«حابار» اگەنتتىگى» اق باسقارما توراعاسىنىڭ ءبىرىنشى ورىنباسارى رينات دۋمان ۇلى اگەنتتىك قۇرامىنداعى تەلەارنالاردىڭ جاڭا جوسپارلارىمەن ءبولىستى.
– بيىل ەلىمىز ءۇشىن وتە تابىستى جىل بولدى. «حابار» اگەنتتىگى دە وسى رەتتە كورەرمەنگە جاڭالىققا تولى كوپتەگەن دۇنيەلەر ۇسىندى. 2018 جىل ءسىز ءۇشىن قانداي اۋقىمدى وقيعالارىمەن ەستە قالدى؟
– بيىل ەڭ باستى وقيعانىڭ ءبىرى – قازاق تەلەۆيزياسىنىڭ 60 جىلدىق مەرەيتويى. وسى 60 جىلدىقتىڭ اۋقىمىندا قازاق تەلەۆيزياسىنىڭ ارداگەرلەرىنە ارنالعان ءتۇرلى جانرداعى بىرنەشە تسيكلدىق دەرەكتى فيلمدەر مەن باعدارلامالار جاسالدى. سونداي-اق «حابار» اگەنتتىگىنە بيىل – 23 جىل تولدى. ءبىز ءوزىمىزدى سول 60 جىلدىق تاريحتىڭ ءبىر شيرەگى دەپ سانايمىز. وسى ارالىقتا قىزمەت ەتكەن جۋرناليستەردىڭ, وپەراتورلاردىڭ, رەجيسسەرلەر, جۇرگىزۋشىلەر سىندى تەلەۆيزيا اتتى وندىرىستىك كومانداعا قاتىسى بار ازاماتتاردىڭ جۇمىسىن كورسەتۋگە ارنالعان دۇنيە دايىندادىق. سونداي-اق وسى جىلى اقپارات جانە كوممۋنيكاتسيالار مينيسترلىگىنىڭ باستاماسىمەن «تۇمار» تەلەۆيزيالىق جۇلدەسى قازاق تەلەۆيزياسىنىڭ 60 جىلدىعىنا ارنالدى. سونىڭ اۋقىمىندا ايماقتارداعى ءبىر توپ ارداگەرلەرىمىز استاناعا كەلىپ, ءمينيستردىڭ قولىنان ارنايى توسبەلگىگە يە بولدى. بۇل ءبىزدىڭ ارداگەرلەرىمىزدىڭ عانا ەمەس, «حابار» اگەنتتىگىنىڭ 23 جىلدا اتقارعان ەڭبەگىنە بەرىلگەن باعا دەپ بىلەمىز. بۇدان سوڭ, اگەنتتىكتىڭ التىن قورىندا ساقتالعان بەينەماتەريالداردى تاڭداپ الدىق. 2016 جىلى ءبىز قازاقستاندىق بۇقارالىق اقپارات قۇرالدارىنىڭ ىشىنەن ءبىرىنشى بولىپ ەۋروپالىق حابار تاراتۋ وداعىنىڭ قاۋىمداستىرىلعان مۇشەسى رەتىندە ەندىك. كوپ جىلعى كەلىسسوزدەردىڭ ناتيجەسىندە «ەۆروۆيدەنيە» بايقاۋىنا قاتىسۋ جانە وسى جوبانى ەلدە وتكىزۋ مۇمكىندىگىنە يە بولدىق. تولىققاندى مۇشە بولماعاندىقتان ەرەسەكتەر قاتىساتىن «ەۆروۆيدەنيە» بايقاۋىنا قاتىسۋعا ازىرگە مۇمكىندىك جوق. بىراق بۇل باعىتتا كەلىسسوزدەر جۇرگىزىلىپ جاتىر. بولاشاقتا ناتيجەسىن بەرەدى دەگەن سەنىمدەمىز. دەسەك تە ءبىز بالالار «ەۆروۆيدەنيەسىنە» قاتىسۋعا مۇمكىندىك الدىق. بۇل ەلىمىزدىڭ تاۋەلسىز تاريحىندا العاش رەت بولعان وقيعا دەسەك