باتىس قازاقستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى دەنيس وماشەۆتىڭ ايتۋىنشا, بيىلعى ەگىس القابىنىڭ كولەمى 2018 جىلمەن سالىستىرعاندا 25 مىڭ گەكتارعا نەمەسە 4,9% ارتىق ەكەن. نارىقتاعى سۇرانىسقا جانە وندىرىستىك تيىمدىلىگىنە بايلانىستى مايلى داقىلدار القابى 18,2%-عا, كارتوپ 2,4%-عا جانە كوكونىس-باقشا داقىلدارىنىڭ القاپتارى 7,5%-عا ۇلعايادى.
جوبا بويىنشا وڭىردەگى ءداندى داقىلداردىڭ القابى 265,0 مىڭ گا قۇراۋى ءتيىس. ونىڭ ىشىندە 76,6 مىڭ گەكتار القاپ كۇزدىك داقىلدى قۇرايدى.
ەگىلەتىن ءداندى داقىلدىڭ باسىم بولىگىن قۇرايتىنى – بيداي مەن ارپا, بۇلار بارلىق داقىل ءتۇرىنىڭ 90 پايىزى. ودان بولەك 4,4 مىڭ گا تارى دا بار.
مايلى داقىلدار القابى دا 2018 جىلمەن سالىستىرعاندا 10 مىڭ گەكتارعا كوبەيىپ, 64,8 مىڭ گا بولماق. ونىڭ باسىم بولىگى كۇنباعىس 51,0 مىڭ گەكتارعا ەگىلەدى.
بۇدان بولەك 10 000 گا القاپقا كارتوپ جانە كوكونىس-باقشا داقىلدارىن ەگۋ جوسپارلانعان.
گيدرومەتقىزمەت ماماندارى بيىل باتىس قازاقستان وبلىسىندا توپىراقتىڭ جوعارى قاباتىنىڭ ىلعالى مول دەپ وتىر. ونىڭ ۇستىنە ەگىستىك يەلەرى دە قاراپ جاتپاي, قىس بويى 35 مىڭ گەكتار جەردە قار توقتاتۋ جۇمىستارىن جۇرگىزگەن. وسىنىڭ ءبارى بيىلعى ەگىن شىعىمى جاقسى بولادى دەگەن ءۇمىتتى وياتىپ وتىر.
وڭىردە كوكتەمگى ەگىستى جۇرگىزۋگە قاجەتتى تۇقىم قورى جەتكىلىكتى. مىسالى, ءداندى داقىلدار ءۇشىن تۇقىم قورى – 105%, مايلى داقىلدار ءۇشىن – 102, كارتوپ تۇقىمى – 100% دايىن. بۇل تۇقىمدىق قوردىڭ ساپاسىن «قازاگرەكس» اق جانە «ورال-جەر» جشس زەرتحانالارى تەكسەرىپ, «ەگۋگە جارامدى» دەگەن شەشىم شىعارعان.
بيىلعى كوكتەمگى دالالىق جۇمىستارىنا باتىس قازاقستان وبلىسىندا 4215 تراكتور, 4081 دانسەپكىش, 830 قوپسىتقىش جانە «دجون دير», «فلەكسيكويل», «كەيس», «حورش» ماركالى 47 جوعارى ءونىمدى ەگىس كەشەندەرىنىڭ قاتىسادى. بۇگىندە تراكتورلاردىڭ 97%, دانسەپكىشتەردىڭ 96%, قوپسىتقىشتاردىڭ 97% جۇمىسقا دايىن.
كوكتەمگى دالالىق جۇمىستاردى جۇرگىزۋ ءۇشىن وبلىسقا 12 مىڭ توننا (ساۋىرگە - 2 مىڭ توننا, مامىرعا – 6 مىڭ توننا, ماۋسىمعا – 4 مىڭ توننا) ديزەل وتىنى كەرەك. بۇل كولەم ءبولىندى, جەتكىزۋشى وپەراتور بولىپ «باتىس ارنا» جشس انىقتالدى. ديزەل وتىنىنىڭ باعاسى ليترىنە 165 تەڭگەنى قۇرايدى.
- كوكتەمگى ەگىس جۇمىستارىن قارجىلاندىرۋعا «كەڭدالا» باعدارلاماسى ارقىلى 291,5 ملن. تەڭگە قاراستىرىلعان, ول 7%-دىق مولشەرلەمەمەن بەرىلەدى. قارجى «اگرارلىق نەسيە كورپوراتسياسى» اق وبلىستىق فيليالىنىڭ اۋداندىق نەسيە سەرىكتەستىكتەرى ارقىلى اۋىل شارۋاشىلىق تاۋار ءوندىرۋشى 15 ۇيىمعا بەرىلدى. بۇدان بولەك «اگروبيزنەس» باعدارلاماسى بويىنشا 16%-دىق مولشەرلەمەسى بار 559 ملن. تەڭگە قاراستىرىلعان, - دەيدى «اگرارلىق نەسيە كورپوراتسياسى» اق بقو فيليالىنىڭ ديرەكتورى ەرلان نىسانعاليەۆ.
«كازاگروقارجى» اق باتىس قازاقستان وبلىستىق فيليالى ديرەكتورىنىڭ ورىنباسارى امانگەلدى يمانوۆ وڭىردە تەحنيكا ليزينگىسىنە 2900 ملن. تەڭگە قارالعانىن, قازىرگى ۋاقىتتا شارۋاشىلىقتار 1050 ملن. تەڭگەگە 80 بىرلىك تەحنيكا ساتىپ العانىن ايتىپ وتىر.
باتىس قازاقستان وبلىسى