بيلىككە قول جەتكىزۋ ءۇشىن اقىل, ەرىك-جىگەر كەرەك. ال سول بيلىكتەن ءوز ەركىڭمەن كەتۋ ءۇشىن باتىلدىق قاجەت. وسى ورايدا, نۇرسۇلتان نازارباەۆ قازاقستان حالقى ءۇشىن دانالىقتىڭ, جاۋاپتى باسقارۋشىنىڭ, سونىمەن بىرگە باتىلدىقتىڭ سيمۆولىنا اينالىپ وتىر.
بۇگىندە قازاقستاندىقتار عانا ەمەس, بۇكىل الەم جۇرتشىلىعى نۇرسۇلتان نازارباەۆتىڭ جەكە باسىنىڭ قاسيەتتەرىن, ەگەمەندى قازاقستاننىڭ ساياسي جۇيەسى نەگىزدەرىن جانە جوعارعى بيلىكتى وزگەرتۋدىڭ مادەنيەتى مەن وزىق ءداستۇرىن قالىپتاستىرۋداعى تاريحي ءرولىن وڭ باعالاۋدا.
مەملەكەت باسشىسىنىڭ ءوز ەركىمەن وكىلەتتىگىنەن باس تارتۋى پوستكەڭەستىك كەڭىستىكتە العاش رەت بولىپ وتىر. كوپتەگەن ەلدەردە بيلىكتىڭ اۋىسۋى كەزىندە كىسى ءولىمى, توڭكەرىس نەمەسە سايلاۋدا جەڭىلىس تابۋ ورىن الادى.
مۇنى ەلتسيننىڭ تاجىريبەسىمەن سالىستىرۋعا بولمايدى, ويتكەنى ونىڭ ورنىنان ءتۇسۋى كەزىندە رەسەيدىڭ ءبىرىنشى پرەزيدەنتىنىڭ رەيتينگى ەڭ از سىني ولشەمدەردەن تومەن بولدى.
ەلباسى پرەزيدەنتتىك قىزمەتىن ءوزىنىڭ بيىك بەدەلىن ساقتاي وتىرىپ اياقتادى. بۇل سوزىمىزگە حالىق تاراپىنان بۇقارالىق اقپارات قۇرالدارى مەن الەۋمەتتىك جەلىلەر ارقىلى ايتىلعان پىكىرلەر دالەل بولا الادى. سونداي-اق تۋىستارىمىزدىڭ جانە ارىپتەستەرىمىزدىڭ تاۋەلسىز ەلىمىزدىڭ نەگىزىن سالۋشى – ەلباسى نۇرسۇلتان ءابىش ۇلى نازارباەۆتىڭ جاساعان بارلىق ىستەرى ءۇشىن العىسىن ايتىپ, ونىڭ ءوز وكىلەتتىگىن توقتاتقانىنا وكىنىشىن بىلدىرگەن پىكىرلەرىن دە كوپتەپ ەستىپ جاتىرمىز.
تاريح, كەلەر ۇرپاق ءالى نۇرسۇلتان نازارباەۆتىڭ ەلىنە جاساعان قىزمەتىنىڭ, سونداي-اق پرەزيدەنتتىك وكىلەتتىگىن ءوز ەركىمەن توقتاتۋىنىڭ ءادىل باعاسىن بەرەتىن بولادى. ول بيلىكتىڭ ەرىكسىز تۇردە اۋىسۋىنىڭ الدىن الدى. ەلباسى ءوز بيلىگىن توقتاتۋعا دايىندىقپەن كەلدى. ەلباسى «مايدان قىل سۋىرعانداي» ەپتىلىكپەن, بارلىق پروتسەدۋرالىق جانە كونستيتۋتسيالىق تالاپتاردى ساقتاپ, پروتسەستىڭ تازالىعىن قامتاماسىز ەتە وتىرىپ ءوز شەشىمىن قابىلدادى. ول وسى قادامى ارقىلى ۇرپاققا ۇلگى-ونەگە قالدىردى. دالىرەگى, ەلباسى ۇرپاققا قازاقستاندا الداعى ۋاقىتتا بيلىكتىڭ اۋىستىرۋدىڭ ءتيىمدى جولىن, حالىقتىڭ مۇددەسىن بارىنشا ەسكەرە وتىرىپ جۇزەگە اسىرۋ قاجەتتىگىن اڭعارتتى.