بولادى. الەمنىڭ 300 ميلليونعا جۋىق كورەرمەنى تاماشالايتىن جوباعا قاتىسۋ مۇمكىندىگى وڭاي تيگەن جوق. ويتكەنى ول قاۋىمداستىقتىڭ باسشىلىعى ءبىزدىڭ تەلەارنا رەتىندەگى جاعدايىمىزعا عانا ەمەس, تەحنيكالىق مۇمكىندىكتەرىمىزگە دە ءمان بەردى. ناتيجەسىندە وزدەرىڭىز بىلەتىندەي, كوپتەگەن بالالاردىڭ ىشىنەن ۇلتتىق ىرىكتەۋدە حالىقتىڭ باسىم داۋىسىمەن دانەليا تۋلەشوۆا جەڭىسكە جەتىپ, مينسكىدە وتكەن حالىقارالىق بايقاۋعا قاتىستى. ول بۇكىل الەم كورەرمەندەرىنىڭ ينتەرنەتتە ونلاين داۋىس بەرۋى قورىتىندىسى بويىنشا 3-ورىن الدى. «ەۆروۆيدەنيە» سەكىلدى 20-عا جۋىق ەل قاتىسقان جوبادا مۇنداي جۇلدەگە جەتۋ, ءبىز ءۇشىن, ۇلكەن جەتىستىك. بولاشاقتا دا وسى بالالار «ەۆروۆيدەنيەسىنە» قازاقتىڭ تالانتتى ۇل-قىزدارىن تاڭداپ, الەمدىك اۋديتوريادا تانىتۋعا جۇمىس ىستەي بەرمەكپىز. سەبەبى وسى بايقاۋدا قازاقستاندا تالانتتى ۇل-قىزداردىڭ وتە كوپ ەكەنىنە كوزىمىز جەتتى. ەلباسىمىز «رۋحاني جاڭعىرۋ» باعدارلاماسىندا قازاقستان مادەنيەتىنىڭ الەمدەگى ورنى دەپ ارنايى ءبولىم ارناعان بولاتىن. سوندىقتان بۇل جاي عانا مۋزىكالىق جوبا ەمەس, ۇلكەن ءمانى بار حالىقارالىق يميدجدىك قادام بولدى.
سونداي-اق بيىل اگەنتتىك قۇرامىنا «ديستريبۋتسيا جانە حالىقارالىق بايلانىس» دەپارتامەنتى دەپ اتالاتىن قۇرىلىم قوسىلدى. اگەنتتىك اۋەلدەن ءتول كونتەنتتىڭ شەتەلدىك كورەرمەنگە جەتۋىن باستى باعىت سانايدى. بۇل جۇيەلى تۇردە جاسالىپ كەلە جاتقان جوبا. ەستەرىڭىزدە بولسا, بىلتىر سينگاپۋردە وتكەن ازيا تەلەۆيزيالىق تەلەنارىعىندا وڭتۇستىك-شىعىس ازياعا الەمنىڭ ءتۇرلى تەلەارنالارىنا ساتۋمەن جۇمىس ىستەيتىن ۇلكەن كومپانيامەن كەلىسىمشارتقا وتىرعان بولاتىنبىز. سونىڭ ناتيجەسىندە وڭتۇستىك-شىعىس ازيا ەلدەرى ءبىزدىڭ دايىن ونىمدەردى ساتىپ الىپ, ءوز اۋديتوريالارىنا ۇسىنىپ جاتىر.
«ەل ارنا» تەلەارناسىندا بۇگىندە وتاندىق كوركەم فيلمدەر عانا ەمەس, ورتالىق ازيا جانە تۇركى ەلدەرىنىڭ كلاسسيكالىق جانرداعى كونە جانە جاڭا فيلمدەرى كورسەتىلە باستادى. ورتالىق ازيا ەلدەرى ءبىر-بىرىنە تۋىس بولعاندىقتان, كورشىلەس ەلدەردىڭ كينەماتوگرافياسىنداعى وزگەرىستەردى كورسەتىپ, كورەرمەننىڭ جالپى تالعامىن كوتەرۋ باعىتىندا جۇمىس ىستەپ جاتىرمىز.
