تورعايداعى مۋزەيلەر كەشەنىنە الاش ارداقتىلارىنىڭ ەنتسيكلوپەدياسى تابىس ەتىلدى

بۇل كىتاپتاردىڭ شىققانىنا ءبىر-ەكى جىل بولعانىمەن شالعايدا جاتقان جانگەلدين اۋدانىنا ءالى جەتپەگەن بولاتىن. سونىڭ جاقىندا ءساتى ءتۇستى. وبلىسقا ىسساپارمەن كەلگەن مادەنيەت جانە سپورت مينيسترلىگىنىڭ ءتىل ساياساتى كوميتەتىنىڭ توراعاسى قۋات بوراش, ش.شاياحمەتوۆ اتىنداعى «ءتىل قازىنا» ۇلتتىق عىلىمي-پراكتيكالىق ورتالىعى باس ديرەكتورىنىڭ مىندەتىن اتقارۋشى ەربول تىلەش, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى ساعىمباي جۇماعۇلوۆ تورعاي قالاسىنا ارنايى سوعىپ, مۋزەيلەر كەشەنىنە وسى ەنتسيكلوپپەديالار مەن الاش ارداقتىلارى تۋرالى باسقا دا كىتاپتاردى تاپسىردى.

«مۋزەي قازىر جۇرت تەك جادىگەرلەردى كورىپ, قىزىقتايتىن ورىن عانا ەمەس, اۋدانداعى, جالپى تورعاي ءوڭىرى توڭىرەگىندەگى كوللەدجدەر مەن مەكتەپ وقۋشىلارى جانە  الاش  ارىستارى تۋرالى ماتەريال ىزدەگەن وزگە عالىمدار مەن جۋرناليستەر ءۇشىن قورعا دا اينالىپ كەلە جاتىر. جاستار الاش ارداقتىلارى تۋرالى ماتەريال ىزدەگەندە وسى كىتاپتار تاپتىرمايتىن  دۇنيەنىڭ ءبىرى» دەيدى مۋزەي كەشەنىنىڭ ديرەكتورى گۇلبانۋ سارسەكەي.

تورعايعا كەلگەن قوناقتار احمەت بايتۇرسىنوۆتىڭ كىندىك قانى تامعان اقكولگە, ۇلى ادامنىڭ تۋعان ۇيىنە سوعۋدى دا جوسپارلاعان ەكەن. بىراق كوكتەمگى قار ەرۋىنە بايلانىستى جولدىڭ ناشارلىعىنان جارتى جولدان قايتۋىنا تۋرا كەلىپتى.

«احمەت بايتۇرسىنوۆ تۋعان ءۇيدى اۋىلداستار, احاڭ ۇرپاقتارى اسارلاتىپ كوتەرىپ قويعان ەدى. بۇل ءبىر جاعىنان كەلۋشىلەر ءۇشىن تانىمدىق ماڭىزى كۇشتى, تۋريستەر تارتۋعا دا, اسىرەسە, ىشكى ءتۋريزمدى دامىتۋعا سۇرانىپ تۇرعان نىسان ەكەنىندە داۋ جوق. الايدا اۋىلداستار قام كەسەكتەن سوققان ءۇي, ونىڭ ۇستىنە قىسىمەن وت جاعىلماعان سوڭ, ونىڭ توزۋى دا تەز. ارينە, كەلگەن عالىمداردى احاڭ ءۇيىنىڭ عىلىمي-تانىمدىق جاعى قاتتى قىزىقتىرعانى ءسوزسىز. الداعى ۋاقىتتا ول جاققا جول دا تۇزەلەدى, احاڭ ءۇيى دە جوندەلەدى دەپ ويلايمىز» دەيدى گۇلبانۋ سارسەكەي.

تورعايعا كەلگەن عالىمدار جەرگىلىكتى تۇرعىندارمەن كەزدەسۋ وتكىزدى. تورعايدىڭ كىمدى دە رۋحاني بايىتاتىن تاعىلىمدى سۇلۋ تاريحىنان قىزىقتى اڭگىمەلەر ايتىلدى.

ءنازيرا جارىمبەت,

«ەگەمەن قازاقستان»

قوستاناي