ەلباسى نۇرسۇلتان نازارباەۆ: ء«بىزدىڭ باستى باسىمدىعىمىز — ازاماتتارىمىزدىڭ تۇرمىس ساپاسىن ارتتىرۋ جانە قازاقستاندى الەۋمەتتىك باعىتتاعى مەملەكەت رەتىندە دامىتۋ. ءبىز قيىن كەزەڭدەردىڭ وزىندە الەۋمەتتىك مىندەتتەمەلەرىمىزدى ورىندادىق», — دەگەن ەدى Nur Otan پارتياسىنىڭ XVIII سەزىندە.
جىل باسىنان بەرى وبلىستا دەمەۋشىلەردىڭ كومەگىمەن 782 وتباسىعا جالپى مولشەرى 44,7 ميلليون تەڭگەگە ءتۇرلى كومەكتەر كورسەتىلىپتى. «اقتوبە قالاسىندا «قولعانات اقتوبە» قوعامدىق قورىنا حابارلاسقان كاسىپكەرلەر 6 كوپبالالى, الەۋمەتتىك جاعىنان از قورعالعان جاندارعا پاتەر الىپ بەردى» - دەپ حابارلايدى اقتوبە قالاسى اكىمدىگى ءباسپاسوز قىزمەتىنىڭ جەتەكشىسى گۇلشات سەرالى.
دەمەۋشىلەردىڭ وسىنداي شاراپاتىن سەزىنگەندەردىڭ ءبىرى — 8 بالانىڭ اناسى سالتانات ءسادۋوۆا. جاقىندا سالتاناتقا اقتوبەلىك كاسىپكەر, «اقتوبەسترويەكسپەرت» جشس ديرەكتورى جاستالاپ جانباۋوۆ «نۇر اقتوبە» شاعىن اۋدانىندا ءبىر بولمەلى پاتەردىڭ كىلتىن تابىستادى.
بۇعان دەيىن اقتوبە قالاسىنداعى ق ۇلىمبەتوۆ كوشەسى بويىنداعى ءزاۋلىم ءۇيدىڭ اۋلاسىنداعى اياداي عانا بولمەلەرى بار ۋاقىتشا باسپانادا كۇنەلتىپ وتىرعان سادۋوۆتەر وتباسى كۇتپەگەن جەردەن قۋانىشقا تاپ بولدى. سەگىز بالانى ومىرگە اكەلگەن سالتانات ءسادۋوۆا — بۇگىندە ءۇش مۇگەدەك جاندى باعىپ وتىرعان انا. باسىندا باسپاناسى جوق انا وسىدان ءتورت جىل بۇرىن ايتەكە بي اۋدانىنىڭ سارات اۋىلىنان قونىس اۋدارعان. ونداعى ماقساتى — وتباسىنداعى مۇمكىندىگى شەكتەۋلى جانداردى قالاداعى مەديتسينالىق وڭالتۋ ورتالىقتارىنا ءجيى-ءجيى اپارىپ, بالالارىن ارنايى مەكتەپتە وقىتۋ.
سالتاناتتىڭ باسپانا كەزەگىندە تۇرعانىنا 4 جىل بولىپتى.
— جاسىم — 47-دە. ءبىر وتباسىندا 3 مۇمكىندىگى شەكتەۋلى جان باققان ادامنىڭ قاسىرەتىن ەشبىر ادامنىڭ باسىنا بەرمەسىن. سەگىز بالام بار. جولداسىم ەكىنشى توپ مۇگەدەگى, جۇمىسقا جارامسىز. ەكى بالام دا — مۇگەدەك, ارنايى مەكتەپتە وقيدى. مەن ءۇشىن باستى پروبلەما — باسپانا بولاتىن. وسى ماسەلەمەن تالاي جەرگە باردىم, استاناعا دا حات جولداعان ەدىم. ەندى وتباسىممەن جاڭا باسپانادا تۇرىپ جاتقان جايىم بار.— دەدى «التىن القا» يەگەرى.
جاڭا پاتەرلى بولعان سالتانات قۋانىشتان كوز جاسىنا ەرىك بەرىپ, قيىن جاعدايدا وتباسىنا كومەك قولىن سوزعان كاسىپكەرگە العىسىن جاۋدىردى.
— بۇل وتباسىنىڭ تۇرمىستىق جاعدايىنىڭ اۋىر ەكەنىن ءتۇسىنىپ, ءوز تاراپىمىزدان قولداۋ كورسەتۋگە تىرىستىق. ءوزىم دە كوپ بالانىڭ اكەسىمىن, ونىڭ ۇستىنە كوپبالالى وتباسىنان شىققانمىن. اتا-بابامىز تاريحتا قۋعىنعا ۇشىراعان وزگە ۇلت وكىلدەرىن دە ءوز باۋىرىنا تارتىپ, اش وتىرسا دا ءبىر ءتىلىم نانىن ءۇزىپ بەرگەن ەمەس پە؟! بۇگىنگىدەي ەل امان, جۇرت تىنىش زاماندا ءوزىمىز سياقتى كاسىپكەرلەر, ەر-ازاماتتارى وسىنداي مۇقتاج جاندارعا نەگە كومەكتەسپەسكە؟! مۇنى ءوزىمدى جارناما رەتىندە ەمەس, قالىپتاسقان جاعدايعا بايلانىستى ىسكەر ازاماتتارعا وي سالۋ رەتىندە جاسالىپ وتىرعان شارا دەپ تۇسىنىڭىزدەر, — دەدى جاستالاپ جانباۋوۆ.
ارايلىم نۇرباەۆا
اقتوبە