– Euronews, TRT, KBS سەكىلدى الەمنىڭ جەتەكشى تەلەارنالارىمەن بىرىگىپ جۇمىس اتقارىپ جۇرگەندەرىڭىزدى كورىپ ءجۇرمىز. مۇنداي الپاۋىت تەلەارنالارمەن جۇمىس ىستەۋ ءۇشىن ماماندارعا ارنالعان بىلىكتىلىكتى ارتتىرۋ كۋرستارىن ۇيىمداستىرىپ تۇراسىزدار ما؟
– اتالعان تەلەارنالارمەن اراداعى تۇراقتى ىنتماقتاستىق نەگىزىندە بيىل قىزمەتكەرلەردىڭ 80 پايىزى ارنايى ترەنينگتەرگە قاتىستى. بۇل – قىزمەتكەرلەردىڭ كۇندەلىكتى ءبىلىم الىپ, كاسىبي بىلىكتىلىگىن ارتتىرۋعا قاشان دا باسىمدىق بەرەتىنىمىزدىڭ بەلگىسى. سونداي-اق شەتەلدىك ساراپشى, ۇستاز, بيزنەس-ترەنەرلەردى ارنايى شاقىرتىپ جاتقان جايىمىز بار. ويتكەنى ادام رەسۋرسىنا سالىنعان ينۆەستيتسيا ول مىندەتتى تۇردە ناتيجە بەرەتىنىن بىلەمىز. سول ءۇشىن وسى باعىتتا تۇراقتى جۇمىس جۇرگىزىپ جاتىرمىز. بولاشاقتا حالىقارالىق ىنتىماقتاستىقتى دامىتۋ باعىتىندا كوپتەگەن جوبالاردى جاساۋدى جوسپارلاپ وتىرمىز. سول ءۇشىن «حابار» اگەنتتىگىنىڭ باسقارما توراعاسى الان اجىباەۆتىڭ تاپسىرماسىمەن ارنايى دەپارتامەنت قۇرىلدى. بۇل جۇمىس جۇيەلى تۇردە جالعاسا بەرەدى.
– اگەنتتىك قۇرامىنا كىرەتىن «حابار 24» تەلەارناسى بيىل ەفيرلىك كەستەسىنىڭ باسىم بولىگىن تىكەلەي ەفيردە شىعاردى. بۇل ۇلكەن جاۋاپكەرشىلىكتى تالاپ ەتەتىن جۇمىس. اتالعان تەلەارنانىڭ ىشكى جاي-كۇيىن ايتىپ وتسەڭىز.
– ءيا, ايماقتاردان, شەتەلدەردەن تىكەلەي قوسىلىمداردى بيىل كوبەيتتىك. بولاشاقتا دا تەلەارناداعى وسى ەرەكشەلىكتى كوبەيتە بەرۋ جوسپاردا بار. بيىل كوپتەگەن ۇلكەن فورۋمداردى, سامميتتەردى تىكەلەي ەفيردە كورسەتتىك. «حابار 24» تەلەارناسى جىلىنا 8704 ساعات حابار تاراتسا, سونىڭ 3215 ساعاتى تىكەلەي ەفيردە بولدى. بيىلعى جىلى بۇل تەلەارنادا جالپى 1000 تىكەلەي قوسىلىم بولعان ەكەن. بۇل ارنانىڭ قازاقستان بويىنشا 16 تىلشىلەر قوسىنى بار. جاقىندا تۇركىستان وبلىسىنىڭ پايدا بولۋىنا وراي, وسى وبلىستان وتاندىق اقپارات قۇرالدارىنىڭ ىشىنەن ءبىرىنشى بولىپ تىلشىلەر قوسىنىن اشتىق. ازىرشە شاعىن قۇرامدا جۇمىس ىستەپ جاتىر. كەلەسى جىلى مۇمكىندىك بولسا, ۇلكەن تەحنيكالىق مۇمكىندىكتەرى بار تىلشىلەر قوسىنىنا اينالدىرامىز دەگەن جوسپارىمىز بار. الەم بويىنشا 9 مەنشىكتى ءتىلشىمىز بار جانە وعان قوسا الەمنىڭ 10 مەملەكەتىندە فريلانسەر تىلشىلەرىمىز جۇمىس ىستەيدى. جالپى العاندا ءتۇرلى تاقىرىپتاعى 30-دان اسا ءتۇرلى باعدارلامالار وسى ارنادان شىعادى.
