كەشە پرەمەر-ءمينيستردىڭ ورىنباسارى گۇلشارا ابدىقالىقوۆا باستاعان جۇمىس توبى اقمولا وبلىسىندا بولىپ, ەلباسى نۇرسۇلتان نازارباەۆتىڭ «Nur Otan» پارتياسىنىڭ ءحVىىى سەزىندە الەۋمەتتىك قولداۋدى كۇشەيتۋ, حالىقتىڭ ءومىر ءسۇرۋ ساپاسىن جاقسارتۋ باعىتىنداعى قويعان مىندەتتەر ۇدەسىنەن شىعۋ ءۇشىن اتقارىلىپ جاتقان جۇمىستاردى تانىستىردى.
كەزدەسۋگە كوپ بالالى وتباسىلاردىڭ, مەملەكەتتىك قولداۋعا مۇقتاج, الەۋمەتتىك جاعىنان وسال توپتاردىڭ وكىلدەرى كوپتەپ جينالدى. ەڭبەك جانە حالىقتى الەۋمەتتىك قورعاۋ ءمينيسترى ب.ساپارباەۆ, دەنساۋلىق ساقتاۋ ءمينيسترى ە.ءبىرتانوۆ, يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى م.جايىمبەتوۆ كەزدەسۋ بارىسىندا ەلباسى تاپسىرماسىن جۇزەگە اسىرۋعا بايلانىستى ماسەلەلەرگە كەڭىنەن توقتالىپ, ءتۇسىندىرىپ بەردى.
– ەلىمىزدىڭ باتىسىنداعى بىرقاتار وبلىستاردى ارالاپ, الەۋمەتتىك قامقورلىق شارالارى جايىندا ەل ىشىندە ءتۇسىندىرۋ جۇمىستارىن جۇرگىزدىك. ول وڭىرلەردەگى كوكەيكەستى ماسەلەلەردى سارالاۋدامىز. بۇگىنگى كۇنى ەلىمىزدە جاڭا سەرپىندى دامۋ كەزەڭى باستالدى, – دەدى پرەمەر-ءمينيستردىڭ ورىنباسارى گۇلشارا ابدىقالىقوۆا. بارلىق جەردە ەڭ باستى ماسەلە تۇرعىن ۇيگە تىرەلىپ وتىرعاندىعىن كورىپ وتىرمىز.
گ.ابدىقالىقوۆا اتاپ كورسەتكەندەي, نەگىزگى جۇمىس ءۇش باعىتتا ءوربيدى. ونىڭ ىشىندە ەڭ از قامتىلعان وتباسىلارعا اتاۋلى كومەك كورسەتۋ, سونداي-اق مەديتسينا جانە ءبىلىم سالاسىنا قاتىستى ماسەلەلەر بار. بۇل ورايدا, مەديتسينانىڭ العاشقى قولجەتىمدىلىگى, ءدارى-دارمەكتىڭ ساپاسى جانە باعاسىنا كوڭىل بولىنەدى. اۋىلدىڭ ەڭسەسىن كوتەرۋ دە كەزەك كۇتتىرمەيتىن ماسەلە. بۇل ورايدا مىناداي جاقسى جاڭالىقتى ەكپىن تۇسىرە ايتا كەتكەن ورىندى بولماق. ماسەلەن, كوپ بالالى اۋىل تۇرعىندارىنا جاڭا بيزنەس-يدەيالاردى ىسكە اسىرۋ ءۇشىن كولەمى 500 مىڭ تەڭگەدەن 20 ميلليون تەڭگەگە دەيىن مەملەكەتتىك گرانتتار مەن شاعىن نەسيەلەر بەرىلەدى.
– ءبىز مۇگەدەكتەرگە ءوز كاسىپتەرىن اشۋ ءۇشىن كومەك كورسەتۋىمىز قاجەت, – دەدى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ. – كوپ بالالى انالار مەن مۇگەدەك بالالاردى تاربيەلەپ وتىرعان انالار ءۇشىن ۇيدە الەۋمەتتىك جۇمىس ورىندارىن اشۋ ۇيىمداستىرىلادى. بۇل ورايدا جەرگىلىكتى اكىمدىكتەرمەن جۇمىس جۇرگىزۋدەمىز. ۇيدە وتىرىپ-اق قارجى تابۋعا بولادى. ول ءۇشىن الەۋمەتتىك جۇمىس ورىندارىن اشۋمەن بىرگە, سۇرانىسقا يە كاسىپتەرگە قىسقا مەرزىمدە وقىتىپ ۇيرەتەتىن كۋرستار ۇيىمداستىرىلۋى كەرەك.
