بۇگىن ورال قالاسىنداعى «دوستىق ءۇيى» عيماراتىندا «جەتىستىككە باستايتىن 7 قادام» اتتى شارا ءوتتى.
بۇل - باتىس قازاقستان وبلىسىندا جاستار جىلىنىڭ اشىلۋىنا وراي ۇيىمداستىرىلعان جاستار الاڭى. شارا بارىسىندا «جەتىستىككە باستايتىن 7 قادام» وبلىس جاستارىنىڭ باعدارلامالىق قۇجاتى قابىلداندى. جاستار الاڭى وتىرىسىنا باتىس قازاقستان وبلىس اكىمى ا.س.كولگىنوۆ قاتىسىپ, ءسوز سويلەدى. وبلىس باسشىسى جاستار جىلى اق جايىق وڭىرىندە اتقارىلاتىن جۇمىس جوسپارىمەن ەگجەي-تەگجەيلى تانىستىرىپ ءوتتى.
بۇل شاراعا قازاقستان رەسپۋبليكاسى قوعامدىق دامۋ مينيسترلىگى جاستار جانە وتباسى كوميتەتى توراعاسىنىڭ مىندەتىن اتقارۋشى اسحات ورالوۆ, «بولاشاق» حالىقارالىق ستيپەندياتتارى قاۋىمداستىعىنىڭ اتقارۋشى ديرەكتورى شارۋا دەمەسىنوۆا, «قازاقستان جاستارىنىڭ كونگرەسى» زتب اتقارۋشى ديرەكتورى توقتار بولىسوۆ, جەرگىلىكتى جاستار جەتەكشىلەرى ارنايى قاتىستى. سونداي-اق شاراعا وبلىستىڭ ءار ءتۇرلى ساناتتاعى جاستارى, جاس ۇستازدار, كاسىپكەرلەر, جاس دارىگەرلەر مەن ءوندىرىس قىزمەتكەرلەرى, باق جانە جاستار ۇيىمدارىنىڭ وكىلدەرى بەلسەنە ارالاسىپ, ءوز ويلارىن ورتاعا سالدى.
شارا بارىسىندا «جاستارعا ارنالعان 101 يدەيا» كراۋدسورسينگ پلاتفورماسىندا ۇسىنىلعان «جاقسىلىق جاسا» اتتى جاستار مارافونى باستاۋ الدى.
قازبەك قۇتتىمۇرات ۇلى,
"Egemen Qazaqstan"
باتىس قازاقستان