– 2018 جىلدىڭ قاڭتارىنان باستاپ اگەنتتىككە قاراستى تەلەارنالار جارنامادان باس تارتقان بولاتىن. مۇنىڭ سەبەبى نەدە؟
– بۇل كورەرمەنىڭ پايدالى كونتەنتتى ۋاقىتىن بولمەي كورۋ ءۇشىن جاسالعان شەشىم بولدى. ويتكەنى قىزىقتى ماتەريال كورىپ وتىرعان ساتتە قايتا-قايتا جىلت ەتەتىن جارنامالار كورەرمەننىڭ مازاسىن الارى ءسوزسىز. سول ءۇشىن ءبىز رەيتينگتىك كورسەتكىش جۇيەسىنەن دە شىققان ەدىك. الايدا ارىپتەس تەلەارنالاردىڭ قايدا باعىت الىپ بارا جاتقانى مەن ءتول تەلەونىمدەرىمىزدىڭ ۇلەسىن ءبىلۋ ءۇشىن رەيتينگتىك جۇيەگە قايتا ورالدىق. بۇل دا بولسا ءبىزدىڭ اگەنتتىك ءۇشىن باستى ءبىر ۇلكەن قادامداردىڭ ءبىرى بولدى. سونىڭ ناتيجەسى شىعار «حابار» ارناسىنان شىعاتىن «قارلىعاش ۇياسىن سالعاندا» سەريالى باستاعان ءبىر توپ سەريالدار جوعارى كورسەتكىش كورسەتىپ وتىر. «ميلليون كىمگە بۇيىرادى؟», «Topjargan» دەگەن سىندى حالىقارالىق فورماتتارمەن جاسالىپ جاتقان باعدارلامالار دا جوعارى رەيتينگتەرگە يە بولدى. سول سەكىلدى «قىزىق Times», «جۇلدىزدى جەكپە-جەك», ء«بىزدىڭ نازاردا», «Online» سەكىلدى باعدارلامالار دا كوشباسشىلار قاتارىندا.
– سوڭعى 5-6 جىل ارالىعىندا اگەنتتىكتە وتاندىق سەريالدار سانى كوبەيدى. جاڭا ماۋسىمدا كورەرمەنگە جول تارتاتىن قانداي تۋىندىلار بار؟
– ءيا, مەملەكەت باسشىلىعىنىڭ قولداۋىمەن وتاندىق سەريالدار كوپتەپ ءتۇسىرىلىپ جاتىر. بۇگىندە «حابار» اگەنتتىگى جىلىنا 10-12 سەريال تۇسىرەدى. ونىڭ باسىم كوپشىلىگى قازاق تىلىندە. بيىل بىرنەشە سەريالداردى ەفيرگە بەرىپ ۇلگەردىك. بۇل رەتتە اسىرەسە الەۋمەتتىك درامالارعا كوبىرەك كوڭىل بولەمىز. ويتكەنى كورەرمەنگە قازاق وتباسىلارىنىڭ ومىرىندە بولىپ جاتقان ءتۇرلى تۇيىتكىلدەر مەن تۇرمىستىق ماسەلەلەر قىزىق. ماسەلەن, بيىل «تاعى دا ءسۇي», «اعا», «قارلىعاش ۇيا سالعاندا» سەكىلدى بىرنەشە الەۋمەتتىك دراما كوپشىلىك كورەرمەنگە ۇسىنىلدى. قازاقتىڭ كەرەمەت باي ءتىلىن كورسەتكەن كومەديا