سارسەنبى, 18 ءساۋىر 2012 7:37
اقتوبەدەگى وبلىستىق تۋبەركۋلەزگە قارسى كۇرەس ديسپانسەرىنىڭ بەسىنشى قاباتىنان قۇلاعان 73 جاستاعى ايەلدىڭ مەرت بولعانى جايلى بۇقارالىق اقپارات قۇرالدارى جارىسا جازىپ جاتىر. ءيا, وسىنداي ءبىر وقىس وقيعانىڭ ورىن العانى شىندىق. قايعىلى وقيعا قۇزىرلى ورگانداردى دا اياعىنان تىك تۇرعىزدى. ىلە وقيعاعا بايلانىستى بۇقارالىق اقپارات قۇرالدارىنىڭ وكىلدەرىمەن ءباسپاسوز ءماسليحاتى وتكىزىلىپ, بولعان جاعدايعا وبلىستىق دەنساۋلىق ساقتاۋ باسقارماسى باستىعىنىڭ ورىنباسارى سامات دانياروۆ, اتالعان ديسپانسەردىڭ باس ءدارىگەرى نۇرلان اعزاموۆ تۇسىنىك بەردى.
سارسەنبى, 18 ءساۋىر 2012 7:37
اقتوبەدەگى وبلىستىق تۋبەركۋلەزگە قارسى كۇرەس ديسپانسەرىنىڭ بەسىنشى قاباتىنان قۇلاعان 73 جاستاعى ايەلدىڭ مەرت بولعانى جايلى بۇقارالىق اقپارات قۇرالدارى جارىسا جازىپ جاتىر. ءيا, وسىنداي ءبىر وقىس وقيعانىڭ ورىن العانى شىندىق. قايعىلى وقيعا قۇزىرلى ورگانداردى دا اياعىنان تىك تۇرعىزدى. ىلە وقيعاعا بايلانىستى بۇقارالىق اقپارات قۇرالدارىنىڭ وكىلدەرىمەن ءباسپاسوز ءماسليحاتى وتكىزىلىپ, بولعان جاعدايعا وبلىستىق دەنساۋلىق ساقتاۋ باسقارماسى باستىعىنىڭ ورىنباسارى سامات دانياروۆ, اتالعان ديسپانسەردىڭ باس ءدارىگەرى نۇرلان اعزاموۆ تۇسىنىك بەردى.
وبلىستىق دەنساۋلىق ساقتاۋ باسقارماسى باستىعىنىڭ ورىنباسارى سامات دانياروۆ وقيعا ورىن العان جەرگە شۇعىل تۇردە قالالىق ىشكى ىستەر دەپارتامەنتىنىڭ تەرگەۋ ءبولىمىنىڭ قىزمەتكەرلەرى جەتكەنىن, وسى ءىس بويىنشا سوت-مەديتسينالىق ساراپتاما تاعايىندالعانىن, ونى قۇزىرلى ورگاندار ودان ءارى تەكسەرىپ جاتقانىن جەتكىزدى. ازىرشە بەلگىلى جاي قىزىلوردا وبلىسىنان كەلىپ ەمدەلىپ جاتقان ك.ەسىمدى ايەلگە تۋبەركۋلەزگە قارسى ەم تاعايىندالعان. ەمىن, ءدارىلەرىن ۋاقىتىلى الىپ وتىرعان, ەمدەۋ پروتسەسىنە, تاماقتىڭ ساپاسىنا ناۋقاستىڭ تاراپىنان ەشقانداي شاعىم بولماعان. بىراق, بىرگە ەمدەلىپ جاتقان سىرقاتتاردىڭ ايتۋلارىنا قاراعاندا, مارقۇم ءوزىنىڭ تۋبەركۋلەز اۋرۋىنا شالدىققانىنا ۋايىمداپ جۇرگەن.
ءدال سول كۇنى ستاتسيونارلىق ەم الىپ جاتقان ءبىر توپ ناۋقاس اكىمشىلىك عيماراتىنىڭ الدىنا شىعىپ, وزدەرىنىڭ تالاپتارىن ءبىلدىرگەن ەدى. ءباسپاسوز ءماسليحاتىندا وسى جاي دا نازاردان تىس قالعان جوق.
