اقتوبە گۋممانيتارلىق كوللەدجىنىڭ ستۋدەنتەرى كاسىپ اشۋدىڭ قۇپيالارىن بىلۋگە مۇمكىندىك الدى. بۇگىن ولار اقتوبە وبلىسى «اتامەكەن» كاسىپكەرلەر پالاتاسىنىڭ ديرەكتورى نۇرلىبەك مۇقانوۆپەن كەزدەستى. بيزنەس-ترەنينگ اشىق اڭگىمە تۇرىندە ءوتتى.سۇحبات كوللەدج ستۋدەنتتەرىنىڭ كاسىپ اشۋدى نەدەن جانە قالاي باستاۋ كەرەك, قانداي كاسىپ اشقان ءتيىمدى دەگەن ساۋالدارى توڭىرەگىندە ءوربىدى. وكپ باسشىسى جاستارعا ءوز مۇمكىندىكتەرىن كورسەتۋدەن قورىقپاۋعا كەڭەس بەردى.
«جاستىق شاق – ادام ومىرىندەگى ەڭ شەشۋشى كەزەڭ. ءومىر ءبىر ورنىندا تۇرمايدى. كاسىپ اشۋعا ىڭعايلى ۋاقىت ول ء–دال قازىرگى كەز. سوندىقتان, التىن ۋاقىتتارىڭىزدى بوس جىبەرمەي, قوعامنان ءوز ورىندارىڭىزدى الۋعا اسىعىڭىزدار»,-دەدى پالاتا باسشىسى.
سونىمەن قاتار, «اتامەكەننىڭ» باسشىسى بيزنەس باستاماسى بار جاستارعا ۇسىنىلاتىن مۇمكىندىكتەر جونىندە ايتىپ بەردى. ايتالىق, اقتوبە وبلىسى كاسىپكەرلەر پالاتاسى 2015 جىلدان باستاپ, 18 بەن 29 جاس ارالىعىنداعى بەلسەندى جاستارعا ارنالعان «جاس كاسىپكەرلەر مەكتەبى» جوباسىن جۇزەگە اسىرىپ كەلەدى. كۋرسقا قاتىسۋشىلار بيزنەستى باسقارۋ تەورياسى مەن تاجىريبەسىنە ۇيرەنىپ, وقۋ اياقتالعان سوڭ, ءوز يدەيالارىن قورعايدى. ەڭ ۇزدىك بيزنەس-جوبالار ميكروقارجى ۇيىمدارىنىڭ, بيزنەس وكىلدەرىنىڭ جانە الەۋەتتى ينۆەستورلاردىڭ قاتىسۋىمەن وتەتىن «يدەيالار جارمەڭكەسىنە» قويىلادى. سونىمەن قاتار, جاستار وكپ وتكىزەتىن «بيزنەس كەڭەسشى» سەمنارىنا قاتىسا الادى. سونداي-اق پالاتا الاڭىندا بەلسەندى جاستارعا ارنالعان ءتۇرلى ترەنينگتەر جانە بەلگىلى كاسىپكەرلەرمەن كەزدەسۋلەر وتكىزىلىپ تۇرادى. وكپ ديرەكتورى كوللەدج ستۋدەنتتەرىن وسى شارالارعا قاتىسۋعا شاقىردى.
ستۋدەنتتەرمەن كەزدەسۋ ەلباسى نۇرسۇلتان نازارباەۆتىڭ بيىلعى جىلدى جاستار جىلى دەپ اتاۋىنا جانە «تاۋەلسىزدىكتىڭ ۇرپاقتارى» سالتاناتىنداعى «اتامەكەن» پالاتاسىنىڭ جاستاردى بيزنەسكە باۋلۋ تۋرالى تاپسىرماسىنا وراي ۇيىمداستىرىلعان. «جاستار جىلى – جاستاردىڭ ءوزىن دامىتۋىنا ۇلكەن مۇمكىندىك بەرەتىن جىل. كەزدەسۋدىڭ ماقساتى -تالاپتى, بەلسەندى جاستاردىڭ ارمان-ماقساتتارىنا جول اشۋ»,-دەيدى اقتوبە گۋمانيتارلىق كوللەدجى ديرەكتورىنىڭ تاربيە ءىسى جونىندەگى ورىنباسارى گۇلبارشا جيەنقۇلوۆا.
تەمىر قۇسايىن,
«ەگەمەن قازاقستان»
اقتوبە قالاسى