بيىل اقپان ايىندا وبلىس اكىمدىگىنىڭ قاۋلىسىنا سايكەس جەدەل مەديتسينالىق كومەكتىڭ اۋداندىق بولىمشەلەرىن وڭتايلاندىرۋ ءىسى جۇزەگە اسقان بولاتىن. اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, بۇل ۇساق قۇرىلىمدار «العاشقى كومەك» جشس قۇرامىنا قوسىلعان. سونىمەن بىرگە جول كارتاسىندا قاراستىرىلعان شارالار كەشەنىنە ءسايكەس قالا ەمحانالارىنىڭ جانىنان شۇعىل مەديتسينالىق كومەك بەرۋ قوسىندارى قۇرىلعان. ونىڭ ءبارى دە تاۋلىك بويى جۇمىس ىستەيدى. قوسىنداردىڭ قىزمەتى جەدەلدىكتىڭ ءتورتىنشى دارەجەسىنە سايكەس كەلەدى.
وسى ورايدا جەدەلدىكتىڭ ءتورتىنشى دارەجەسى دەگەن تىركەسكە ءتۇسىنىكتەمە بەرە كەتكەن ءجون. جەدەل جاردەم ماماندارىنىڭ ءمالىمدەۋىنشە, شۇعىل مەديتسينالىق كومەك كورسەتۋ جەدەلدىكتىڭ ءتورت دارەجەسىمەن تاڭبالانادى. مىسالى, ءينسۋلتتىڭ اۋىر تۇرلەرى, جۇرەك تالماسى, اۋىر جاراقات الۋ كەزىندەگى شاقىرۋلار ءبىرىنشى دارەجە قاتارىنا كىرەدى ەكەن. مۇنداي جاعدايدا جەدەل جاردەمنىڭ كەلۋ ۋاقىتى بارىنشا تەز بولاتىنى ايتپاسا دا تۇسىنىكتى.
بۇگىندە ءوڭىر تۇرعىندارىنا 67 جەدەل مەديتسينالىق جاردەم بريگادالارى كومەك كورسەتەدى. سونىڭ ىشىندە وبلىس ورتالىعىندا 52 دارىگەرلىك-فەلدشەرلىك بريگادالار تاۋلىك بويى جۇمىس ىستەيدى. تۇرعىنداردى اتالعان كومەكپەن قامتۋ سانى مەن كولەمى جىل باسىندا وبلىس بويىنشا 870 مىڭعا جۋىق ادامدى قۇرادى. اتالعان كورسەتكىش اقتوبە قالاسى بويىنشا 510 مىڭ ادامنان اسىپ تۇسەدى. ال بريگادالار مەن اۆتوكولىكتەردىڭ سانىنا كەلسەك, بۇل مولشەر الدىن الا بەلگىلەنگەن تالاپتار مەن نورماتيۆتەرگە سايكەس كەلەدى.
مۇنداعى باستى ولشەم ءار 10 مىڭ تۇرعىنعا شاققاندا 1 سانيتارلىق اۆتوكولىك بريگاداسى قىزمەت كورسەتۋگە ەسەپتەلگەن. جەدەل جاردەم بريگادالارىنىڭ قىزمەت كورسەتۋ راديۋسى اقتوبە قالاسىندا 35 شاقىرىمدى قۇرايدى. مۇنداعى مولشەرلى ۋاقىت شەگى, ياعني شاقىرىلعان سىرقاتقا جەدەل ءجاردەم اۆتوكولىگىنىڭ جەتۋ ۋاقىتى 15 مينۋتتان اسپايدى. بىلتىرعى كورسەتكىشتەرگە سايكەس مەديتسينالىق كومەك كورسەتۋ قىزمەتكەرلەرى ءبىر جىل ىشىندە 300 مىڭعا جۋىق شاقىرۋدى قامتىعان. ونىڭ باسىم بولىگى اقتوبە قالاسى تۇرعىندارىنىڭ ۇلەسىنە تيەدى. ايتالىق, وتكەن جىلى قالا بويىنشا ناۋقاسقا كەلۋ كورسەتكىشى 5,7 مينۋتتى كورسەتتى. بۇدان كەيىنگى دارەجەلەر بويىنشا 9,2-11,3 جانە 15,9 مينۋتتا جەدەل جاردەمنىڭ جەتۋى ءتىركەلگەن.
ارينە ءومىر بولعان سوڭ, جەدەل شاقىرۋلارعا كەشىگىپ بارۋ كورىنىستەرى كەزدەسپەي تۇرمايدى. تۇرعىنداردىڭ وكپە-رەنىشتەرى كوبىنە وسىنداي جاعدايدا تۋىندايتىنى بەلگىلى. دەگەنمەن, بيىل مۇنداي كورسەتكىشتەردىڭ ازايعانى ايقىن كورىنەدى. سونىمەن بىرگە جەدەل مەديتسينالىق كومەك بەرۋ قۇرىلىمدارىنىڭ ماتەريالدىق-تەحنيكالىق بازاسى جىل سايىن جاقسارىپ كەلەدى. شاقىرۋلار بويىنشا جولعا شىققان دارىگەرلىك-فەلدشەرلىك بريگادالاردىڭ ءىس-قيمىلدارىن باقىلاۋ تەتىكتەرى دە تەرەڭدەي تۇسۋدە. سونداي-اق وبلىستا دارىگەرلىك-فەلدشەرلىك جانە جۇرگىزۋشىلىك قۇرامداردىڭ بىلىكتىلىگىن كوتەرۋ ءىسى جۇيەلى جولعا قويىلعان.
تەمىر قۇسايىن,
«Egemen Qazaqstan»
اقتوبە