حالىقتىڭ ءال-اۋقاتىن ارتتىراتىن باستى جايت – جالاقى مولشەرى. 2019 جىلدىڭ 1 ماۋسىمىنان باستاپ ءبىلىم بەرۋ سالاسىنداعى قىزمەتكەرلەردىڭ تابىسىن 30 پايىزعا دەيىن كوبەيتۋ كوزدەلىپ وتىر. مەكتەپكە دەيىنگى ۇيىمداردىڭ تاربيەشىلەرى, ولاردىڭ كومەكشىلەرى, ينتەرنات مەكەمەلەرىنىڭ تاربيەشىلەرى, ادىسكەرلەر, بالاباقشالار مەن كوللەدجدەردىڭ الەۋمەتتىك پەداگوگتارى, پسيحولوگتار, قوسىمشا ءبىلىم بەرۋ ۇيىمدارىنىڭ قىزمەتكەرلەرى, تەحنيكالىق پەرسونالدىڭ جالاقىلارى جوعارىداعى ايتىلعان مولشەردە وسەتىن بولادى. دەنساۋلىق ساقتاۋ ۇيىمدارى قىزمەتكەرلەرىنىڭ جالاقىسى دا 30 پايىزعا كوتەرىلەدى دەپ مەجەلەنىپ وتىر.
وڭىرلەردى دامىتۋ ماسەلەسى دە باستى نازاردا. «قۇتتى مەكەن» جوباسىنا مەملەكەتتەن 920 ميلليارد تەڭگە بولىنبەك. بۇل قارجىنىڭ ءبىراز بولىگى الماتى, استانا, شىمكەنت قالالارى ماڭىنداعى ينفراقۇرىلىمدى جاقسارتۋعا جۇمسالادى. اتاپ ايتاتىن بولساق, وسى ماقساتقا 90 ميلليارد تەڭگە جۇمسالماق. مونوقالالاردى دامىتۋعا 30 ميلليارد تەڭگە باعىتتالماق.
ءالى كۇنگە دەيىن شەشىمىن تاپپاي وتىرعان اۋىز سۋ ماسەلەسى دە بار. بۇل ماسەلە اقمولا وبلىسىنا دا قاتىستى. ويتكەنى ءوڭىردىڭ بىرنەشە ەلدى مەكەنى ءالى كۇنگە اۋىز سۋدى اشىق سۋ كوزدەرىنەن الىپ پايدالانۋدا. تاسىمالداپ ءىشىپ وتىرعاندار دا از ەمەس. مىنە, وسىنداي قيىن ءتۇيىندى شەشۋ ءۇشىن جالپى ەلىمىز بويىنشا 140 ميلليارد تەڭگە جۇمسالماق. گاز جانە ەلەكترمەن قامتاماسىز ەتۋ باعىتىنا 190 ميلليارد تەڭگە كوزدەلگەن. ەل ىشىندەگى ءتۇيىندى ماسەلەنىڭ ءبىرى – جول. جول ماسەلەسىن شەشۋگە, جەرگىلىكتى جولداردىڭ جەلىسىن كەڭەيتۋگە 350 ميلليارد تەڭگە قاراستىرىلسا, دەنساۋلىق ساقتاۋ سالاسىن دامىتۋعا 120 ميلليارد تەڭگە ءبولىنىپ وتىر.
– مەديتسينانىڭ قولجەتىمدىلىگىن قامتاماسىز ەتىپ, ساپاسىن جاقسارتۋ بارىسىندا ەڭ الدىمەن كادر ماسەلەسىن شەشۋىمىز كەرەك, – دەدى دەنساۋلىق ساقتاۋ ءمينيسترى ەلجان ءبىرتانوۆ. – قازىرگى كۇنى كەيبىر دارىگەرلەر مامان كادرلار جەتىسپەگەندىكتەن, ءبىر جارىم جۇكتەمەمەن جۇمىس ىستەپ ءجۇر. سوندىقتان الداعى ۋاقىتتا جوعارى وقۋ ورنىندا گرانت بويىنشا ءبىلىم العان تۇلەكتىڭ جەرگىلىكتى جەردە ءۇش جىل قىزمەت ەتۋىن مىندەتتەۋىمىز قاجەت.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ كوپ بالالى وتباسىلارعا تۇرعىن ءۇي سالۋ ماسەلەسى جانە ول پاتەرلەردىڭ كىمدەرگە بەرىلەتىندىگى تۋرالى تۇسىنىكتى ەتىپ ايتىپ بەردى. سونداي-اق ەلدى مەكەندەردى تازا اۋىز سۋمەن قامتۋ ماسەلەسىنە دە توقتالدى. الداعى جەتى جىل ىشىندە وسى ماقساتقا مەملەكەتتەن 140 ميلليارد تەڭگە قاراجات بولىنبەك. باعدارلاما جۇزەگە اسقان كەزدە بارلىق ەلدى مەكەن تازا سۋمەن قامتاماسىز ەتىلەتىن بولادى. استانا توڭىرەگىندەگى ەلدى مەكەندەردە دە بىرقاتار ءتۇيىندى جايلاردىڭ بار ەكەندىگى بەلگىلى. ماسەلەن, قوسشى, قوياندى, تالاپكەر اۋىلدارى. ول جەرلەردەگى قيىن ءتۇيىن شەشىمىن تاپقان سوڭ وبلىس ورتالىعىنا ىرگەلەس قونىستانعان ەلدى مەكەندەردىڭ ماسەلەلەرى دە مۇنداي جاناشىرلىقتان قالىس قالمايدى.