– ناۋقاستاردىڭ اۋرۋحانا اكىمشىلىگىنىڭ الدىنا قويعان تالاپ-ءتىلەكتەرىنە قاتىستى ايتاتىن بولساق, بۇل جەردە جوعارى ءدارەجەلى ديەتولوگ جۇمىس ىستەيدى, ناۋقاستاردىڭ تاماقتانۋىن ازىق-ءتۇلىكتەردىڭ قۋاتتىلىعىن تۇراقتى قاداعالاپ وتىرادى. ناۋقاستار كۇنىنە بەس مەزگىل تاماق ىشەدى, – دەدى سامات دانياروۆ.
وبلىستىق تۋبەركۋلەزگە قارسى كۇرەس ديسپانسەرىنىڭ باس دارىگەرى نۇرلان اعزاموۆ تالاپ قويۋشى توپتىڭ ءوز باسشىلارى بار, جانجال شىعارۋشىلار سول «كوسەمدەرىنە» بولەك جەكە بولمە سۇرايدى. بۇدان باسقا ولار وسى اۋرۋحانادا وزدەرى باقىلاۋ ورناتىپ, تۇرمەدەگىدەي ءتارتىپتى جۇرگىزىپ, ءبولىمدەردىڭ اراسىندا كۇنى-ءتۇنى ەمىن-ەركىن جۇرگىسى, ويلارىنا كەلگەندەرىن ىستەگىلەرى كەلەدى دەگەندى ايتىپ قالدى.
وبلىستىق تۋبەركۋلەزگە قارسى كۇرەس ديسپانسەرىندە كۇزەت جۇمىستارىن ليتسەنزياسى بار جەكە كۇزەت فيرماسى جۇزەگە اسىرادى ەكەن. وكىنىشكە وراي ولار دا ەمدەۋ ورنىندا ىشكى ءتارتىپتىڭ ساقتالۋىن قامتاماسىز ەتۋدە دارمەنسىزدىك تانىتۋدا. ويتكەنى ۇيىمداسقان توپقا كۇزەت قىزمەتىنىڭ كۇشى جەتە بەرمەيدى. ال ديسپانسەردىڭ باس ءدارىگەرى نۇرلان اعزاموۆ اتالعان ناۋقاستاردى كۇزەتۋدى ىشكى ىستەر ورگاندارى ءوز قولىنا الۋى قاجەتتىگى تۋرالى ماسەلەنى جيىرما جىلدان بەرى كوتەرىپ كەلە جاتقانىن, الايدا ەشقانداي ءناتيجە جوق ەكەندىگىن جەتكىزدى. بۇل ەلىمىزدەگى بارلىق تۋبەركۋلەزگە قارسى كۇرەس ديسپانسەرلەرى باسشىلارىنىڭ باس اۋرۋى كورىنەدى. ديسپانسەردەگى كۇزەت جۇمىستارىن كۇزەتۋدى ىشكى ىستەر ورگاندارى اتقارۋى كەرەك دەيدى دارىگەرلەر ءبىراۋىزدان.
قازىر وبلىستىق تۋبەركۋلەزگە قارسى كۇرەس ديسپانسەرى ىشكى ىستەر باسقارماسى جاساقتارىنىڭ باقىلاۋىنا الىنعان. ارينە, ادام ولىمىنە قاتىستى سوڭعى ءسوزدى قۇقىق قورعاۋ ورگاندارى ايتاتىنى بەلگىلى. ال, جانجال شىعارۋشى توپتىڭ تالاپتارىنىڭ ورىنسىز ەكەنى جوعارىداعى اڭگىمەلەردەن دە اڭعارىلاتىن سياقتى. الايدا, تۇجىرىم جاساۋعا اسىقپايىق, بۇل بۋىنسىز جەرگە پىشاق ۇرۋ ما, الدە اششى شىندىق پا, ونى ارناۋلى كوميسسيا انىقتايتىن بولادى. دەسەك تە, ورىن العان وقىس وقيعا تۋبەركۋلەزگە قارسى كۇرەس ديسپانسەرىندە قوردالانىپ قالعان ءتۇيىندى ماسەلەلەر دە بار ەكەنىن كورسەتەدى.
ساتىبالدى ءساۋىرباي,
اقتوبە وبلىسى.