الماتىدا ۆولەيبولدان ەرلەر اراسىندا «بۋرەۆەستنيك كۋبوگى» دەپ اتالاتىن حالىقارالىق تۋرنير اياقتالدى.
كەزىندە «بۋرەۆەستنيكتىڭ» داڭقى تورتكۇل دۇنيەگە تارادى. ايگىلى ۆولەيبولشى, اتاقتى باپكەر وكتيابر جارلىقاپوۆتىڭ ۇيىتقى بولۋىمەن الپىسىنشى جىلدارى الماتى قالاسىندا ىرگەتاسى قالانعان كوماندا قىسقا عانا مەرزىم ارالىعىندا ءوزىنىڭ مىقتىلىعىن مويىنداتتى. اتاپ ايتساق, 1965 جىلى ءوز تاريحىندا تۇڭعىش رەت كسرو چەمپيوناتىنىڭ «ا» توبىندا كۇش سىناسۋ قۇرمەتىنە يە بولعان جەرلەستەرىمىز العاشقى ماۋسىمدا 8 ورىنعا تابان تىرەسە, كەلەسى جىلى 4 ساتىعا جايعاستى. 1967 جىلى جۇلدەگەرلەر ساناتىنا قوسىلىپ, قولا مەدالدى يەلەنسە, 1968 جىلى تاعى ءبىر ساتى جوعارىلاپ, كۇمىسكە جۇلدەگە قول سوزدى. 1969 جىلى قازاقستاننىڭ ۆولەيبولشىلارى وزدەرىنىڭ تاريحي جەڭىسىنە قول جەتكىزدى. سول ماۋسىمدا كىل مىقتىلاردىڭ بارلىعىن قاپى قالدىرعان «بۋرەۆەستنيك» ايدى اسپانعا ءبىر-اق شىعارىپ, كسرو چەمپيونى اتاندى.ال 1970-1971 جىلدارى قاتارىنان ەكى مارتە ەۋروپا چەمپيوندارى كۋبوگىن ولجالاپ, الەمدەگى ەڭ ۇزدىك كوماندالار ساناتىنا قوسىلدى. ەكى رەتىندە دە جەرلەستەرىمىز اقتىق ايقاستا چەحوسلوۆاكيانىڭ اتاعى الىسقا جايىلعان «زەتور زبرويوۆكا» كلۋبىنا سان سوقتىردى.
مىنە, سول داڭقتى كوماندانىڭ قۇرمەتىنە وتكەن جارىستا بيىل الماتىنىڭ «بۋرەۆەستنيگى» توپ جاردى. جەرلەستەرىمىز قىرعىزستان مەن وزبەكستاننىڭ وكىلدەرىن 3:0 جانە تۇركىمەنستاننىڭ كومانداسىن 3:1 ەسەپتەرىمەن ۇتىپ, رەسەيلىكتەرگە 2:3 ەسەبىمەن ەسە جىبەردى. نəتيجەسىندە ەڭ كوپ ۇپاي جيعان الماتىلىقتار ءبىرىنشى ورىن السا, ەكىنشى جəنە ءۇشىنشى ورىندى تۇركىمەنستان مەن رەسەي كوماندالارى يەلەندى.
الماتىنىڭ تۇرعىندارى ۆولەيبولدى وتە جاقسى كورەتىنى بارشاعا ءمالىم. وسى جارىستى تاماشالاۋ ءۇشىن دە سپورت كەشەنىنە جانكۇيەر كوپتەپ جينالىپ, بىزگە ۇنەمى قولداۋ كورسەتىپ وتىردى. بيىلعى دودادا ءتورت كوماندا ءبىر دەڭگەيدە ونەر كورسەتتى. تەك قانا قوسالقى قۇرامداعى ويىنشىلارعا ارقا سۇيەگەن قىرعىزستاننىڭ كومانداسى عانا əلسىزدەۋ بولدى. ال مəسكەۋ وبلىسى مەن تۇركىمەنستان ۆولەيبولشىلارى اراسىنداعى تارتىس ءۇش جارىم ساعاتقا سوزىلدى. وسىنىڭ وزىنەن-اق ءتۋرنيردىڭ قانشالىقتى شيەلەنستى بولعانىن اڭعارۋعا بولادى, – دەيدى "بۋرەۆەستنيك" كلۋبىنىڭ پرەزيدەنتى امانكەلدى شابدارباەۆ.
عالىم سۇلەيمەن,
«ەگەمەن قازاقستان».
الماتى