جۇما, 27 ءساۋىر 2012 1:39
اتىراۋدا IV حالىقارالىق فەستيۆال ءوتتى
قازاقستان مەن رەسەي اراسىنداعى دوستىق, ىنتىماقتاستىق بايلانىستىڭ جارقىن كۋاسى اتىراۋ مەن استراحان وبلىستارىنىڭ مىسالىنان ايقىن اڭعارىلىپ كەلەدى. كورشىلەس وبلىستاردىڭ ءوزارا ىسكەرلىك بايلانىس ورناتۋى 1995 جىلدان باستاۋ الادى. سودان بەرگى كەزەڭدە كورشىلەر ەكونوميكانىڭ بارلىق دەرلىك سالاسى بويىنشا, سونىڭ ىشىندە, شاعىن جانە ورتا بيزنەستەگى ىنتىماقتاستىق كەلىسىمدەرىن بەرىك ورناتتى. سونىڭ دالەلىندەي جىل سايىن اتىراۋعا استراحاننىڭ, مۇنايلى وڭىرگە رەسەيلىك كورشىلەردىڭ ىسكەر توپتارىنىڭ ساپارلاپ كەلۋى جيىلەي ءتۇستى. كورشىلەس وبلىستار تەك ەكونوميكالىق تيىمدىلىكتى كوزدەگەن بارىس-كەلىسپەن شەكتەلمەي, ۇرپاقتار ساباقتاستىعىنداي رۋحاني, مادەني بايلانىستىڭ قانات جايۋىنا دا ءمان بەرىپ وتىر.
جۇما, 27 ءساۋىر 2012 1:39
اتىراۋدا IV حالىقارالىق فەستيۆال ءوتتى
قازاقستان مەن رەسەي اراسىنداعى دوستىق, ىنتىماقتاستىق بايلانىستىڭ جارقىن كۋاسى اتىراۋ مەن استراحان وبلىستارىنىڭ مىسالىنان ايقىن اڭعارىلىپ كەلەدى. كورشىلەس وبلىستاردىڭ ءوزارا ىسكەرلىك بايلانىس ورناتۋى 1995 جىلدان باستاۋ الادى. سودان بەرگى كەزەڭدە كورشىلەر ەكونوميكانىڭ بارلىق دەرلىك سالاسى بويىنشا, سونىڭ ىشىندە, شاعىن جانە ورتا بيزنەستەگى ىنتىماقتاستىق كەلىسىمدەرىن بەرىك ورناتتى. سونىڭ دالەلىندەي جىل سايىن اتىراۋعا استراحاننىڭ, مۇنايلى وڭىرگە رەسەيلىك كورشىلەردىڭ ىسكەر توپتارىنىڭ ساپارلاپ كەلۋى جيىلەي ءتۇستى. كورشىلەس وبلىستار تەك ەكونوميكالىق تيىمدىلىكتى كوزدەگەن بارىس-كەلىسپەن شەكتەلمەي, ۇرپاقتار ساباقتاستىعىنداي رۋحاني, مادەني بايلانىستىڭ قانات جايۋىنا دا ءمان بەرىپ وتىر.
ايتقانداي, اتىراۋ مەن استراحان توپىراعىن مەكەن ەتكەن ەتنوستار اراسىندا دا تىعىز بايلانىستى جانداندىرا تۇسكەن «دوس جۇرەگىن شەكارا بولە المايدى» اتتى حالىقارالىق فەستيۆال وتكىزۋ داستۇرگە ەندى. بيىل بۇل فەستيۆال ءتورتىنشى رەت اتىراۋدا ءوتتى. وعان مۇنايلى وڭىردەگى ەتنومادەني بىرلەستەرمەن بىرگە رەسەيدىڭ ۆولگوگراد, استراحان وبلىستارىنان دا وسىنداي ورتالىقتاردىڭ ونەرلى وكىلدەرى بەلسەنە اتسالىسقان قاتىسۋشىلاردى وبلىس اكىمىنىڭ ورىنباسارى سەرىك ايداربەكوۆ قۇتتىقتادى. اتىراۋداعى حالىقارالىق فەستيۆالعا استراحاندىقتاردى باستاپ كەلگەن «جولداستىق» قازاق مادەني قوعامىنىڭ توراعاسى احمەت جاركەنوۆ ەجەلدەن كورشىلىك حاقىنىڭ ماڭىزىنا باسا ءمان بەرەتىن ەكى ەل اراسىنداعى ىنتىماقتاستىق, ىسكەرلىك ارىپتەستىكتىڭ اياسى كەڭي ءتۇسكەنىن گازەت تىلشىسىنە بىلايشا سيپاتتاپ بەردى:
– جاھاندانۋ داۋىرىندە كورشىلەس ەلدەردىڭ ءوزارا بايلانىستى وركەندەتە ءتۇسۋى ۇلكەن مانگە يە. سەبەبى, كورشى ەلدەردەگى حالىقتار, كونفەسسيالار اراسىنداعى تۇسىنىستىك پەن دوستىقتى دامىتۋ – مەملەكەتارالىق تۇراقتىلىق پەن تولەرانتتىلىقتى ساقتاۋدىڭ باستى فاكتورى بولا الادى. ويتكەنى, رەسەيدىڭ وننان ءوڭىرى قازاقستانمەن شەكaرالاسىپ جاتىر. سونىڭ ىشىندە استراحان وبلىسى مەن قازاقستاننىڭ اتىراۋ, ماڭعىستاۋ, باتىس قازاقستان وبلىستارىمەن تاريحي, مادەني, الەۋمەتتىك-ساياسي, ەكونوميكالىق بايلانىستاردى وركەندەتۋدە شەشىمىن تاپپايتىن ماسەلە تۋىنداعان ەمەس. استراحان وڭىرىندە ماڭگىلىك تىنىستاعان ءبوكەي حانعا كەسەنە تۇرعىزىلۋىن شەكارالاس وڭىرلەر اراسىنداعى تاريحي تولەرانتتىلىقتىڭ دالەلى دەي الامىز.
ال فەستيۆال بارىسىنا توقتالار بولساق, وزگە ەتنوستاردىڭ وكىلدەرى ءوز تىلدەرىندە عانا ءان شىرقاعان جوق. باسقا ۇلتتاردىڭ ءانىن دە اۋەلەتتى, ءبيىن دە دوڭگەلەنە بيلەدى. ماسەلەن, اتىراۋداعى «مۇراگەر» فولكلورلىق ءانسامبلى قازاق سازگەرلەرىنىڭ كۇيلەرىن ورىنداۋمەن بىرگە, «ەۆرەي مەلودياسى» سەكىلدى وزگە ۇلتتاردىڭ تۋىندىلارىن دا ناقىشىنا كەلتىرە ورىندادى. ۋكراين ءمادەنيەتىن دامىتۋعا دەن قويعان «حۋتوريانكا» ەتنومادەني ءبىرلەستىگىنىڭ ونەرلى وكىلدەرى قازاقتىڭ «سارىجايلاۋ» ءانىن تامىلجىتا ورىنداعاندا, زال تولى كورەرمەن ەرەكشە ىقىلاس تانىتتى. وسى ءاندى ورىنداعان توپتاعى ۋكراين ارۋىنىڭ قازاق ءبيىن بۇرالا بيلەگەنى دە حالىقتار اراسىنداعى دوستىق شەكارا بولمايتىنىن انىق اڭعارتىپ تۇردى.
رەسەيدەن كەلگەن قازاق, ورىس, ءتۇركىمەن, چەشەن-ينگۋش, كازاك ەتنومادەني بىرلەستىكتەرىنىڭ وكىلدەرى ءوز ونەرلەرىمەن اتىراۋلىق ونەرسۇيەر قاۋىمنىڭ تالقىسىنا سالدى. گازەت تىلشىسىنە رەسەيلىك قوناقتار قازاقستانداعى ەتنوسارالىق تاتۋلىقتى نىعايتۋدىڭ ونەگە الارلىق تۇستارى تۋرالى پىكىرلەرىن ءبىلدىردى. ماسەلەن, استراحانداعى چەشەن قوعامدىق ۇيىمىنا جەتەكشىلىك ەتەتىن سالاۆادي ابدۋلكاديروۆ: «قازاقستان حالقى اسسامبلەياسىنىڭ قۇرىلۋىن پرەزيدەنت نۇرسۇلتان نازارباەۆتىڭ ەتنوسارالىق دوستىقتى نىعايتۋداعى كورەگەن شەشىمى دەپ ەسەپتەيمىن. ويتكەنى, قازاقستانداعى مەملەكەت قۇراۋشى ۇلت پەن وزگە دە ەتنوستاردى ءبىر-بىرىمەن جاقىنداستىرىپ, بىرلىك پەن ىنتىماقتا ءومىر ءسۇرۋىن قالىپتاستىرۋدا اسسامبلەيانىڭ ءرولى ەرەكشە. وسى ءۇردىستى ءبىزدىڭ رەسەيدە دە قولدانسا عانيبەت بولار ەدى», دەدى.
رەسەيلىك «كيريلليتسا» قوعامدىق ۇيىمىنىڭ توراعاسى ماكسيم انيۋشين مۇنداي حالىقارالىق فەستيۆالدىڭ ەلارالىق بايلانىستاردى ودان ءارى جانداندىرۋدا تاعىلىمدىق تۇستارىنا ايرىقشا كوڭىل اۋداردى. «ءبىز بۇگىن اتىراۋداعى كوپتەگەن ەتنومادەني بىرلەستىكتەردىڭ وكىلدەرىمەن ءوزارا پىكىر الىسىپ, ءتۇرلى تاقىرىپتا وي بولىستىك. ونەر ۇجىمدارىنىڭ ونەرلەرىنەن رۋحاني ءنار الدىق, باسقاشا ايتقاندا, جانىمىزدى بايىتتىق. اتىراۋدان جاڭا دوستار تاپتىق. ويتكەنى, دوس ءجۇرەگىنە شەكارا كەدەرگى بولا المايدى», دەگەن پىكىرىمەن ءبولىستى.
جولداسبەك شوپەعۇل.
اتىراۋ وبلىسى.