ءماجىلىس توراعاسىنىڭ ورىنباسارى گۇلميرا يسيمباەۆا جاپونيا پارلامەنتى وكىلدەر پالاتاسىنىڭ سپيكەرى تاداموري وسيمامەن كەزدەستى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
كەزدەسۋ بارىسىندا گۇلميرا يسيمباەۆا جاپونيالىق پارلامەنتشىگە وسى جىلدىڭ 23-24 قىركۇيەگى ارالىعىندا نۇر-سۇلتان قالاسىندا وتەتىن ەۋرازيا ەلدەرىنىڭ پارلامەنتتەرى سپيكەرلەرى IV وتىرىسىنا قاتىسۋ ءۇشىن رەسمي شاقىرۋ حاتىن تابىس ەتتى.
ءوز كەزەگىندە تاداموري وسيما قازاقستان رەسپۋبليكاسىنىڭ تۇڭعىش پرەزيدەنتىنە ەكىجاقتى قارىم-قاتىناستاردى ورناتىپ, دامىتۋعا قوسقان ەلەۋلى ۇلەسى ءۇشىن العىسىن ءبىلدىردى. سونىمەن قاتار, جاپونيا سپيكەرى نۇرسۇلتان نازارباەۆتىڭ ساياسي تۇراقتىلىقتى قالىپتاستىرۋداعى جەتىستىكتەرىنە توقتالدى.
سونىمەن قاتار, وكىلدەر پالاتاسىنىڭ سپيكەرى تاداموري وسيما نۇرسۇلتان نازارباەۆتىڭ 2016 جىلعى جاپونيا پارلامەنتىندەگى بايانداماسىنىڭ تاريحي ماڭىزدىلىعىنا, قازاقستاننىڭ تۇڭعىش پرەزيدەنتىنىڭ حيروسيماعا جاساعان ساپارى تۋرالى ايتا كەلىپ, نۇرسۇلتان نازارباەۆتىڭ باستامالارى مەن ناقتى ءىس-ارەكەتتەرى انتيادرولىق قوزعالىستىڭ الەمدىك كوشباسشىسى دەپ ساناۋعا مۇمكىندىك بەرەتىنىن جەتكىزدى.
اڭگىمە بارىسىندا پارلامەنتارالىق ىنتىماقتاستىقتى دامىتۋ ماسەلەلەرى تالقىلاندى. گۇلميرا يسيمباەۆا جاپونيانىڭ ساكۋرا گۇلدەيتىن ۋاقىتىمەن جانە ناۋرىز مەيرامىنىڭ قۇندىلىقتارىنىڭ ۇقساستىعىن اتاپ ءوتىپ, قازاقستان مەن جاپونيانىڭ پارلامەنتارالىق بايلانىستارى دامۋدىڭ جاڭا سەرپىنىنە يە بولاتىنىن جانە تۇتاستاي العاندا ەكى ەل اراسىنداعى ىنتىماقتاستىقتى نىعايتاتىنىنا سەنىم ءبىلدىردى.