ءبىز تاۋەلسىز ءومىر سۇرۋگە ۇيرەنۋىمىز كەرەك. ساياسي تاڭداۋعا جاۋاپكەرشىلىكپەن قاراعان ابزال. بۇل ورايدا دەپۋتاتتار مەن پرەزيدەنتتى سايلاۋ, جەرگىلىكتى بيلىك ورگاندارىمەن سىندارلى ديالوگ جۇرگىزۋ, بيۋدجەتتى جانە دامۋ باعدارلامالارىن باقىلاۋدى جۇزەگە اسىرۋ ماڭىزدى. نۇرسۇلتان نازارباەۆتىڭ ءتيىستى زاڭداردى العا جىلجىتۋ جانە بيلىك تارماقتارى اراسىنداعى وكىلەتتىكتەردى ءبولۋ ماسەلەلەرىندە كوپ ۇلگى كورسەتتى.
بىزگە حالقىمىزدىڭ بىرلىگى مەن ىنتىماعىن ساقتاۋ اسا ماڭىزدى. بۇل ورايدا قازاق حالقى نەگىزگى جاۋاپكەرشىلىكتى ءوز موينىنا الۋ كەرەك. ەلباسىمىز حالىقتى ەلىمىزدى ساقتاۋعا, بەيبىتشىلىك پەن بىرلىكتى نىعايتۋعا ۇنەمى شاقىرىپ كەلەدى. ءبىزدىڭ بىرلىگىمىز, تاتۋلىعىمىز باعا جەتپەس قۇندىلىعىمىز. تىنىشتىق پەن تاتۋلىقتى تۋ ەتكەنىمىز ءۇشىن حالقىمىزدى بارلىق الەم سىيلايدى, قۇرمەتتەيدى ءارى دانا, بەيبىتشىلىكتى جاقتايتىن ۇلت رەتىندە تانيدى.
بيلىكتىڭ اۋىسۋىنا ۇرەيمەن قاراۋدىڭ قاجەتى جوق. ەلىمىزدىڭ جاڭا پرەزيدەنتى قاسىم-جومارت توقاەۆ ەلباسى نۇرسۇلتان نازارباەۆتىڭ سەنىمدى سەرىگى ءارى شاكىرتى. ول ن.نازارباەۆتىڭ ساياساتىن ودان ءارى جالعاستىرادى. ق.توقاەۆ ءوز ۇستازىنىڭ ۇستانعان باعىتىنا سەنەدى. كوپ ۆەكتورلى سىرتقى ساياساتىمىزدىڭ نەگىزگى ساۋلەتشىلەرىنىڭ ءبىرى رەتىندە ق.توقاەۆ ءبىزدىڭ وڭىردە ءوز مۇددەلەرى بار نەگىزگى گەوساياسي ويىنشىلار اراسىنداعى تەڭگەرىمدى قامتاماسىز ەتۋدى سەنىمدى تۇردە جالعاستىرا الادى.
نۇرسۇلتان نازارباەۆ ەلىمىزدە امەريكاشىل, قىتايشىل نەمەسە رەسەيشىل كوشباسشى بولماۋى قاجەتتىگىن, قازاقستاندى مەملەكەتتىك مۇددەلەرىمىزگە ساي قىزمەت ەتەتىن, تاۋەلسىزدىگىمىزگە قۇرمەتپەن قارايتىن تۇلعانىڭ باسقارعانىن قالايتىنىن ۇقتىردى.
ەلىمىز ساياسي دامۋدىڭ جاڭا كەزەڭىنە شىعادى. الدىمىزدا پرەزيدەنتتىك سايلاۋ تۇر. بۇل سايلاۋدا جاڭا تۇلعالار تانىلادى. وسى ساياسي ناۋقان حالقىمىز ءۇشىن ۇلكەن سىن. ءبىز ەلىمىزدىڭ, ءوزىمىزدىڭ تاعدىرىمىزعا تىكەلەي اسەر ەتەتىن جاۋاپتى تاڭداۋ مۇمكىندىگىنە يە بولامىز. بۇل ءوز كەزەگىندە ءبىزدىڭ حالقىمىز ءۇشىن جەتىلۋ سىناعى بولماق. قالاي دەسەك تە, حالىق وسى ساياسي ناۋقاندا ءوزىنىڭ دۇرىس تاڭداۋىن جاسايدى دەگەن سەنىم مول. ەلىمىز امان, جۇرتىمىز تىنىش بولسىن.
تالعات قاليەۆ,
ساياساتتانۋشى