جانرى دا بۇل رەتتە تىس قالمادى. شالا قازاقتانىپ بارا جاتقان ازاماتتاردى ويلاندىراتىن, اۋىل مەن قالانىڭ ءومىرىن ادەمى سالىستىرعان, بىراق جارىستىرماعان «شاشۋ» سەريالى ءالى كۇنگە دەيىن كورەرمەننىڭ نازارىنا ۇسىنىلىپ كەلەدى. سوڭعى جىلدارى جالپى الەمدىك تەندەنتسيانى, ءبىزدىڭ كورەرمەننىڭ سۇرانىسىن ەسكەرە وتىرىپ, قازاق ءتىلدى كريمينالدىق دامالاردى دا ءتۇسىرۋدى قولعا الدىق. وسى باعىتتا بىلتىر «ۆرەميا» دەگەن سەريال شىقسا, بيىل «اعا» دەگەن كريمينالدى سەريالدى كورەرمەنگە ۇسىندىق. جالپى العاندا قازىر ەفيردى كۇتىپ وتىرعان كوپتەگەن جوبالار بار. سولاردىڭ ءبىرى – «باتىرلار جولى» تاريحي سەريالى. مۇندا XVII- ءXVIIى عاسىرلارداعى باتىرلاردىڭ ونەگەلى ءومىرى كورسەتىلەدى. 2018 جىلى فرانتسيانىڭ كانن قالاسىندا وتكەن حالىقارالىق تەلەۆيزيالىق كورمەسىنە حالىقارالىق تەلەۆيزيا ماماندارىنىڭ نازارىنا اتالعان سەريالدىڭ تيزەرىن ۇسىنىپ, ەۋروپالىق كورەرمەننىڭ كوڭىلىنەن شىققانداي بولدىق. درامادا قاراساي باتىرمەن بىرگە قاندى كويلەك دوسى اعىنتاي باتىر, تايماس باتىردىڭ ءومىرى, ۇلى دالانىڭ ازاتتىعى مەن بوستاندىعى ءۇشىن كۇرەسى تۋرالى سۋرەتتەلەدى. سەريالدا اكتەرلەر قۇرامى دا جاقسى جاساقتالعان. باستى رولدەردى نازار سۇلتانوۆ, مۇرات بەيسەنبين, ءاشىم احمەتوۆ, جاندوس ايباسوۆ, ەرجان نۇرىمبەت, الدابەك شالباەۆ, ايدوس بەكتەمىر, ءمولدىر مەكەنباي سىندى اكتەرلەر وينايدى. سونىمەن قاتار 71-ءشى كانن كينوفەستيۆالىندە «ەڭ ۇزدىك ايەل ءرولى» اتالىمىن جەڭىپ العان سامال ەسلياموۆانى قاراساي باتىردىڭ اناسى وبرازىندا كورەسىزدەر. بۇل جوباعا ءتۇسىرىلىم توبى جان-جاقتى ءارى تىڭعىلىقتى دايىندالدى. تاريحشىلارمەن كەڭەسىپ, سول زاماندى شىنايى كورسەتۋ ءۇشىن ءار دەكوراتسيا مەن لوكاتسيا ۇزاق تاڭدالدى. جەكپە-جەك كورىنىستەرىن سومداۋعا جايداربەك كۇنعوجينوۆ باستاعان قازاقستاندىق كاسكادەرلەر قاتىستى. سوندىقتان ول وسكەلەڭ ۇرپاققا بەرەرى مول دۇنيە بولادى.
