الدىن الا بولجام بويىنشا قاڭتاردا ورتاشا ايلىق اۋا تەمپەراتۋراسى رەسپۋبليكانىڭ وڭتۇستىك-باتىس, وڭتۇستىك جانە وڭتۇستىك-شىعىسىندا نورمادان 1°س جوعارى, ال قالعان ايماقتا كليماتتىق نورماعا جاقىن كۇتىلەدى, دەپ حابارلايدى كازگيدرومەت.
ايلىق جاۋىن-شاشىن مولشەرى نورماعا جۋىق جانە نورمادان جوعارى, تەك پاۆلودار جانە شىعىس قازاقستان وبلىسىنىڭ سولتۇستىگىندە نورمادان از كۇتىلەدى.
ءبىرىنشى دەكادانىڭ باسىندا رەسپۋبليكانىڭ سولتۇستىك, سولتۇستىك-شىعىس جانە ورتالىق ايماقتارى سۋىق انتيتسيكلوننىڭ ىقپالىندا بولادى. تەرمومەتردىڭ سىناپ باعناسى تۇندە 25...30, كەي جەرلەردە 35 دەيىن اياز, كۇندىز 15...20, كەي جەرلەردە 25 ايازعا دەيىن تومەندەيدى.
ال ەلىمىزدىڭ باتىس, وڭتۇستىك-باتىس جانە وڭتۇستىگىنە جىلى اۋا ماسسالارى شىعاتىن بولادى جانە فرونتالدىق بولىكتەردىڭ وتۋىمەن جىلى جاۋىن-شاشىنمەن اۋا رايى بولجانادى. اۋا تەمپەراتۋراسى:
تۇندە 2...7, كەي جەرلەردە 12 دەيىن اياز, كۇندىز 0...5 جىلى, كەي جەرلەردە 5 دەيىن ايازدى قۇرايدى.وسى ايدىڭ ىشىندە جىلى اۋا ماسساسىنىڭ ءجيى شىعۋىنا جانە فرونتالدىق بولىكتەردىڭ وتۋىمەن رەسپۋبليكانىڭ ۇلكەن بولىگىندە جىلى جانە جاۋىن-شاشىندى اۋا رايى كۇتىلەدى. تەك ءبىرىنشى جانە ءۇشىنشى دەكادانىڭ باسىندا كەزەكتى اۋا تەمپەراتۋراسىنىڭ تومەندەۋى كۇتىلەدى.