ەلباسىنىڭ باق وكىلدەرىنە بەرگەن سۇقباتى بارىسىندا «ەگەمەن قازاقستان» رگ» اق باسقارما توراعاسى دارحان قىدىرالى تۇركىستان قالاسىنىڭ مارتبەسى تۋرالى سۇراق قويدى.
- ەسىمىزدە 2010 جىلى تۇركيانىڭ سول كەزدەگى پرەزيدەنتى ابدۋللا گۇل مىرزا تۇركىستاندا وزىڭىزگە اساتاياق ۇستاتىپ, «تۇركى الەمىنىڭ ليدەرى» دەپ اتاعان بولاتىن. بيىل سونىڭ جارقىن ايعاعى ىسپەتتى تۇگەل دۇنيەنىڭ ءتورى سانالاتىن تۇركىستانعا ايىرىقشا مارتەبە بەرەتىن جارلىققا قول قويدىڭىز. ول تەك قازاقستان حالقىنا ەمەس, باۋىرلاس جۇرتتاردى دا ۇلكەن قۋانىشقا بولەدى. ەندى تۇركىستان وبلىس ورتالىعى مارتەبەسىن الدى, شىمكەنت مەگاپوليس اتاندى. بۇل ەلىمىزگە ۇلكەن سەرپىلىس بەرەتىن باستاما. وسى تاريحي شەشىمنىڭ نەگىزگى سەبەپتەرىنە توقتالساڭىز.
- «تۇركىستان ءبىزدىڭ تاريحي ورتالىعىمىزدىڭ بىرەۋى. قازاقتا ورتالىق كوپ بولعان عوي. ول جەردە وتە ۇلكەن شەشىمدەر قابىلدانعان. قازىردىڭ وزىندە تۇركىستاننىڭ تۇبىندە, كەسەنەنىڭ توڭىرەگىندە بىرنەشە حاندارىمىزدىڭ, بەلگىلى باتىرلارىمىزدىڭ سۇيەگى جاتىر. تۇركى دۇنيەسىنىڭ رۋحاني ورتالىعى بولىپ سانالادى. قوجا احمەت ءياسساۋيدىڭ ءىلىمىن قاستەرلەيتىن جۇرت كوپ. بىلتىردىڭ وزىندە 150 مىڭعا جۋىق تۋريستەر كەلىپ كەتتى», دەدى پرەزيدەنت.
سونداي اق ەلباسى سۇحبات بارىسىندا ميلليون تۇرعىنى بار قالالاردى كوبەيتۋ جايىن تالقىلادى.
«شىمكەنتتىڭ حالقى ميلليون بولعاننان كەيىن ءبىز ونى تىكەلەي ورتالىققا باعىناتىن قالا دەپ الدىق تا, وبلىستىڭ ورتالىعىن تۇركىستان قالاسىنا الىپ كەلدىك. ول جەردە تەز ارادا تاعى ءبىر ۇلكەن قالا پايدا بولادى. بىزگە قالالاردى كوبەيتۋ كەرەك. بىزگە ميلليون تۇرعىنى بار قالالار كەرەك. الەم بويىنشا ميلليون حالقى بار قالالاردا عىلىم-ءبىلىم, مادەنيەت تەز داميدى. تاۋەلسىزدىك جاعدايىندا قازىر ءۇش قالامىز بار. ەندىگى ماڭىزدى قالا – اقتوبە نەمەسە قاراعاندى بولسا دەگەن ويىم بار. اۋىلدان قالاعا حالىق كوشىپ جاتىر, ۋربانيزاتسيا پروتسەسى ءجۇرىپ جاتىر. اقش حالقىنىڭ 2%-ى اۋىلدا تۇرادى. ال بىزدە اۋىل حالقى 43%-دى قۇرايدى. ەل ءۇشىن دە, ساياسات ءۇشىن دە ۇلكەن ماسەلە دەپ سانايمىن. تۇركىستاندى كوتەرسەك, از جىلدىڭ ىشىندە ءۇش ءجۇز مىڭ ادامى بار قالا بولىپ شىعادى. قۇرىلىسىن بەكىتتىم. دەپارتامەنتتەر, ءۇي جانە مادەنيەت قۇرىلىسى, تاريحي ءمانى بولعاننان كەيىن بىرنەشە مۋزەي قۇرۋ جوسپارى بار. تۋريستەردى تارتىپ, ۇلكەن قالا بولسا دەگەن ارمان بار. جىلىنى جاقسى كورەتىندەر سوندا بارسىن, سەرگەك بولام دەسە وسىندا كەلسىن», دەدى ەلباسى.