سونداي-اق «جالعىز جاۋقازىن» اتتى جاڭا سەريالدا كەدەي وتباسى مەن باي وتباسىنىڭ ۇل-قىزىنىڭ قارىم-قاتىناسى مەن قاراپايىم ازاماتتاردىڭ ورتاسىندا بولىپ جاتقان وقيعالار كورسەتىلەدى. بۇل سەريالدىڭ ءتۇسىرىلىم جۇمىستارى اياقتالدى. الداعى ۋاقىتتا كورەرمەن نازارىنا ۇسىنىلادى. سەريالدا اقبوتا سەيتماعانبەت, جولامان ءامىروۆ, ليزا سەرىكوۆا, باقىتجان الپەيىسوۆ, داۋرەن ايدارقۇلوۆ سىندى اكتەرلەر وينايدى. بۇل ءار جاستاعى كورەرمەنگە ارنالعان پايدالى الەۋمەتتىك دراما بولادى دەگەن ويدامىز.
سونداي-اق «كەلىنجان» اتتى كومەديالىق سەريال مەن بەكزات ساتتارحانوۆتىڭ ءومىرى مەن سپورتتاعى جەتىستىكتەرىنە ارنالعان تۋىندى ءوز كەزەگىن كۇتىپ تۇر. «بەكزات» سەريالى كەلەسى جىلى تولىق مەتراجدى فيلم رەتىندە دە كينوتەاترلاردان كورسەتىلەتىن بولادى.
– جازۋشىلار تۋرالى تۋىندى ءتۇسىرىلدى دەپ ەستىگەن ەدىك. بۇل تۋىندىنىڭ ءتۇسىرىلىم جۇمىستارى اياقتالدى ما؟
– بۇل سەريالدا 70-80-جىلدارداعى جازۋشىلاردىڭ شىعارماشىلىعىنداعى, ومىرىندەگى, قاراپايىم كەزدەسۋلەرىندەگى ەرەكشە ەستە قالارلىق وقيعالارىنان سىر شەرتىلەدى. مۇندا كەڭەس داۋىرىندە ۇلتتىڭ جوعىن جوقتاپ, جۇگىن كوتەرگەن, قاراما-قايشىلىققا تولى سول ءداۋىردىڭ قايماعى بولعان جازۋشىلار ورتاسىنداعى اڭىز بەن اقيقاتقا اينالعان اڭگىمەلەردى ارقاۋ ەتكەن دۇنيەلەر كورسەتىلەدى. 60-70-جىلدارى قازاق ادەبيەتىنىڭ قايناعان ورتاسىنا سوعىستىڭ قان شەڭگەلىندە تۋعان جەتىم ۇرپاقتىڭ ارىنداپ كەلىپ قوسىلعانى ءمالىم. تىم ەرتە ەسەيگەن سول ۇرپاق ارلى دا ارىندى قالپىمەن ادەبيەتتىڭ كوشىن بيىككە سۇيرەدى. قانداي قيىن جاعدايدى باستان وتكەرسە دە ادەبيەتكە كەلىپ قوسىلعان تالانتتار شوعىرى تۋرالى ەلدىڭ ەسىندە ىستىق ەستەلىكتەر عانا قالعان. بۇگىندە كوزى ءتىرى سول ءداۋىردىڭ تۇلعالارى دا وتكەن كۇننەن سىر ىزدەپ ساعىنارى انىق. تالاي جۇمباعىن ارقالاپ باقيعا اتتانعان تۇلعالارىمىزدىڭ پاراسات بيىگىندەگى ايشىقتى ويلارىمەن استاسقان وقيعالار تۋىندىنىڭ وزەكتى تاقىرىبى بولماق. وسى سەريال سول كەزدەگى قازاق ادەبيەتىنىڭ كورنەكتى وكىلدەرىنە ارنالعان دەسەك بولادى. ءبىراز دۇنيەنىڭ, ءبىراز قۇپيانىڭ سىرى اشىلۋى مۇمكىن. بۇل «قالامگەر» جوباسىنىڭ باس كەڭەسشىلەرى – دۋلات يسابەكوۆ, تولەن ابدىك, بەكسۇلتان نۇرجەكەەۆ. سەريال رۋحاني ازىق بەرەر, وتاندىق مادەني مۇرانىڭ ارحيۆىندە قالار جاقسى دۇنيە بولادى دەگەن ويدامىز. اكتەرلەر قۇرامىندا ەرگەنباي ابۋەۆ, دوسجان جانبوتاەۆ, بالتاباي سەيىتمامىتوۆ, كەنەن اقۇرپەكوۆ, ايدار امانباي, باقداۋلەت شايماحان جانە تاعى باسقا 100-گە جۋىق پەرسوناجدى سومداعان اكتەرلەر بار. سەريالدى كورەرمەن الدا كەلە جاتقان جىلدىڭ ءبىرىنشى بولىگىندە كينوتەاتردان تولىق مەتراجدى كينو تۇرىندە جانە تەلەديداردان سەريالدىق نۇسقاسىن كورە الادى.
