كەشە تۇندە قورعاستىق شەكاراشىلار جالپى قۇنى 6 950 000 تەڭگەنىڭ تاۋارىن ەلىمىزگە كونتراباندالىق جولمەن ەنگىزبەك بولعان ءۇش قازاقستان ازاماتىن ۇستادى. بۇل تۋرالى ۇقك شق ءباسپاسوز قىزمەتى حابارلادى.
كونترابانداشىلار «گولدەن دير» جانە «اليۋر» ماركالى تەمەكى ونىمدەرى تولتىرىلعان 35 قوراپتى الدىن الا حالىقارالىق شەكارا بويى ىنتىماقتاستىعى ورتالىعىنىڭ اۋماعىنداعى شەتەلدەرمەن قاتىناساتىن اۆتوكولىكتەر تۇراعىنىڭ ماڭايىنداعى ارىققا جاسىرىپ كەتىپتى. ونى كەشكىسىن ورتالىق اۋماعىن ارالاپ جۇرگەن شەكارا ناريادى تاۋىپ العان.
قىلمىسكەرلەردىڭ ويلارىن ارىدەن اڭعارعان شەكاراشىلار تاۋار تابىلعان جەرگە توسقاۋىل قويادى. ءتۇن قاراڭعىلىعىن جامىلىپ, ساعات 4-تەر شاماسىندا سول جاققا قاراي جاسىرىن كەلە جاتقان 28, 29 جاستارداعى ءۇش جىگىت قىلمىس ۇستىندە قولعا ءتۇستى. ىسپەن پانفيلوۆ اۋداندىق پوليتسيا ءبولىمى اينالىسۋدا.