مۇنان سوڭ كوپشىلىك تاراپىنان وزدەرىن تولعاندىرىپ جۇرگەن سۇراقتار قويىلدى. الدىمەن ءسوز العان «اسىل انالار» قوعامدىق بىرلەستىگىنىڭ ءتورايىمى اسەل بازارباەۆا اليمەنت ماسەلەسىن كوتەردى. بۇل ءبىر قوعامدىق دەرتكە اينالىپ كەتكەن جاي. سۇراق قويۋشىنىڭ ايتۋىنا قاراعاندا, ناقتى ءبىر ادامنىڭ اليمەنتكە قارىزى 11 ميلليون تەڭگەگە دەيىن جەتكەن. كوپ بالالى انالار دا اليمەنتتەرىن وندىرە الماي ءجۇر. بۇل سۇراققا پرەمەر-ءمينيستردىڭ ورىنباسارى گۇلشارا ابدىقالىقوۆا جاۋاپ بەردى.
– وڭىرلەردى ارالاعان كەزدە جالپىعا ورتاق وسىنداي ساۋالدار قويىلۋدا. مەن تاياۋدا جوعارعى سوت توراعاسىمەن كەزدەستىم. ارنايى كوميسسيادا ماسەلەنى قالاي شەشۋگە بولاتىندىعىن ويلاستىراتىن بولامىز. شىنىن ايتۋ كەرەك, بۇل جەردە تابىسىن جاسىرىپ وتىرعان ادامداردىڭ دا بار ەكەندىگى بەلگىلى بولىپ وتىر. سوندىقتان تاياۋ ارادا ءتيىمدى شارا ءتۇرىن ويلاستىرامىز.
«Nur Otan» پارتياسىنىڭ حاتشىسى فارحاد قۋانعانوۆ بۇگىنگى كەزدەسۋدە ءسوز بولىپ وتىرعان بارلىق ماسەلەلەردىڭ پارتيا تاراپىنان قاتاڭ باقىلاۋعا الىنعاندىعىن, ەل يگىلىگىن مولايتاتىن جايلاردىڭ جۇزەگە اسۋىنا كومەك بەرىلەتىندىگىن تىلگە تيەك ەتتى.
ەكى كۇندىك جۇمىس ساپارىنىڭ العاشقى كۇنى پرەمەر-ءمينيستردىڭ ورىنباسارى گۇلشارا ابدىقالىقوۆا باستاعان جۇمىس توبى كوكشەتاۋ قالاسىنداعى «كوكشەتاۋ مينەرالدى سۋلارى» اكتسيونەرلىك قوعامى, «ازاماتتارعا ارنالعان ۇكىمەت» كوممەرتسيالىق ەمەس اكتسيونەرلىك قوعامىندا, بىرقاتار مەملەكەتتىك مەكەمەلەر مەن ۇجىمداردا, كاسىپورىنداردا بولىپ, حالىققا الەۋمەتتىك قولداۋدىڭ ءمانىن ءتۇسىندىردى. كەزدەسۋ بارىسىندا ەڭبەكاقى, ەڭبەك قاۋىپسىزدىگىن ساقتاۋ, ءوندىرىس كولەمىن ارتتىرۋ, دەنساۋلىق سالاسىنىڭ جۇمىسىن جاقسارتۋ تۋرالى ماسەلەلەر كوتەرىلدى.
بايقال ءبايادىل,
«Egemen Qazaqstan»
اقمولا وبلىسى