قازاقستاننىڭ كاناداداعى ەلشىلىگى تورونتو قالاسىنداعى قازاقستاندىقتار قاۋىمدىستىعىمەن بىرلەسىپ تاريحتا العاش رەت ناۋرىز مەيرامىن رەسمي تۇردە اتاپ ءوتتى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
مەيرامعا قاتىسۋ ءۇشىن 400-دەن استام وتانداستارىمىز, جەرگىلىكتى ىسكەرلىك جانە قوعامدىق توپتاردىڭ وكىلدەرى كانادانىڭ ەڭ ءىرى مەگاپوليسىندە باس قوستى. ءىس-شارا بارىسىندا قازاق حالقىنىڭ ۇلتتىق تاعامدارى ۇسىنىلىپ, بالالارعا ارنالعان ويىندار مەن ونەرپازدىق تاپسىرمالار, سونداي-اق كانادادا تۇرىپ جاتقان دارىندى قازاقستاندىقتاردىڭ قاتىسۋىمەن ارنايى مەرەكەلىك كونتسەرت ۇيىمداستىرىلدى.
قازاقستاننىڭ كاناداداعى ەلشىسى اقىلبەك كامالدينوۆ وتانداستارىمىزدى قۇتتىقتاۋ بارىسىندا ناۋرىز مەيرامى عاسىرلار بويى ۇرپاقتان ۇرپاققا بەرىلىپ كەلە جاتقان بەيبىتشىلىك پەن كەلىسىمنىڭ سيمۆولى بولىپ تابىلاتىنىن اتاپ ءوتتى. «ناۋرىز ءبىزدىڭ ەلىمىز ءۇشىن ۇلكەن ماڭىزعا يە, ول ۇيلەسىمدىلىككە, ءوزارا تۇسىنىستىككە جانە الەۋمەتتىك تۇراقتىلىققا ىقپال ەتەدى. ءبىزدىڭ باستى قۇندىلىعىمىز - حالىقتىڭ بىرلىگى. سوندىقتان ءبىز بەيبىتشىلىك پەن كەلىسىمدى ۇنەمى نىعايتۋعا ءتيىسپىز», - دەدى ەلشى.
ەلشى ا.كامالدينوۆ قازاقستاندىق مادەنيەتتى شەت ەلدەردە بەلسەندى ىلگەرىلەتۋدى كوزدەيتىن «رۋحاني جاڭعىرۋ» باعدارلاماسىنىڭ ىسكە اسىرىلۋىنا ەرەكشە نازار اۋداردى. وسىعان بايلانىستى, يسلام, پارسى جانە ورتالىق ازيا وركەنيەتتەرىنىڭ بىرەگەي ەكسپوناتتارى مەن جيناقتامالارىن ۇسىناتىن تورونتوداعى اعا-حان مۋزەيىندە ناۋرىز مەرەكەسىن تويلاۋ وتە سيمۆولدى وقيعا ەكەنى ايتىلدى.
سالتاناتتى ءىس-شارانىڭ تەڭ ۇيىمداستىرۋشىسى بولىپ ءوز ۇلەسىن قوسقان قازاقستاننىڭ ونتاريو پروۆينتسياسىنداعى قۇرمەتتى كونسۋلى ستەن بارتي دە بارشا قازاقستاندىقتاردى ۇلىستىڭ ۇلى كۇنىمەن قۇتتىقتادى. ول 20 جىلدان ارتىق ۋاقىت بويى ەلىمىزدىڭ قارقىندى دامۋىن قۋانىشپەن باقىلاپ وتىرعانىن ايتىپ, كانادانىڭ ورتالىق پروۆينتسياسىندا قازاقستاننىڭ اتىنان جۇمىس جاساۋ مۇمكىندىگىنە ريزاشىلىعىن ءبىلدىردى.
مەيرامنىڭ جۇرگىزۋشىسى رەتىندە تانىمال كانادالىق جۋرناليست بەن ءمالرونينىڭ قاتىسقانى قوناقتار ءۇشىن تاڭعالارلىق جايت بولدى. ول «Etalk» جانە «Canadian Idol» باعدارلامالارىنا قاتىسقانى, سونداي-اق «وسكار», «التىن گلوبۋس», «Juno Awards» سىيلىقتارىن تابىس ەتۋ راسىمدەرىن جۇرگىزگەنى ءۇشىن بۇكىل الەمگە ايگىلى.
مەيرامعا قاتىسقاندار ءىس-شارانىڭ ساپالى جانە ىقىلاسپەن وتكەنىن اتاپ ءوتتى.
ءىس-شارا بارىسىندا قازاقستان ەلشىسى تورونتودا وقىپ جۇرگەن قازاقستاندىق ستۋدەنتتەرمەن بولەك كەزدەستى. ەلشى ا.كامالدينوۆ ەلشىلىكتىڭ جۇمىستارى تۋرالى ءتۇسىندىرىپ, تۇراقتى تۇردە بايلانىستا بولۋ ءۇشىن جانە توتەنشە جاعدايلاردا كومەك كورسەتۋ ءۇشىن كونسۋلدىق ەسەپكە تۇرۋ قاجەتتىلىگىن اتاپ ءوتتى. جاستار, ءوز كەزەگىندە, وزدەرىنىڭ وي-پىكىرلەرى مەن ۇسىنىستارىمەن ءبولىسىپ, ەلشىلىكپەن ىنتىماقتاسۋعا دايىندىعىن ءبىلدىردى.