جۇما, 11 مامىر 2012 7:12
كەشە گرەكيادا لوندوندا وتەتىن 2012 جىلعى جازعى وليمپيا ويىندارىنىڭ الاۋى كۇن ساۋلەسىنەن تۇتاندىرىلدى. گرەكيالىق اكتريسا ينو مەنەگاكي ءراسىم بارىسىندا تۇتانعان الاۋدى ونى العاشقى الىپ جۇرەتىن جۇزگىش سپيروس ياننيوتيسكە تاپسىردى.
جۇما, 11 مامىر 2012 7:12
كەشە گرەكيادا لوندوندا وتەتىن 2012 جىلعى جازعى وليمپيا ويىندارىنىڭ الاۋى كۇن ساۋلەسىنەن تۇتاندىرىلدى. گرەكيالىق اكتريسا ينو مەنەگاكي ءراسىم بارىسىندا تۇتانعان الاۋدى ونى العاشقى الىپ جۇرەتىن جۇزگىش سپيروس ياننيوتيسكە تاپسىردى.
ياننيوتيس وليمپيادا الاۋىنىڭ ءبىرىنشى كەزەڭىندە جۇگىرسە, ەلدەگى بۇل ۇدەرىس 8 كۇنگە سوزىلادى. 17 مامىردا وليمپيادا الاۋى افيناداعى ستاديونعا جەتكىزىلىپ, سول ارادا لوندونداعى ويىندى ۇيىمداستىرۋشىلارعا تاپسىرىلادى. جەتپىس كۇنگە سوزىلاتىن ەستافەتا بارىسىندا وليمپيادا الاۋى 12,8 مىڭ شاقىرىم جولدان وتەدى.
لاڭكەستىكتەن وپات بولعاندار كوپ
سيريانىڭ استاناسى داماسك قالاسىندا كەشە ەرتەڭگىسىن قوسارلانعان لاڭكەستىك جاسالىپ, سونىڭ سالدارىنان 40-تان استام ادام قازا تاپتى. جارالانعاندار سانى 170 ادامنان اسادى دەلىنىپ وتىر. جارىلىستار سيريا بارلاۋ قىزمەتىنىڭ شتاب-پاتەرى ورنالاسقان 9 قاباتتى عيماراتتىڭ كىرە بەرىسىندە جاسالعان.
جارىلىستىڭ كۇشتى بولعانى سونشالىقتى, كورشىلەس ورنالاسقان تۇرعىن ۇيلەرگە دە ايتارلىقتاي زيان كەلگەن. سيريا وپپوزيتسياسىنىڭ دەرەكتەرىنە قاراعاندا, لاڭكەستىك قۇرباندىقتارىنىڭ سانى 50 ادامنان اسادى. كوز جۇمعاندار اراسىندا بارلاۋ وفيتسەرلەرىمەن قاتار, كوشەدە كەتىپ بارا جاتقان قاراپايىم ادامدار دا بار كورىنەدى.
ۇكىمەت جاساقتاۋ مانداتىنان باس تارتتى
گرەكيانىڭ «سيريزا» دەپ اتالاتىن سولشىل راديكالدى كواليتسياسىنىڭ سەركەسى الەكسيس تسيپراس ۇكىمەت جاساقتاۋ مانداتىنان باس تارتتى. «سيريزا» مۇشەلەرىمەن كەزدەسۋى كەزىندە ول ءبىز سولشىل ۇكىمەت قۇرۋ تۋرالى ارمانىمىزدى جۇزەگە اسىرا المادىق دەپ مالىمدەگەن.
ءسويتىپ, الەكسيس تسيپراس كەشە پرەزيدەنتتەن ۇكىمەت جاساقتاۋ تۋرالى العان مانداتىن قايتارىپ بەردى. ال گرەكيادا 6 مامىر كۇنى وتكەن كەزەكتەن تىس پارلامەنت سايلاۋىندا «سيريزا» ەكىنشى ورىن العان بولاتىن. ال ەڭ كوپ مانداتتى وڭشىلتسەنتريستىك «جاڭا دەموكراتيا» پارتياسى العان ەدى. بۇل پارتيانىڭ سەركەسى انتونيس ساماراس تا ۇكىمەت جاساقتاۋ مانداتىنان باس تارتقان بولاتىن. ەگەر 17 مامىرعا دەيىن جاڭا ۇكىمەت جاساقتالماسا, ەلدە جاڭا سايلاۋ جاريالانادى.
يراندا اگەنتتىك قىزمەتكەرى قازا تاپتى
يراندا اۆتوموبيل اپاتى سالدارىنان اتوم ەنەرگەتيكاسى جونىندەگى حالىقارالىق اگەنتتىكتىڭ (ماگاتە) قىزمەتكەرى قازا تاپتى. وقيعا اراك قالاسى ماڭىندا تىركەلگەن. كولىكتە سونداي-اق اتوم ەنەرگەتيكاسى جونىندەگى تاعى ءبىر ساراپشى بولىپتى.
وڭتۇستىككورەيالىق مامان وك سەوك سە قازا تاپسا, ونىڭ بىرگە كەلە جاتقان ارىپتەسى جاراقات العان. اراك قالاسىندا يادرولىق زەرتتەۋ جۇرگىزىلەتىن كەشەن ورنالاسقان ەكەن. يران باسشىلىعى اراكتا ورنالاسقان رەاكتور تەك بەيبىت ماقساتتا پايدالانىلاتىنىن مالىمدەپ وتىر. ماگاتە بولسا, قولدانىلعان وتىن يادرولىق وقتۇمسىقتار جاساۋ ءۇشىن قايتا وڭدەلۋى مۇمكىن دەپ الاڭداۋشىلىق ءبىلدىردى.
