وبلىستىق ارحيۆ مالىمەتىنشە, گازەت 1929 جىلى شىققاندا «كەڭەس تۋى» اتالعان. سول كەزدە عالىم, فيلولوگ بەيسەنباي كەنجەباەۆ العاشقى رەداكتورى بولدى.
1938 جىلدان وبلىستىق «قىزىل تۋ» دەگەن اتپەن شىعادى.
1963-1965 جىلدارى «قىزىل تۋ» گازەتىنىڭ جابىلىپ (تىڭ يگەرۋشى سولتۇستىك 5 وبلىسقا ورتاق «تىڭ ولكەسى» گازەتى جارىق كورەدى.
سودان, ەلىمىز تاۋەلسىزدىگىن العان ەلەڭ-الاڭ شاقتا 1991 جىلدىڭ 26 قىركۇيەگىنەن «سارىارقا سامالى» اتاۋىن الدى.
گازەتكە ءار جىلدارى عالىم مالدىباەۆ, بالتابەك اسانوۆ, الىمبەك جانعابىلوۆ, اۋباكىر اياپبەرگەنوۆ, سارى مىڭباەۆ, حامزا سىزدىقوۆ, ءازىلحان نۇرشايىقوۆ, ومارعالي قۇدىشەۆ, سۇبىحان شوشانوۆ, بالتاباي سەيسەنبەكوۆ, القوجا مۇحامەدجانوۆ سياقتى قازىر ومىردەن وتكەن اعالار باسشىلىق جاسادى.
سونىمەن بىرگە قاليجان, قايىرجان بەكقوجيندەر, زەيىن شاشكين, ءازىلحان نۇرشايىقوۆ, مۇزافار الىمباەۆ, قالمۇقان يساباەۆ, نۇتفوللا شاكەنوۆ, تولەۋجان سمايىلوۆ, امانجول شامكەنوۆ, قابدىكارىم ىدىرىسوۆ, مۇباراك جامانبالينوۆ, رامازان توقتاروۆ, مەيرام اسىلعازين, ءناسيپوللا ەسىموۆ, جانات تۇرعانبەكوۆ سياقتى اقىن-جازۋشىلار قىزمەت جاسادى.
كەلەسى بۋىندى مارقۇمدار ايتجان بادەلحان ۇلى, قاجىمۇرات سماعۇل, مۇقامەدجان داۋرەنبەكوۆ, كوزى ءتىرى تولەۋبەك قوڭىر, باقىت بايمۇراتوۆ, وسكەنباي تاستەمحانوۆ, شولپان بايعالى, تۇرسىنباي يبادۋللين, عالىمبەك جۇماتوۆتار جالعاستىردى.
وسى جولداردىڭ اۆتورى مەن دە وسى گازەتتە 1985 جىلى كازگۋ-ءدىڭ جۋرناليستيكا فاكۋلتەتىن ءبىتىرىپ, جولدامامەن كەلىپ, 1999 جىلعا دەيىن قىزمەت ەتتىم.
اعالار بىزگە گازەت ءبىزدىڭ ءومىرىمىز ەكەنىن, گازەتتە ءومىر ءسۇرۋدىڭ نە ەكەنىن ۇيرەتتى.
ۇرپاق جالعاستىعى-ۇزىلمەيدى. كوز كورگەن اعالارعا–تاعزىم.
وبلىس ورتالىعىندا مەرەيتوي اياسىندا بۇرىنعى «قىزىل تۋ» قازىرگى «سارىارقا سامالى» گازەتىندە قىزمەت ەتكەن مايدانگەر-جۋرناليستەرگە ارنالعان 5 مەموريالدىق تاقتا ورناتىلدى.
بۇعان دەيىن, سوعىسىنىڭ ارداگەرلەرى, گازەت جۋرناليستەرى – جىلقايدار قارپىقوۆقا, كارمۇقان بەكبەرگەنوۆكە, ءابدىش بايمۋرزينگە, باقي ابدىقادىروۆتىڭ تۇرعان ۇيلەرىنە مەموريالدى تاقتالار ورناتىلعان.
مەرەيتوي اياسىندا وبلىستىق گازەتتىڭ «قىزىل تۋ» اتالعان كەزىندە 1962-1981 جىلدارى رەداكتورى بولعان سۇبىحان شوشانوۆتىڭ تۇرعان ۇيىنە ەسكەرتكىش بەلگى ورنادى.
گازەتتىڭ العاشقى رەداكتورى بەيسەنباي كەنجەباەۆ اتامىزعا دا وبلىس ورتالىعىنان ءبىر كوشە اتاۋىن بەرگەنىمىز دە دۇرىس بولار ەدى.
قازىر زامان وزگەرىسىنە ساي, وبلىستىق كىتاپحانا گازەت تىگىندىلەرىنىڭ ەلەكتروندى نۇسقالارىن جاساۋدا. «وبلىستاعى ءباسپاسوزدىڭ ەلەكتروندى ءارحيۆى» دەپ اتالاتىن جوبادا ا1 فورماتىنداعى كاسىبي سكانەرى پايدالانىلۋدا.
بۇل كۇندەرى «سارىارقا سامالىنىڭ» 1943 جىلدان بەرگى شىعارىلىمدارىنىڭ جالپى سانى 1750 ءنومىرى ەلەكتروندى تۇرگە كوشىرىلىپتى.
وبلىس ورتالىعىنداعى ەستاي اتىنداعى مادەنيەت سارايىندا 90 جىلدىق مەرەيتويلىق سالتاناتتى كەشكە ارداگەر جۋرناليستەر, زيالى قاۋىم وكىلدەرى, وقىرماندارى قاتىستى.
وبلىس اكىمى بولات باقاۋوۆ قۇتتىقتاۋ ءسوزىن ارنادى.
سوڭىنان گازەت ۇجىمىندا ءار جىلدارى ەڭبەك ەتكەن, گازەتتىڭ دامۋىنا ۇلەس قوسقان جۋرناليستەر مەن قىزمەتكەرلەرگە ارنالعان اس بەرىلدى.
فاريدا بىقاي,
«ەگەمەن قازاقستان»
پاۆلودار