ەۋرازيالىق توپ (ERG) قۇرامىنداعى «ەۋرازياتتىق ەنەرگەتيكالىق كورپوراتسياسى»» اق اقسۋ ەلەكتر ستانساسى بۇل مەرەيتويلىق قۋات كولەمىن ەۋرازيالىق توپتىڭ 25 جىلدىعىنا تارتۋ دەپ اتادى.
ستانساداعى العاشقى 300 مەگاۆاتت قۋات كولەمىن وندىرگەن №1 ەنەرگوبلوك 1968 جىلدىڭ جەلتوقسانىندا ىسكە قوسىلعان. ال, بۇگىنگى 600 ملرد كۆتس ەلەكتر قۋاتى ەلىمىزدىڭ الداعى التى جىل بويى ەركىن تۇتىنۋىنا جەتكىلىكتى ەنەرگيا.
اقسۋ ەلەكتر ستانساسى ەۋرازيالىق توپتىڭ بارلىق كاسىپورىندارىن جانە باسقا دا ونەركاسىپ كاسىپورىندارىنا قۋات بەرۋدە. ەلىمىزدە وندىرىلەتىن ەلەكتر قۋاتىنىڭ 17 پايىزىن, كومىردىڭ 20 پايىزىن وسى كاسىپورىن ۇلەسىنە تيەسىلى. ەلەكتر ەنەرگياسىن ءوندىرۋدىڭ جىلدىق قۋاتى – 16 ملرد كۆت ساعات. مەرەيتويلىق 600 ملرد كۆت ساعات ءوندىرۋ كورسەتكىشىنە جەتكەن ەنەرگەتيكتەردى ستانسا ديرەكتورى ۆلاديمير فەنەۆ قۇتتىقتادى.
ۆ. فەنەۆتىڭ ايتۋىنشا, بۇل كۇندەرى «ەەك» اق ەلەكتر ستانساسىنىڭ قاجەتتى قۋات قورىن جيناپ, قۇرال- جابدىقتاردىڭ سەنىمدىلىگى مەن ۇزاق مەرزىمدىلىگىن قولداۋ, وندىرىستىك سيپاتتامالاردى جانە ەكولوگيالىق كورسەتكىشتەردى جاقسارتۋ بويىنشا جۇيەلى جۇمىس جۇرگىزۋدە.
سونىمەن بىرگە, كومپانيا 1973 جىلدان باستاپ پايدالانۋداعى №5 ەنەرگوبلوكتى قايتا جاڭعىرتۋ بويىنشا جوبانى ىسكە اسىرۋدا.
بۇل ەنەرگيا بلوگىنىڭ قۋاتىن 300-دەن 325 ۆت-قا دەيىن ارتتىرۋعا, وتىن شىعىنىن ازايتۋعا, پايدالانۋ شىعىندارىن قىسقارتۋعا, سونداي-اق ەلەكتر ستانساسى جۇمىسىنىڭ تەحنيكالىق-ەكونوميكالىق, ەكولوگيالىق جانە ساپالىق كورسەتكىشتەرىن جاقسارتۋعا مۇمكىندىك بەرەدى.
الداعى جىلدارى ستانسا №7 ەنەرگوبلوكتى قايتا جاڭعىرتۋدى باستاۋدى جوسپارلاپ وتىر.
فاريدا بىقاي,
«ەگەمەن قازاقستان»
پاۆلودار وبلىسى