 39 گول سوعىلدى. ءار ويىندا سوعىلعان ورتاشا دوپ سانى – 2,78.
* وتكەن ەكى ويىندا تاعى ءبىر دۋبل تىركەلدى. يسپانيا قۇراماسىنىڭ شابۋىلشىسى فەرناندو توررەس يرلاندىقتار قاقپاسىنا 2 دوپ سالدى. چەمپيوناتتىڭ مەرگەندەر كوشىن 3 گولمەن باستاپ كەلە جاتقان الان دزاگوەۆ (رەسەي) پەن ماريو گومەستىڭ (گەرمانيا) قاتارىنا حورۆات ماريو ماندجۋكوۆيچ قوسىلدى. ول سوڭعى ويىندا يتاليالىقتار قاقپاسىنا تاعى ءبىر دوپ ءتۇسىردى. ال ەكىنشى تايمدا الاڭعا فەرناندو توررەستىڭ ورنىنا شىققان سەسك فابرەگاس تاعى ءبىر گول سوعىپ, دوپتارى سانىن ەكەۋگە جەتكىزدى. قالعان گولداردى يتاليالىق اندرەا پيرلو مەن يسپان داۆيد سيلۆا ءوز ەسەپتەرىنە جازدى.
* وتكەن ەكى ويىندا 8 ويىنشى ەسكەرتۋ الدى. جالپى, بىرىنشىلىك باستالعالى 50 فۋتبولشىعا «سارى قاعاز» كورسەتىلدى.
* ۇزدىك ويىنشى اتاعىنا ستيپە پلەتيكوسا (حورۆاتيا) مەن داۆيد سيلۆا (يسپانيا) يە بولدى.
__________________________________
دەرەكتەر مەن دايەكتەر
لۋكا ءمودريچتىڭ «توتتەنحەمدەگى» كەلەشەگى كۇماندى. بۇل كلۋب جازعى ترانسفەر كەزىندە باس جاتتىقتىرۋشى حارري رەدناپتى وتستاۆكاعا جىبەرگەننەن كەيىن حورۆات فۋتبولشىسىنا جاڭا كوماندا ىزدەۋگە تۋرا كەلەتىن ءتۇرى بار. مۇنى ونىڭ ارىپتەسى ۆەدران چورلۋكا قۋاتتاپ وتىر.
دجەننارو گاتتۋزو شۆەيتساردىڭ «سيونىنا» اۋىساتىن سياقتى. يتاليالىق جارتىلاي قورعاۋشى مامىر ايىندا-اق ءوزىنىڭ «ميلاننان» كەتەتىنىن مالىمدەپ قويعان. ونىڭ ەندىگى باراتىن كومانداسى ءالپى تاۋىنىڭ جوعارعى جاعىندا ەكەنىن يتاليا ينتەرنەت باسىلىمدارى جاريالاپ جىبەردى.
چەمپيونات باستالعالى ۋكراين ميليتسياسى 14 قالتارماندى ۇستادى. ارادا وتكەن 6 كۇننىڭ ىشىندە قوعامدىق ءتارتىپ ساقشىلارى جۇرتتىڭ قالتاسىنا ءتۇسىپ جۇرگەن وسىنشاما ۇرىنى جولدان قاعىپتى. بىراق بىرىنشىلىك بىتكەنشە باۋكەسپەلەردى قايدا ءجىبەرەتىندەرىن ىشكى ىستەر ورگاندارىنىڭ وكىلدەرى ايتىپ وتىرعان جوق.
گيورگوس ساماراس جالپى توپقا ورالدى. گرەكيا قۇراماسىنىڭ شابۋىلشىسى الىپ قالعان جاراقاتىنىڭ جازىلا باستاۋىنا بايلانىستى جاتتىعۋعا قايتا كىرىستى. ول بىردەن جالپى توپتىڭ قۇرامىنان ورىن الدى.
حورۆات جانكۇيەرلەرى پوزنان ورتالىعىندا ەۋرووداق تۋىن وتقا جاقتى. بۇل وقيعا يتاليا-حورۆاتيا كەزدەسۋى قارساڭىندا ورىن الدى. ولار اسكەري قىلمىسكەر انتە گوتوۆينانىڭ كەسكىنى بەينەلەنگەن پوستەردى ۇستاپ ميتينگ وتكىزدى. پوليتسيا ولاردىڭ تىرلىكتەرىن سىرتتاي باقىلاپ تۇردى. بىراق ارالاسپادى.