وتكەن جىلى شىمكەنت قالاسىندا جۇمىس كەزىندە 62 جازاتايىم وقيعا ورىن الىپ, ودان 72 ادام زارداپ شەككەن. زارداپ شەككەندەردىڭ 13-ءى قايتىس بولعان. 5 توپتىق جازاتايىم وقيعا ناتيجەسىندە 8 ادام قايتىس بولعان. ونىڭ ىشىندە 47 جازاتايىم وقيعا تۇركىستان وبلىسىنىڭ مەملەكەتتىك ەڭبەك ينسپەكتورلارى تاراپىنان جۇرگىزىلسە, 15-ءى شىمكەنت قالاسىنىڭ مەملەكەتتىك ەڭبەك ينسپەكتورلارى تاراپىنان قارالعان.
جازاتايىم وقيعالاردىڭ تۋىنداۋىنا جول قوزعالىسى ەرەجەلەرىن ساقتاماۋ, تەحنولوگيالىق پروتسەستەردىڭ بۇزىلۋى, جەكە قورعانۋ قۇرالدارىن پايدالانباۋ جəنە بەلگىلەنگەن ەڭبەك رەجيمىنىڭ بۇزىلۋى سەبەپ بولعان.
بۇل تۋرالى قالالىق اقپاراتتىق-كوممۋنيكاتسيالىق ورتالىقتا وتكەن ءباسپاسوز ءماسليحاتىندا شىمكەنت قالاسىنىڭ ەڭبەك ينسپەكتسياسى جانە كوشى قون باسقارماسىنىڭ باسشىسى باۋىرجان قالجانوۆ ايتىپ ءوتتى.
باسقارما باسشىسىنىڭ ايتۋىنشا, وتكەن جىلدىڭ قىركۇيەك ايىنان باستاپ جىل سوڭىنا دەيىن باسقارماعا جەكە ازاماتتار مەن مەكەمەلەردەن 359 ارىز-شاعىم تۇسسە, بيىل جىل باسىنان 1 ناۋرىزعا دەيىنگى بۇل دەرەك 238-گە جەتكەن. سونىمەن قاتار, ەڭبەك زاڭناماسىنىڭ بۇزىلۋى بويىنشا 4,1 ميلليون تەڭگە كولەمىندە 34 اكىمشىلىك ايىپپۇل سالىنعان. 2019 جىلدىڭ ەكى ايىنىڭ قورىتىندىسى بويىنشا 238 جەكە جانە زاڭدى تۇلعالاردىڭ ارىز-شاعىمدارى قارالعان. قارالعان ارىز-شاعىمدار نەگىزىندە, مەكەمەلەر مەن كاسىپورىنداردا بارلىعى 57 تەكسەرۋ جۇرگىزىلىپ, ناتيجەسىندە, 40 زاڭ بۇزۋشىلىق انىقتالىپ, انىقتالعان بۇزۋشىلىقتاردىڭ نەگىزىندە 24 نۇسقاما بەرىلگەن.
بيىل «قاۋىپسىز ەڭبەك» اقپاراتتىق ناۋقانىن وتكىزۋ جونىندە دايىندالعان جول كارتاسى نەگىزىندە باسقارما تاراپىنان ءىس-شارالار ءۇش باعىتتا جۇرگىزىلەدى. «اقپاراتتىق ناۋقان وتكىزۋدەگى باستى ماقسات وندىرىستىك جاراقاتتانۋ مەن زياندى ەڭبەك جاعدايىن ازايتۋ, ەڭبەكتى قورعاۋ سالاسىندا الدىن الۋ مادەنيەتىن كوتەرۋ», دەيدى قالانىڭ باس مەملەكەتتىك ەڭبەك ينسپەكتورى.
اتالعان جيىندا تالقىعا تۇسكەن تاقىرىپتىڭ ءبىرى كىسى اقىسىن جەمەۋ جونىندە بولدى. باسقارما تاراتقان مالىمەتكە سۇيەنسەك, شىمكەنتتە جۇمىسكەرلەردىڭ جالاقىسى ءۇشىن 6 كاسىپورىن 27 ملن تەڭگە قارىز بولعان. ء تىپتى, وتكەن جىلى بۇل كورسەتكىش 192,8 ملن تەڭگەنى قۇراعان. وسى ورايدا باسقارما قىزمەتكەرلەرى جۇمىس بەرۋشىلەردى دە, جۇمىسشىلاردى دا كەز-كەلگەن جۇمىسقا كەلىسىم-شارت نەگىزىندە كىرىسۋگە, ءتىپتى سىناق مەرزىمىن دە قۇجات نەگىزىندە زاڭداستىرۋعا كەڭەس بەردى.
شىمكەنت قالاسىندا شەتەلدەن كەلگەن قانداستار وتە كوپ. ولاردىڭ اتامەكەنگە ورالىپ, جۇمىسقا تۇرۋىنا كوپتەگەن كەدەرگىلەر تۋىنداۋدا. سونىڭ ىشىندە قۇجات راسىمدەۋدە كەزدەسەتىن ماسەلەلەردى جويۋ ءۇشىن باسقارما تاراپىنان بىرقاتار ءتۇسىندىرۋ جۇمىستارى جۇرگىزىلۋدە.
«قازاقستان رەسپۋبليكاسىنىڭ ازاماتتىعىن الىپ ۇلگەرمەگەن قانداستار ءۇشىن «ورالمان» ستاتۋسى 1 جىلعا عانا بەرىلەدى. وسى ۋاقىتت ارالىعىندا ازاماتتىق الۋعا قۇجات راسىمدەپ ۇلگەرمەگەندەر ءۇشىن تاعى 6 اي قوسىمشا ۋاقىت بەرىلەدى. وكىنىشكە وراي, وسى ۋاقىتتى دا پايدالانباعان ازاماتتار بار. سوندىقتان, وسى ازاماتتارعا 2019 جىلدىڭ 31 جەلتوقسانىنا دەيىن تاعى دا قوسىمشا ۋاقىت قارالىپ وتىر. وسىنى ەسكەرىپ, قۇجات راسىمدەۋ جۇمىستارىن ەرتەرەك اياقتاۋ قاجەت», – دەيدى باسقارما باسشىسى.
ايتا كەتەرلىگى, قر ەڭبەك جانە حالىقتى الەۋمەتتىك قورعاۋ مينيسترلىگى 2019 جىل – ەڭبەك قاۋىپسىزدىگى جانە ەڭبەكتى قورعاۋ جىلى دەپ جاريالادى. مينيسترلىك بەكىتكەن جول كارتاسى اياسىندا وڭىرىمىزدە ءۇش جاقتى كوميسسيانىڭ كەلىسىمىمەن 2019-2021 جىلدارعا ارنالعان كەشەندى جول كارتاسى əزىرلەنگەن. الداعى ۋاقىتتا وتەتىن شارالار وسى باعىتتار بويىنشا جۇرگىزىلىپ, ازاماتتاردىڭ ەڭبەك قۇقىعى ءوز دەڭگەيىندە قورعالادى دەيدى سالا ماماندارى.
نۇرشات توكەن,
«Egemen Qazaqstan»
شىمكەنت