ەلباسى نۇرسۇلتان نازارباەۆ جۋرناليستەرگە بەرگەن سۇحباتىندا قازاقستانداعى تۇرعىن ءۇي ماسەلەسىنە توقتالىپ, 2018 جىلى قولدانىسقا بەرىلگەن تۇرعىن ءۇي كولەمى رەكوردتىق كورسەتكىشكە جەتەتىنىن مالىمدەدى.
«تۇرعىن ءۇي ماسەلەسى – وتە ماڭىزدى. بۇل باعىتتا قانشا جۇمىس اتقارساڭ دا, ەشقاشان بىتپەيدى. بىراق مۇنى جاقسى جاعىنان ءتۇسىنۋ قاجەت. ويتكەنى حالىقتىڭ سانى ارتىپ, قاجەتتىلىگى ءوسىپ كەلەدى دەگەن ءسوز. كەيىنگى كەزدە كوپتەگەن يگى باستامالار ىسكە قوسىلدى. ماسەلەن, تۇرعىن ءۇي قۇرىلىس جيناق بانكىنىڭ پايىزدىق مولشەرلەمەسى تومەن ەكەنى بەلگىلى. بۇل جۇمىس جالعاسا بەرەدى. ەكىنشىدەن, مۇمكىندىگى شەكتەۋلى, الەۋمەتتىك تۇرمىسى تومەن وتباسىلارىنا ارناپ مەملەكەتتىك تۇرعىن ۇيلەر سالىنىپ جاتىر», دەدى مەملەكەت باسشىسى.
پرەزيدەنت «نۇرلى جەر» باعدارلاماسى اياسىندا وتە كوپ مولشەردە ءۇي بەرىلگەنىن اتاپ ءوتىپ, «7-20-25» باعدارلاماسىنىڭ ءتيىمدى تۇسىن ايتىپ بەردى.
«بۇرىن بانكتەرگە پاتەر قۇنىنىڭ 50 پايىزىن جيناۋ قاجەت ەدى. قازىر بۇل سوما 20 پايىزعا ازايتىلدى. ۇلتتىق بانكتە پايىزدىق مولشەرلەمە – 12,5-ءتى قۇرايدى. ال بۇل باعدارلاما بويىنشا 7 پايىزبەن نەسيە بەرىلەدى. قالعانىن مەملەكەت وتەيدى. بۇل – حالىقتى تۇرعىن ۇيمەن قامتاماسىز ەتۋ ءۇشىن جۇمسايتىن قاراجاتى», دەدى ن.نازارباەۆ.
بۇدان كەيىن مەملەكەت باسشىسى تۇرعىن ءۇي قۇرىلىسىنىڭ قارقىنى جوعارى ەكەنىن ايتىپ, بىلتىر رەكوردتىق كورسەتكىشكە قول جەتكىزگەنىمىزدى مالىمدەدى.
«2017 جىلى 11 ميلليون شارشى مەتر تۇرعىن ءۇي قولدانىسقا بەرىلدى. بۇل – تاريحي كورسەتكىش. بيىل مۇنى 12 ميلليونعا جەتكىزەمىز. بۇل – 100 000 پاتەرگە تەڭ. ياعني, جىل سايىن جارتى ميلليون تۇرعىن جاڭا ۇيگە كىرەدى. مۇنداي جۇمىستار الداعى ۋاقىتتا دا جالعاسا بەرەدى», دەدى پرەزيدەنت.