سونداي-اق «حابار» ارناسىندا «تاڭعاجايىپ الەم», «جاراتىلىس. ادامزات تاريحىنا ساياحات», «مارس» دەپ اتالاتىن «National Geographic» تۇسىرگەن دەرەكتى تۋىندىلار دا جالعاسا بەرەدى. مۇنداي عىلىمي, تانىمدىق جوبالاردى كوبەيتۋ ارقىلى كورەرمەننىڭ ءبىلىم دەڭگەيىن, تانىم كوكجيەگىن كەڭەيتكىمىز كەلەدى.
تاعى, كورەرمەنگە الەمدىك تۇساۋكەسەر ۇسىنامىز. 31 جەلتوقساننان (وسى كۇنى 21.00-دە كورسەتىلەدى) باستاپ BBC تەلەارناسىمەن قاتار «وتۆەرجەننىە» (الاستاتىلعاندار) سەريالى «حابار» تەلەارناسىندا دا كورسەتىلەدى. ۆيكتور گيۋگو شىعارماسىنىڭ جەلىسى بويىنشا تۇسىرىلگەن تۋىندى اپتاسىنا ءبىر رەت ءار دۇيسەنبى سايىن ساعات 22:30-دا شىعادى. بۇل دا بولسا, تەك ءوزىمىزدىڭ ىشكى قازانىمىزدا قايناي بەرمەي, الەمدىك تەلە تۇساۋكەسەردەن دە كورەرمەندى كەش قالدىرماۋ, قاۋىشتىرۋ ءۇشىن جاسالىپ جاتىر. سونداي-اق تەلەارنادا «تاعدىر.تاريح.تۇلعا», «ونەگەلى عۇمىر», «تاعدىر جولى», ء«ومىر جولى», «تاينى. سۋدبى. يمەنا», «ودنا يستوريا», ء«بىر تۋىندى تاريحى» سەكىلدى دەرەكتى فيلمدەر تسيكلى بار. وسىنداي تاريحتان سىر شەرتەتىن سۇبەلى دۇنيەلەردى كورسەتۋ جۇمىستارى الداعى ۋاقىتتا دا جالعاسا بەرەدى.
– ءبىر قۋانتارلىعى تەلەارنادا حالىقارالىق فورماتتاعى باعدارلامالار سانى كوبەيدى. وسى جونىندە ايتىپ وتسەڭىز.
– بيىلعى جىلى بىزدە Topjargan اتتى مۋزىكالىق جوبا جۇزەگە استى. مۇندا قاراپايىم قازاقتىڭ ۇل-قىزدارى قاتىسىپ, 3 جارىم اي بويى باق سىنادى. ناتيجەسىندە تىكەلەي ەفيردە كىل مىقتىنىڭ ىشىنەن شىن مىقتىنى انىقتادىق. اقمارال دەگەن جاپ-جاس ونەر كوللەدجىنىڭ ءۇشىنشى كۋرس ستۋدەنتى جەڭىمپاز اتاندى. سونداي-اق كورەرمەننىڭ سۇيىكتى جوباسىنا اينالعان مىقتى انشىلەردىڭ باسەكە الاڭى «جۇلدىزدى جەكپە-جەك» باعدارلاماسىنىڭ دا ەكىنشى ماۋسىمى اياقتالدى. بۇل جوبانىڭ كەلەسى جىلى ءۇشىنشى ماۋسىمىن بەرۋدى جوسپارلاپ وتىرمىز. سونداي-اق «حابار» تەلەارناسىندا الەمنىڭ 45 ەلىندە كورسەتىلەتىن BBC-ءدىڭ Zerde اتتى ينتەللەكتۋالدى جوباسى كورسەتىلىپ جاتىر. سول سياقتى «ميلليون كىمگە بۇيىرادى؟» جوباسى 20 جىلدان بەرى الەمنىڭ كوپتەگەن ەلىندە كورسەتىلەدى. وسى ماۋسىمنان باستاپ بۇل جوبا كورەرمەن سۇراۋى بويىنشا قازاق تىلىندە قايتا شىقتى. اتالعان ەكى باعدارلاما ينتەللەكتۋالدى ازاماتتاردىڭ سانىن كوبەيتۋگە ارنالعان.
