بۇل كورمە اۋىل شارۋاشىلىعىنىڭ بارلىق باعىتتارىن قامتيدى. مۇندا سالانى تسيفرلاندىرۋعا قاجەتتى جابدىقتارى, اۋىل شارۋاشىلىعى تەحنيكالارى مەن قۇرالدارى, تىڭايتقىشتار مەن وسىمدىك زيانكەستەرىنە قارسى ءدارى-دارمەكتەر, مال شارۋاشىلىعىنا قاجەتتى زاتتار مەن تەحنيكا, ۆەتەرينارلىق تەحنولوگيالار, جەم-ازىق تۇرلەرىنىڭ بارلىعى قامتىلدى. كورمەگە قازاقستاننان, رەسەيدەن, تاتارستاننان, بەلورۋستان 70-كە جۋىق كومپانيا ءوز ونىمدەرىن اكەلدى.
ونىڭ ىشىندە اۋىل شارۋاشىلىعى تەحنيكالارىن, تىڭايتقىش, وسىمدىك قورعاۋ حيميالىق زاتتارىن ۇسىناتىن «IMEXGroup»جشس, «وميچكا» سەيالكاسىن وندىرەتىن «ل-اگرو» «ەۆروسيباگرو» سوك» سەكىلدى ءىرى كومپانيالار دا بار. وبلىس اكىمىنىڭ ورىنباسارى عاۋەز نۇرمۇحامبەتوۆ كورمەنىڭ وتكىزىلۋى ءوڭىر ەكونوميكاسىن دامىتۋعا دەگەن ماڭىزدى شارانىڭ بىرىنەن سانالاتىنىن ايتتى.
«اۋىل شارۋاشىلىعىن دامىتۋعا قازىر وزىق تەحنولوگيالار قاجەت. ال ول تەحنيكاسىز, تىڭايتقىشسىز جانە ۆەتەرينارلىق ءدارى-دارمەكسىز مۇمكىن ەمەس. سوندىقتان وسىنداي كورمەلەر شارۋا مەن ديقاندارعا جاسالىپ وتىرعان ۇلكەن مۇمكىندىك بولىپ تابىلادى. وسىمەن وبلىستا بەسىنشى رەت ءوتىپ وتىرعان كورمەگە رەسەيدەن, بەلورۋستان ءبىزدىڭ اۋىلشارۋاشىلىعى تاۋارلارىن وندىرۋشىلەرگە تانىس ەمەس جاڭا كومپانيالاردى شاقىرۋدى ماقسات تۇتتىق. ولارمەن جۇمىس ىستەۋگە بارىنشا مۇمكىندىك تۋىپ وتىر» دەدى عاۋەز تورسان ۇلى.
راسىندا, كورمەنىڭ جاڭالىقتارى بولماي قالمادى. مىسالى, «ديقان» ساۋدا ءۇيى «VibroCompact JCC 08121.C1A1» استىق تازالايتىن ماشيناسىن كورسەتۋگە اكەلىپتى. چەحيادان الىنعان بۇل ماشينا كەز كەلگەن ءداندى تازالايدى, ودان شىققان قالدىقتى قايتا تازالاپ, مال جەمى دەڭگەيىنە كوتەرەدى.
«قازىر شارۋاشىلىقتار مايلى داقىلداردى كوپ ەگىپ جاتىر. ولاردى تازالاۋدا بۇل ماشينانىڭ بالاماسى جوق. قازاقستانعا بەس ماشينا اكەلدىك, ولار جۇمىس ىستەپ تۇر, ديقاندار وتە ريزا» دەيدى استانادان كەلگەن اناتولي بارانوۆ.
«ەگىنمەن, مالمەن اينالىسامىز. قازىر تەحنيكالاردىڭ وتە جاقسى, ۇتىمدى تۇرلەرى شىعىپ جاتىر. مىسالى كومبايندار وتە قاجەت, تەحنيكانى جاڭالاعىمىز كەلەدى. تەحنيكالار ديقان ءۇشىن قىمباتتاۋ, بىراق الۋ كەرەك» دەيدى كاسىپكەر جاۋقاشتى قاليەۆ.
كورمە تاڭەرتەڭنەن كەشكە دەيىن ءوتتى. «اگروقوستاناي-22019» كورمەسىنىڭ باستى ماقساتى – اۋىل شارۋاشىلىعى تاۋارلارىن وندىرۋشىلەر مەن تەحنيكا جانە باسقا دا تەحنولوگيا, قۇرالدار ۇسىنۋشىلار اراسىندا بايلانىس ورناتۋ بولاتىن. كەشكە دەيىن ىسكەر كەلىسىمدەر جاسالدى.
ءنازيرا جارىمبەت,
«ەگەمەن قازاقستان»
قوستاناي