ازەربايجانداردىڭ اشۋ-ىزاسىن تۋعىزدى
9 مامىر كۇنى تانىلماعان تاۋلى قاراباق رەسپۋبليكاسىنىڭ استاناسى ستەپاناكەرت قالاسىندا اسكەري پاراد بولىپ وتكەن ەدى. بۇعان ازەربايجان تاراپى ءوزىنىڭ نارازىلىعىن ءبىلدىردى. مۇنداي نارازى كوڭىل-كۇيگە پارادقا ارمەنيا پرەزيدەنتى سەرج سارگسياننىڭ قاتىسۋى سەبەپ بولدى.
ازەربايجان سىرتقى ىستەر مينيسترلىگى وتكەن وقيعانى ارانداتۋشىلىق ارەكەت دەپ ەسەپتەيتىنىن مالىمدەدى. «مۇنداي دەسترۋكتيۆتى ۇستانىم ارميان جاعىنىڭ كەلىسسوزدەردى كونسترۋكتيۆتى جۇرگىزۋگە دايىن ەمەس ەكەنىن ايعاقتايدى», دەيدى مينيسترلىكتىڭ ءباسپاسوز حاتشىسى ەلمان ابدۋللاەۆ. شاراعا سونداي-اق ارمەنيانىڭ بۇرىنعى پرەزيدەنتى روبەرت كوچاريان مەن تانىلماعان تقر پرەزيدەنتى باكو سااكيان دا قاتىسقان.
العاش رەت ءبىر جىنىستى نەكەنى قولدادى
اقش پرەزيدەنتى باراك وباما كوپشىلىك الدىندا العاش رەت ءبىر جىنىستى نەكەلەر قۇرۋعا رۇقسات بەرۋ كەرەك دەگەن پىكىرىن ءبىلدىردى. بۇل مالىمدەمەسىن ول اۆس تەلەارناسى ارقىلى جاسادى. سونىمەن ءبىر مەزگىلدە, پرەزيدەنت بۇل ءوزىنىڭ جەكە پىكىرى ەكەنىن, بۇل ماسەلە زاڭنامالىق تۇرعىدا شتاتتار دەڭگەيىندە شەشىلۋى ءتيىس ەكەنىن اتاپ كورسەتتى.
وباما, سونىمەن قاتار, قىزدارى ماليا مەن ساشانىڭ ءبىر جىنىستى جۇپ تاربيەلەپ وتىرعان دوستارى بار ەكەنىن كولدەنەڭ تارتقان. مۇنىڭ الدىندا اقش-تىڭ ۆيتسە-پرەزيدەنتى دجو بايدەن دە ءبىر جىنىستى نەكەلەرگە قارسىلىعى جوق ەكەنىن حابارلاعان بولاتىن. بۇل اقش پرەزيدەنتىنىڭ قۇراما شتاتتاردا الداعى كۇزدە وتەتىن سايلاۋ قارساڭىندا ءوز جاعىنا ادامدار تارتۋ ماقساتىنداعى قادامى بولۋى دا ىقتيمال.
قىسقا قايىرىپ ايتقاندا:
فيليپپيندەگى بۋتۋان قالاسىنداعى دۇكەندە بولعان ءورت سالدارىنان 17 ادام كوز جۇمدى. ءورت دۇكەننىڭ ءۇش قاباتتى عيماراتىندا ەرتەڭگىسىن تۇتانعان. قازا تاپقانداردىڭ كوپشىلىگى جوعارعى قاباتتا ۇيىقتاپ جاتقان دۇكەن قىزمەتشىلەرى ەكەن.
مىسىردا 2011 جىلدىڭ جەلتوقسانىندا بيلىككە قارسى نارازىلىق اكتسيالارىنا قاتىسقان 293 وپپوزيتسياشى سوتتالاتىن بولادى. ولارعا بيلىككە قارسىلىق ءبىلدىردى, مەملەكەتتىك مەنشىككە زالال كەلتىردى جانە زاڭسىز قارۋ-جاراق ۇستاپ ءجۇردى دەگەن ايىپتار تاعىلىپ وتىر.
رەسەي فەدەراتسياسىنىڭ تەرگەۋ كوميتەتى يندونەزيادا Sukhoi Superjet-100 ۇشاعىنىڭ اپاتقا ۇشىراۋىنا بايلانىستى قىلمىستىق ءىس قوزعادى. ءتۇرلى دەرەك بويىنشا ۇشاق بورتىندا 45 پەن 48 ارالىعىندا ادام بولعان. ولاردىڭ ءبارى دە قازا تاۋىپتى.
ۋكراينانىڭ لۆوۆ قالاسىنداعى لىچاكوۆ اۋداندىق سوتى 9 مامىر كۇنى داڭق بيىگىندە (لۆوۆتاعى سوعىس مەموريالى) قىزىل تۋ كوتەرگەن كومپارتيا وكىلى يۋري تكاچەنكونى اقتاپ شىعاردى. ول اۋەلدە «قوعامدىق ءتارتىپتى بۇزدى» دەپ ايىپتالىپ, قاماۋعا الىنعان بولاتىن.
ينتەرنەت ماتەريالدارى نەگىزىندە ازىرلەندى.