كانادادا ءوتىپ جاتقان جاستار اراسىنداعى الەم بىرىنشىلىگىنىڭ تۇساۋكەسەر كەزدەسۋىندە قازاقستاننىڭ حوككەيشىلەرى فينليانديا قۇراماسىنان ويسىراي ۇتىلدى.
قوس كوماندانىڭ دەڭگەيى مۇلدە بولەك ەكەنى بارشامىزعا ءمالىم. فيندەر بۇل جارىستا 14 رەت (4 التىن+4 كۇمىس+6 قولا) جۇلدە العان. سوڭعى رەت ولار 2016 جىلى حەلسينكيدە وتكەن الەم بىرىنشىلىگىنىڭ باس جۇلدەسىن ولجالاعان بولاتىن. ال قازاقستان توعىز جىلدان كەيىن مىقتىلار توبىنا ەندى عانا ورالىپ وتىر. سوعان قاراماستان بۇل ويىندا ءبىزدىڭ جىگىتتەر بارىن سالدى. اسىرەسە, قاقپاشى دەمد ەرەمەەۆتىڭ ونەرى كوپشىلىكتىڭ كوڭىلىنەن شىقتى. ول سۋومي ەلى وكىلدەرىنىڭ قاقپاعا باعىتتاعان 51 سوققىسىن كەرى قايتاردى. كەرەمەت سەيۆتەر جاساپ, تالايلارعا تاڭداي قاقتىردى. جاسىراتىنى جوق, ەرەمەەۆ بولماعاندا ايتۋلى كەزدەسۋ بۇدان دا ءىرى ەسەپپەن اياقتالاتىن ەدى.
ءبىرىنشى كەزەڭدە وتتو لاتۆالا (13-مينۋت), اارنە تالۆيتيە (15-مينۋت) گول سوقسا, ۇزىلىستەن كەيىن سامۋلي ۆاينيونپيايا (33-مينۋت) مەرگەندىك تانىتتى. ءۇشىنشى كەزەڭدە كااپو كاككو (47-مينۋت) جانە الەكسي حەپونيەمي (49-مينۋت) نىسانانى ءدال كوزدەدى. قورىتىندى ەسەپ 5:0.
ەستەرىڭىزگە سالا كەتەيىك, كانادادا ءوتىپ جاتقان الەم بىرىنشىلىگىندە قازاقستاننىڭ جاستار قۇراماسى مىناداي قۇرامدا ونەر كورسەتۋدە. قاقپاشىلار – دەميد ەرەمەەۆ, دەنيس كاراتاەۆ («سنەجنىە بارسى»), ۆلاديسلاۆ نۋرەك («التاي تورپەدو»). قورعاۋشىلار – سامات دانيار, ۆالەري ورەحوۆ, ەۆگەني شينكارەتسكي, ەرنار مۇساباەۆ, ارتەم كورولەۆ, داۆيد مۇراتوۆ («سنەجنىە بارسى»), ياروسلاۆ حريپكوۆ («التاي تورپەدو»). شابۋىلشىلار – سايان دانيار, ارتۋر گاتياتوۆ, داۆيد ماكۋتسكي, يۆان ۆەرەششاگين, ايدوس جورابەك, باتىرلان مۇراتوۆ, ولەگ بويكو, دياس گۋسەينوۆ, ماكسيم مۋسوروۆ, دميتري ميتەنكوۆ («سنەجنىە بارسى»), اندرەي بۋيالسكي, رۋسلان دەمين («تەميرتاۋ»), دانيل ترەتياكوۆسكي («التاي تورپەدو»).
الەم چەمپيوناتىندا 10 كوماندا بەس-بەستەن ەكى توپقا ءبولىنىپ, ءوزارا كۇش سىناسۋدا «ۆ» توبىندا ونەر كورسەتىپ جاتقان جەرلەستەرىمىز بۇگىن اقش-قا قارسى وينايدى. ال 30 جانە 31 جەلتوقساندا سلوۆاكيا جانە شۆەتسيامەن شەبەرلىك بايقاسامىز.
عالىم سۇلەيمەن,
«ەگەمەن قازاقستان»