قارجى مينيسترلىگى «بىرىڭعاي تەرەزە» پورتالىن تانىستىردى.
بۇل پورتال 27 ناۋرىزدان باستاپ پيلوتتىق جوبا رەتىندە ءوز جۇمىسىن باستايتىن بولادى. بۇل جايىندا «اتامەكەن» الاڭىندا وتكەن وتىرىستا قر قارجى ۆيتسە-ءمينيسترى رۋسلان ەڭسەباەۆ كەڭىنەن توقتالدى.
«بۇگىن بىرنەشە جىلدان بەرى جۇرگىزىلىپ كەلە جاتقان كۇردەلى جانە وتە ماڭىزدى ءىستىڭ تانىستىرىلىمى ءوتتى. بۇل سىرتقى ەكونوميكالىق قارىم-قاتىناستى جەڭىلدەتەتىن جوبا. ەندى, كاسىپكەرلەر كەدەن بەكەتتەرىندە ەۆرازيالىق ەكونوميكالىق وداق قۇجاتتارنا ساي جۇمىس ىستەي الاتىن بولادى. ياعني, ەلەكتروندى قۇجاتتارىڭىزدى كورسەتكەن سوڭ ونىڭ قاعاز نۇسقاسىن كورسەتۋىڭىز شارت ەمەس» دەيدى «اتامەكەن» قر ۇكپ كەدەن اكىمشىلىگى دەپارتامەنتىنىڭ ديرەكتورى دينا ماماشەۆا.
پورتال كومەگى ارقىلى كاسىپكەرلەر سىرتقى ەكونوميكالىق قارىم-قاتىناس كەزىندە يمپورت پەن ەكسپورتقا قاجەتتى پورتالدىڭ باستى ارتىقشىلىقتارىنىڭ ءبىرى - كاسىپكەرلەر يمپورت-ەكسپورت جاسار الدىندا قاجەتتى اقپاراتتاردى الا الادى.
«بىلتىر ماعلۇمداۋ ءادىسىن ەلەكتروندى تۇرگە اۋىستىرۋ ماقساتىندا «استانا-1» جۇيەسى ىسكە قوسىلعان. بۇگىنگى تاڭدا سونىڭ ناتيجەسى رەتىندە ماعلۇمداۋدىڭ 70% «جاسىل ءدالىز» ارقىلى راسىمدەلۋدە. دەگەنمەن, راسىمدەۋشىلەردىڭ ماعلۇمداۋ الدىندا قاجەتتى قۇجاتتاردى جيناۋ بارىسىندا بىرنەشە كەدەرگىلەرگە تاپ بولاتىنىن بايقادىق. بىرىنشىدەن, بۇل كوپ ۋاقىتتى الادى ەكەن جانە قۇجاتتاردىڭ بارلىعى دەرلىك قاعاز جۇزىندە جاسالادى. ال, بۇل ءوز كەزەگىندە سىبايلاس جەمقورلىققا الىپ كەلەدى. حالىقارالىق ادىستەرگە سۇيەنە وتىرىپ, ءبىز «بىرىڭعاي تەرەزە» جۇيەسىن ىسكە قوسىپ وتىرمىز», دەيدى رۋسلان ەڭسەباەۆ.
ۆيتسە-ءمينيستردىڭ ايتۋىنشا, وسى پورتالدىڭ ارقاسىندا يمپورت-ەكسپورت الماسۋ كەزىندە كاسىپكەرلەر ءار مەكەمەنىڭ ەسىگىن توزدىرمايتىن بولادى. كەدەندىك پروتسەستەرگە كەتەتىن ۋاقىت قىسقارىپ, سىرتقى ەكونوميكالىق قارىم-قاتىناسپەن اينالىسۋشىلاردىڭ ۋاقىتى مەن قارجىسىنا دا ۇنەم بولماق.
ەگەر سىز سىرتقى ەكونوميكالىق قارىم-قاتىناسپەن اينالىسساڭىز, 27 ناۋرىزدان باستاپ ءوز ءوتىنىشىڭىزدى وسى جۇيە ارقىلى بەرە بەرۋىڭىزگە بولادى.
«بىرىڭعاي تەرەزەنىڭ» بازالىق ەلەمەنتتەرى:
- ليتسەنزيا مەن رۇقسات ەتۋشى قۇجاتتاردىڭ ەلەكتروندى نۇسقاسىن الۋ;
- كەدەندىك قىزمەتتەرمەن اينالىساتىن تۇلعا ستاتۋسىن ەلەكتروندى نەگىزدە الۋ;
- ەلەكتروندى كەدەندىك ماعلۇمداۋ;
- كەدەندىك الدىن الا شەشىمدەردىڭ ەلەكتروندى قىزمەتى;
- كەدەندىك تاريفتەردىڭ بىرىكتىرىلۋى;
- انىقتامالار مەن قۇجاتتار رەەسترى;
- نورماتيۆتىك-قۇقىقتىق قۇجاتتاردى ىزدەۋ جانە قاراۋ.
«بىرىڭعاي تەرەزە» پورتالىنىڭ ەلەكتروندى ادرەسى – www.eokno.kgd.gov.kz. پورتال جۇمىسى جايلى سۇراقتارىڭىز بار بولسا, Telegram قوسىمشاسى ارقىلى +7 775 732 73 71 نومەرىنە حابارلاسا الاسىز.