2020-2025 جىلدار ارالىعىندا ماگاتە ۇيىمى مەن كۋرچاتوۆتاعى ۇلتتىق يادرولىق ورتالىق ماماندارى تىعىز بايلانىستاعى ارىپتەستىك قارىم-قاتىناس ورناتپاق. بۇل بايلانىس «وڭىردە قورشاعان ورتانى قورعاۋدىڭ رادياتسيالىق مونيتورينگىنىڭ الەۋەتىن ارتتىرۋدىڭ تەحنيكالىق جوباسى» دەپ اتالادى.
جوباعا دايىندىق جۇرگىزۋ تۋرالى ماسەلە اۆستريانىڭ ۆەنا قالاسىندا وتكەن حالىقارالىق سەميناردا تالقىلاندى. جيىنعا كۋرچاتوۆ قالاسىنداعى ۇلتتىق يادرولىق ورتالىق ماماندارى مەن عالىمدارى دا قاتىستى. سەمينارعا 20 شاقتى ەلدەردەن, اتاپ ايتقاندا: ارمەنيا, ازەربايدجان, رەسپۋبليكا بەلارۋس, بولگاريا, كيپر, ەستونيا, گرەتسيا, گرۋزيا, قازاقستان, ليتۆا, لاتۆيا, رەسەي, پولشا, سلوۆەنيادان دە عالىمدار كەلدى.
كەزدەسۋدىڭ باسىم باعىتى تەحنيكالىق جوبانى ىسكە اسىرۋعا ارنالعان جول كارتاسىن ازىرلەۋ. جوبانىڭ ءوتىنىمى تالقىلانىپ, ونىڭ جۇمىس جوسپارىن ازىرلەۋ جۇزەگە اسىرىلدى. سونداي-اق جوباعا قاتىسۋشى ەلدەردە رادياتسيالىق مونيتورينگىلەۋدىڭ كەشەندى باعدارلاماسىن قۇرۋ بويىنشا ماگاتە ساراپشىلارى كەڭەستەرىن بەردى. بەلگىلەنگەن مەرزىمگە ساي بيىل قازاقستاندا جۇزەگە اسۋى ءتيىس جوبا ماگاتە باسشىلىعىنا ۇسىنىلاتىن بولماق. اتى ايتىپ تۇعانداي بۇل جوبادا قورشاعان ورتانى قورعاۋ, رادياتسيا دەڭگەيىن مەيلىنشە ناقتى انىقتاۋ جانە تابيعاتتى, جەردى ساۋىقتىرۋ ماسەلەلەرى قاراستىرىلماق.
ماگاتە ماماندارى جاقىندا الماتىدا سەمينار وتكىزگەن ەدى. وعان قر ۇياو ماماندارى دا قاتىستى. سەميناردا قازاقستان رەسپۋبليكاسىنىڭ مەملەكەتتىك ەڭ ءىرى «رادون» باعدارلاماسىن جۇزەگە اسىرۋ ماسەلەسى تالقىلاندى. «رادون» باعدارلاماسىن 20-2025 جىلدارى جۇزەگە اسىرۋ كوزدەلگەن.
راۋشان نۇعمانبەك,
«ەgemen Qazaqstan»