– Kazakh TV تەلەارناسىنىڭ شەتەلدىك Discovery ارناسىمەن بىرىگىپ جاساپ جاتقان جۇمىستارى قالاي ءجۇرىپ جاتىر؟
– بۇل مەموراندۋم ارقىلى Atlas Global Kazakhstan اتتى قازاق, ورىس, اعىلشىن تىلىندە قازاقستان تۋرالى تانىمدىق دەرەكتى فيلمدەردىڭ تسيكلى جاسالدى.
– ەلباسىنىڭ 21 قاراشادا جاريالانعان « ۇلى دالانىڭ جەتى قىرى» ماقالاسى قازىر مەملەكەتتىك دەڭگەيدە تالقىلانىپ جاتىر. وسى رەتتە تەلەارنا ماقالانىڭ ءمان-ماڭىزىن حالىققا جەدەل ءارى وڭتايلى جەتكىزۋدە تاپتىرماس قۇرال بولىپ وتىر. بۇل ءۇشىن «حابار» اگەنتتىگى قانداي جوسپارلار قۇردى؟
– ەلباسىنىڭ ماقالاسىندا ايتىلعان جەتى قىردى جەكە باسىمدىق رەتىندە الىپ, بىرنەشە باعدارلامالار تسيكلىن دايىنداپ جاتىرمىز. بۇل رەتتە ۇلتتىق تاريحقا ارنالعان, الەمدىك وركەنيەتكە قوسقان ۇلەسىمىزدى باعىت-باعىت بويىنشا سارالاپ, شەتەلدىك ماماندارمەن بىرگە تالقىلاۋ الاڭىن جاساۋ ويىمىزدا بار. سونداي-اق «جاستار جىلىنا» ارناپ 2019 جىلدىڭ اقپان, ناۋرىز ايلارىندا «حابار» ارناسىندا «ازامات» جاستار باعدارلاماسىن قايتا ورالتىپ, كوپشىلىك كورەرمەنمەن قاۋىشتىرامىز دەگەن نيەتتەمىز. «ازاماتقا» كەپ ازاماتتىق بەلسەندىلىگىن تانىتىپ, مەملەكەتتىڭ وزەكتى ماسەلەلەرىن ايتىپ, قوعامدىق پىكىرگە قوزعاۋ سالۋعا ۇلەس قوسقان ازاماتتاردى قايتا جيناماقپىز. جالپى العاندا رۋحاني جوبالارعا باسىمدىق بەرۋ ءبىزدىڭ باستى ماقسات. جاڭا جىلدا الەۋمەتتىك باعىتتاعى جوبالار جالعاسىن تابا بەرەدى, ءوز كەزەگىندە جاڭا جوبالار دا دۇنيەگە كەلەدى. اگەنتتىك تەك قازاقستانمەن شەكتەلمەي, ورتالىق ازيا, تمد كەڭىستىگىندە جاسالاتىن, تارالاتىن جوبالار دايىندايتىن بولادى. بۇل وتاندىق تەلەۆيزياعا قوزعاۋ سالار يندۋستريالدى-يننوۆاتسيالىق قادام بولارى ءسوزسىز.
– اڭگىمەڭىزگە راحمەت!
اڭگىمەلەسكەن مارجان تىلەۋبەك,
«ەگەمەن قازاقستان»