الماتىدا موتوجارىستان وتكەن الەم چەمپيوناتىنىڭ اقتىق سايىسىندا رەسەيلىك موتوشاباندوزدار بارلىق جۇلدەنى جەڭىپ الدى. بۇل تۋرالى قازاقپارات حابارلادى.
سەنبى كۇنى «مەدەۋدە» حالىقارالىق موتوتسيكلشىلەر فەدەراتسياسىنىڭ (FIM) قولداۋىمەن سپيدۆەي بويىنشا جەكە الەم چەمپوناتىنىڭ اقتىق كەزەڭىنىڭ العاشقى كۇنى وتكەن بولاتىن. وعان الەمنىڭ بەس مەملەكەتىنەن - قازاقستان, اۆستريا, شۆەتسيا, رەسەي مەن گەرمانيادان 18 «مۇز گلادياتورى» قاتىسقان ەدى.
«جارىستىڭ العاشقى كۇنى 20 ىرىكتەۋ كەزەڭى, ەكى جارتىلاي فينال جانە ءبىر فينالدىق كەزەڭ وتكىزىلدى. ءاربىر جارىستا ءتورت شاباندوز جارىسقا شىعىپ, العان ورىندارىنا بايلانىستى ۇپاي جيناپ وتىردى. ەڭ كوپ ۇپايعا يە بولعان شاباندوزدار جارتىلاي فينال مەن فينالدىق كەزەڭنىڭ توبىن قۇرادى», - دەلىنگەن قازاقستان اۆتوموتوسپورت فەدەراتسياسىنىڭ ءباسپاسوز حابارلاماسىندا.
ايتا كەتەيىك, جارىستى ارەنا تريبۋناسىنان قازاقستان مەن رەسەيدىڭ پرەمەر-مينيسترلەرى باقىتجان ساعىنتاەۆ پەن دميتري مەدۆەدەۆ تاماشالادى. ولار «مۇز گلادياتورلارىنىڭ» سايىسىن بەلسەندى سۋرەتكە ءتۇسىرىپ وتىردى.
جارىستىڭ العاشقى كۇنىنەن باستاپ, الەمدەگى ەڭ مىقتى موتوتسيكل شاباندوزدارى ەكسترەمالدى سپورت تۇرلەرىنىڭ جانكۇيەرلەرىنە ۇمىتىلماس شوۋ مەن تىستەسكەن كۇرەستى كورسەتتى. قاتىسۋشىلار مۇز جولىنىڭ ۇستىمەن ساعاتىنا 100 شاقىرىم جىلدامدىقپەن جۇيىتكىدى. ستارتتىق كەزەڭدەر وتە قارقىندى ءارى كەرەمەت ءوتتى. كۇتكەندەگىدەي, رەسەيلىك موتوتسيكلشىلەر ىرىكتەۋ كەزەڭىندە بىردەن العا شىقتى.
قازاقتار, نەمىستەر مەن اۆستريالىقتارعا الەمدىك سپيدۆەيدىڭ شەبەرلەرىمەن باسەكەگە ءتۇسۋ وڭايعا تۇسكەن جوق.
شۆەتسيانىڭ رايدەرى مارتين حااراحيلتۋنەن العاشقى سەنساتسيانىڭ يەسى دەسە دە بولادى. ول باسەكەلەستەرىمەن سوڭىنا دەيىن كۇرەسىپ, جەڭىسكە جەتۋگە بارىن سالدى. ناتيجەسىندە, ءورشىل شۆەتسيا وكىلى ىرىكتەۋ كەزەڭىندە جەتكىلىكتى ۇپاي جيناپ, فينالعا شىقتى. ورىس شاباندوزدارى ءۇشىن نەگىزگى باسەكەلەستەردىڭ ءبىرى سانالاتىن اۆستريالىق فرانتس تسورن بۇل جولى ونەرىن كورسەتە المادى. ءبىرىنشى جارىستاعى سوقتىعىستان كەيىن ول جوعارى جىلدامدىقپەن قوزعالا الماي, جارتىلاي فينالعا بارار جولدا ءسۇرىندى.
قازاقستاندىق رايدەرلەر ۆلاديمير چەبلوكوۆ, سەرگەي سەروۆ جانە اندرەي شيشەگوۆ العاشقى كۇننىڭ جارىستارى نەگىزىندە جاقسى ناتيجە كورسەتە الماي, جارىس جولىنان شىعىپ قالدى.
20 اينالىمنان كەيىن جەڭىسكە رەسەيلىك دانيل يۆانوۆ جەتىپ, 19 ۇپايمەن ءبارىنىڭ الدىنا شىقتى. ەكىنشى جانە ءۇشىنشى ورىندارعا دا رەسەيلىك دينار ۆالەەۆ پەن دميتري حوميتسەۆيچ جايعاستى. ولاردىڭ ەكەۋى دە 17 ۇپايدان جينادى.
ناتيجەسىندە, وسى ءۇش رەسەيلىك شاباندوز بەن شۆەد حااراحيلتۋنەن فينالدا ونەر كورسەتتى. شەشۋشى جارىستا شۆەد جىگىتى ەڭ سوڭعى بولىپ كەلىپ, ءبىرىنشى ورىنعا جاس شاباندوز دينار ۆالەەۆ جايعاستى. تاجىريبەلى يۆانوۆ پەن حوميتسەۆيچتى ارتقا تاستاعان باشقۇرتستان وكىلى دينار ۆالەەۆ وسىلايشا جارىس جەڭىمپازى اتاندى.
«مەن ءۇشىن جارىس جاقسى باستالدى دەپ ايتا المايمىن - موتوتسيكل تالاپ ەتىلەتىن قۋاتقا جەتە المادى. دەگەنمەن, كوماندامەن بىرگە بۇل ماسەلەلەردى شەشتىك. تاماشا ناتيجە كورسەتكەنىمە وتە قۋانىشتىمىن. مەنىڭ جاۋىنگەرلىك رۋحىم بار, مەن وسى جانە كەلەسى كەزەڭدەردە جەڭىسكە جەتۋگە دايىنمىن», - دەدى دينار ۆالەەۆ.
FIM Ice Speedway Gladiators World Championship 2019 الەمدىك كۇنتىزبەگە ەنەتىن سايىس. الماتىلىق كەزەڭدى قر اۆتوموتوسپورت فەدەراتسياسى ۇيىمداستىردى.
ەسكە سالايىق, بيىل مۇز ايدىنىنداعى موتوتسيكلدەر جارىسىنىڭ الەم چەمپيوناتى جەتى كەزەڭنەن تۇرادى - ەكى ىرىكتەۋ جانە بەس فينالدىق كەزەڭ. جەكە بىرىنشىلىكتىڭ العاشقى كەزەڭىن وتكىزۋ قازاقستانعا بۇيىردى, ەكىنشى كەزەڭ رەسەيدىڭ شادرينسك قالاسىندا جوسپارلانعان. وسىدان كەيىن شاباندوزدار گەرمانيا مەن گوللانديادا جارىس جولىنا شىعاتىن بولادى. الەم چەمپيوناتىنىڭ كوماندالىق چەمپيوناتى رەسەيدىڭ تولياتتي قالاسىندا 20 جىلدىق ۇزىلىستەن كەيىن جالعاسىن تاپقالى وتىر.