استانالىق تسيركتە بەلگىلى اڭ ۇيرەتۋشى اندرەي كورنيلوۆ جەتەكشىلىك ەتەتىن «ينديرا» تسيرك شوۋىنىڭ گاسترولى باستالدى. ەلوردالىق كورەرمەن تۋرا ءبىر اي كولەمىندە, ياعني اقپاننىڭ 23-ءى مەن 25-ءشى ناۋرىز ارالىعىندا ءۇندى پىلدەرى مەن وزگە دە ەكزوتيكالىق جانۋارلاردىڭ تاڭعاجايىپ قىزىققا تولى ونەرىن تاماشالاي الادى.
شوۋ باعدارلامانىڭ سيۋجەتى بويىنشا ينديرا ەسىمدى قىز تۇسىندە جابايى تابيعات پەن ەكزوتيكالىق جانۋارلاردىڭ الەمىنە كەزدەيسوق تاپ بولىپ, ەرتەگى كەيىپكەرلەرىمەن بىرگە تاڭعاجايىپ ساياحاتقا اتتانادى.
وسىلاي باستالاتىن شىتىرمان وقيعاعا تولى كورسەتىلىمدە كورەرمەن «ينديرا» تسيرك شوۋىنىڭ جونگلەرلەر مەن اڭ ۇيرەتۋشىلەر, ەكۆيليبريستەر مەن اۋە گيمناستشىلارى, اكروباتتار مەن سايقىمازاقتار, سونداي-اق 85-تەن اسا جانۋارلار ونەرىن تاماشالاي الادى. ونىڭ ىشىندە تۇيە, پۋما, ارىستان, يت, لاما, پيتون, قولتىراۋىن, مايمىل, جايرا جانە اتتار مەن ءۇندى پىلدەرى بار. ارقايسىسى ءوزىنىڭ ەرەكشە ونەرىمەن كورۋشىسىن قايتالانباس قىزىققا كەنەلتتى. اسىرەسە, رانگو, پرەتتي جانە مارگو اتتى ءۇش ءپىلدىڭ ارەكەتى ءتىپتى كەرەمەت. كوپشىلىك الدىندا ونەر كورسەتۋگە بارىنشا ماشىقتانعان الىپ جانۋارلار پيراميدا قۇرىپ, ەڭبەكتەيدى, بيلەيدى, شارعا تۇرادى, ءتىپتى ءتۇرلى مۋزىكالىق اسپاپتاردا ويناپ, شەڭبەر اينالدىرۋدا دا الدىنا جان سالمايدى. ايتۋلى شوۋ باعدارلامانىڭ ەرەكشەلىگى دە سول: بۇل – تسيرك مانەجىنە بىردەن ءۇش ءۇندى ءپىلى شىعاتىن الەمدەگى جالعىز قويىلىم.
سونداي-اق تاڭعاجايىپ كورسەتىلىم اياسىندا تسيرك ونەرىنىڭ جانكۇيەرلەرى اڭىزعا اينالعان «پىلدەرمەن جەر ءجۇزىن اينالىپ شىعۋ ساياحاتى» اتتراكتسيونىنىڭ كەيىپكەرلەرى كورنيلوۆتار اۋلەتىمەن تانىسىپ, ارتىستەردىڭ اۆتورلىق مۋزىكانىڭ سۇيەمەلدەۋىندەگى ەرەكشە اسەم حورەوگرافيالىق جۇمىستارىنىڭ دا كۋاسى بولا الادى.
ايتا كەتەيىك, اڭ ۇيرەتۋشى اندرەي مەن اناستاسيا دەمەنتەۆ-كورنيلوۆتار ماسكەۋدە وتكەن تسيرك ونەرىنىڭ بۇكىلالەمدىك فەستيۆالىنىڭ «التىن سىيلىعى» مەن حالىقارالىق تسيرك ونەرى فەستيۆالىندە ءبىرىنشى ورىن جانە «التىن ءپىل» سىيلىعىن, سونىمەن قاتار يجەۆسكىدە (ۋدمۋرتيا) وتكەن حالىقارالىق تسيرك فەستيۆالىنىڭ, باس جۇلدەسىن قانجىعاسىنا بايلادى. بۇدان بولەك, رەسەي مەملەكەتتىك تسيرك كومپانياسىنىڭ «شاري-ۆاري», رەسەي تسيرك قايراتكەرلەرى وداعىنىڭ «ۇزدىك ءارتىس-2012» (اندرەي دەمەنتەۆ-كورنيلوۆ) جانە «ۇزدىك جىل اتتراكتسيونى-2015» اتالىمىندا «شەبەر» سىيلىعى مەن تسۆەتنوي بۋلۆارداعى نيكۋلين تسيركى حالىقارالىق تسيرك ونەرى فەستيۆالىنىڭ «التىن ءپىل» گران-ءپريىن يەلەنگەن.
نازەركە جۇماباي,
«Egemen Qazaqstan»