قازاقستان پرەزيدەنتى ن.نازارباەۆتىڭ قاتىسۋىمەن بولعان جالپىۇلتتىق تەلەكوپىر بارىسىندا ورال – تاسقالا – رەسەي شەكاراسى باعىتىنداعى كۇرە جول تولىق پايدالانۋعا بەرىلدى.
«نۇرلى جول» باعدارلاماسى شەڭبەرىندە كۇردەلى جوندەۋدەن وتكەن حالىقارالىق كۇرە جولدىڭ ۇزىندىعى − 100 شاقىرىم. ستراتەگيالىق ماڭىزعا يە اۆتوجولدىڭ ەل ەكونوميكاسىن جانداندىرۋعا تيگىزەر پايداسى زور. اسىرەسە «باتىس ەۋروپا – باتىس قىتاي» حالىقارالىق كولىك دالىزىندەگى ءترانزيتتىڭ وسۋىنە مۇمكىندىك بەرەدى. 2018 جىلدىڭ وزىندە 1,2 ملن ترانزيتتىك كولىك, 4 ملن ادام ورال قالاسى ارقىلى وتكەن ەكەن. الداعى جىلدارى كولىك تاسقىنى بۇدان دا كوبەيەدى دەيدى ماماندار.
ءىى تەحنيكالىق سانات بويىنشا جوندەلگەن كۇرە جول جوباسىنىڭ تاپسىرىس بەرۋشىسى «قازاۆتوجول» ۇك» اق بولسا, «Uniserv» جشس بۇل ءىستى ەكى جىل ىشىندە اتقارىپ شىعىپتى. قۇرىلىسقا بارلىعى 1500 ادام تارتىلعان. اسفالتبەتوندى جول تابانىنىڭ جالپاقتىعى 9 مەتر, ساپاسى دوڭگەلەك نەگىزىنە تۇسكەن 13 توننا سالماقتى كوتەرە الادى. تاۋلىگىنە 4403 كولىك وتكىزە الاتىن كۇرە جولدى ەل مەن ەلدى جالعاپ, مەملەكەت ەكونوميكاسىنا ءنار بەرەتىن كۇرەتامىر دەسە بولعانداي.
− رەسەيگە اقتوبە ارقىلى, ورال ارقىلى شىعاتىن جولدار جاڭارىپ جاتىر. ەندى رەسەي دە ءوز تاراپىنان وسى باستامانى جالعايدى دەپ ويلايمىز.
سوندا ەۋروپامەن ءبىزدىڭ قارىم-قاتىناسىمىز جاقىنداي تۇسەدى. تابىستى بولىڭدار! قۇتتىقتايمىن. كىرىسەيىك جۇمىسقا! – دەدى ەلباسى جالپىحالىقتىق تەلەكوپىر كەزىندە جاڭا جولداعى قوزعالىستى باستاپ بەرىپ.
– ەلباسىنىڭ «نۇرلى جول» باعدارلاماسى بويىنشا وڭىردە جىل سايىن 500 شاقىرىم جول جوندەلىپ جاتىر. سونىڭ ىشىندە بيىل رەسپۋبليكالىق ماڭىزى بار 285 شاقىرىم جول كۇردەلى جوندەۋدەن ءوتتى. جول سالۋعا بولىنگەن قارجى كولەمى دە 7-8 ملرد تەڭگەگە جەتىپ, كوبەيۋدە. مىنە, سونىڭ يگىلىگىن ەل كورىپ, «ورال – تاسقالا – وزينكي رف» جولى پايدالانۋعا بەرىلدى, − دەيدى وبلىس اكىمى ا.كولگىنوۆ.
وڭىردە ورال قالاسى ارقىلى وتەتىن حالىقارالىق جول تۇيىندەرى, ونى وڭتايلاندىرۋ ءىسى قارقىندى جۇرۋدە. ماسەلەن, اتىراۋدان كەلەتىن كۇرە جولدى ورالدىڭ اينالما جولى ارقىلى ساراتوۆ كۇرە جولىنا قوساتىن 32 شاقىرىمدىق جول بولىگى كەلەسى جىلى ىسكە قوسىلماق. ونىڭ 20 شاقىرىمى قازىردىڭ وزىندە ءازىر. بۇدان بولەك ساراتوۆ پەن سامارا قالالارىنا شىعاتىن كۇرە جولدار دا ورال قالاسىنىڭ اينالما جولى ارقىلى جالعانادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى